قوستاناي اۋدانىنداعى ءالجان اۋىلىندا تۇراتىن نۇرلان مەن گۇلجاۋھار تولەگەنوۆتەر ءوزىنىڭ ءبىر ۇلىنان باسقا ءتۇرلى ۇلتتىڭ سەگىز بالاسىن باۋىرىنا باستى. ولار وسى اۋىلداعى كىشكەنتاي قورجىن ۇيدە تۇرىپ جاتتى. بالالارعا ول تارلىق ەتەتىن. بىراق جوقتان بار جاساپ ۇيرەنگەن وتاناسى «كوڭىلىمىز كەڭ بولسا جارار» دەپ ەشكىمنىڭ الدىنا الاقان جايىپ بارعان جوق.
كوپ بالالى وتباسىنىڭ جاعدايىن كورگەن گۇلجاۋھاردىڭ مەكتەپتەگى ۇستاز ارىپتەستەرى وسىدان ءۇش جىل بۇرىن ولارعا اسارلاتىپ ءۇي سالىپ بەرۋگە باستاما كوتەرگەن بولاتىن. ءسويتىپ, اۋدان ۇستازدارى قارجى جيناعان ەدى. بىراق ولار جيناعان 5 ميلليون تەڭگە ءۇي سالۋعا جەتپەدى, ءارى مۇعالىمدەر جالداعان قۇرىلىس بريگاداسى ءۇي قۇرىلىسىندا قاتە جىبەرىپ, ول توقتاپ قالعان بولاتىن. سوندىقتان تولەگەنوۆتەر وتباسى ءۇيىنىڭ قۇرىلىسىن اياقتاۋدى قازاقستان حالقى وبلىستىق اسسامبلەياسى قولعا العان ەدى.
وتباسىلىق بالالار ءۇيى ءۇشىن وبلىستاعى بارلىق ۇلتتىڭ وكىلدەرى جىلۋ جينادى. كورەي ۇلتتىق-مادەني ورتالىعىنىڭ توراعاسى, بەلگىلى كاسىپكەر, «بك-ستروي» قۇرىلىس كومپانياسىنىڭ جەتەكشىسى يگور كيم كوتتەدجدىڭ قۇرىلىسىن اياقتاۋدى قولىنا العان ەدى, ول جاقىندا وتباسىنا ءۇيدىڭ كىلتىن بەردى. تولەگەنوۆتەر وتباسى ەكى قاباتتى ءزاۋلىم ۇيگە كوشىپ, قونىس تويىن تويلادى.
«نۇرلان مەن گۇلجاۋھار وتە ساۋاپتى ءىس ىستەپ وتىر. مەن گۇلجاۋھاردىڭ مەيىرىمدىلىگى مەن ادامگەرشىلىگىنە تاڭقالامىن. بالالاردىڭ بارلىعىن كەرەمەت تاربيەلەپ وتىر, ولار سپورتپەن, مۋزىكامەن اينالىسادى. ال ولاردىڭ جاساپ وتىرعان ءىسىنىڭ قاسىندا بىزدىكى ءسال كومەك قانا. بارلىق جۇرت بولىپ بۇل قايىرىمدىلىق ىستەن شەت قالمادى. ەندى ءبىز وسى وتباسىنا تۇراقتى كومەك بەرىپ تۇراتىن بولامىز, كوكتەمدە ءۇيدىڭ اينالاسىن رەتكە كەلتىرەمىز, باۋ-باقشا ەگەتىن بولامىز». - دەدى يگور رومانوۆيچ. جۇرتشىلىق, دەمەۋشىلەر كەلىپ, وتباسىنىڭ جاڭا قونىسىنا قۇتتى بولسىن ايتتى.
ءنازيرا جارىمبەتوۆا,
"ەگەمەن قازاقستان".
قوستاناي وبلىسى
