قىزىلوردادا 200 ورىندىق بالالار ەمحاناسى اشىلدى

قىزىلوردادا 200 ورىنعا ارنالعان كوپسالالى بالالار ەمحاناسى اشىلدى. اشىلۋ سالتاناتىنا قىزىلوردا وبلىسىنىڭ اكىمى قىرىمبەك كوشەرباەۆ جانە اكادەميك, قازاقستاندىق پەدياتريانىڭ نەگىزىن سالۋشى كامال ورمانتاەۆ قاتىستى. قىرىمبەك كوشەرباەۆتىڭ ايتۋىنشا, 2013 جىلعا دەيىن قىزىلوردالىقتار ساپالى مەديتسينالىق كومەك الۋ ءۇشىن الماتى مەن استانا قالالارىنا بارۋعا ءماجبۇر بولىپ كەلگەن. «2014 جىلى قىزىلوردالىق دارىگەرلەر رەسپۋبليكادا ءتورتىنشى بولىپ بۇيرەك اۋىستىرۋ وتاسىن جاسادى. ءبىزدىڭ مەديتسينالىق قىزمەتكەرلەر الىس-جاقىن 28 مەملەكەتپەن بايلانىس ورناتىپ, 6000-عا جۋىق مامان حالىقارالىق باعدارلامالار بويىنشا قايتا دايارلاۋ كۋرستارىنان ءوتتى. سوڭعى ءۇش جىلدا دەنساۋلىق ساقتاۋ سالاسىنىڭ قاجەتتىلىكتەرىنە بولىنگەن قاراجات كولەمى 9 ملرد. تەڭگەگە ارتىپ, بيىل ونىڭ بيۋدجەتى 32 ملرد. تەڭگەنى قۇرادى. مەديتسينا سالاسىن قارجىلاندىرۋ بويىنشا رەسپۋبليكادا الدا كەلەمىز», – دەدى وبلىس اكىمى. ايتا كەتەيىك, نىساننىڭ قۇرىلىسى 2014 جىلدىڭ تامىز ايىندا باستالدى. مۇندا 11 بولىمشە, 5 وتا جاساۋ بلوگى, 12 ورىندىق جانساقتاۋ بولىمشەسى, انەستەزيا جانە كونسۋلتاتيۆتىك-دياگنوستيكالىق بولىمشە جۇمىس ىستەيدى. اۋرۋحانا زاماناۋي وزىق مەديتسينالىق قۇرالدارمەن جابدىقتالعان.