شىمكەنتتە كولىك كەپتەلىسىن ازايتۋدىڭ جاڭا جوباسى قولعا الىندى

كەشە وبلىس اكىمى جانسەيىت تۇيمەباەۆ شىمكەنت قالاسىندا قۇرىلىسى جۇرگىزىلىپ جاتقان بىرقاتار كوشەلەردىڭ جۇمىسىمەن تانىسىپ, جول قۇرىلىسىن كەشەۋىلدەتىپ  جاتقان مەردىگەر مەكەمەلەرگە سىن ەسكەرتپە جاسادى, دەپ جازادى وقو اكىمىنىڭ ءباسپاسوز قىزمەتى.\ ماسەلەن, 2016 جىلدىڭ جاز ايىندا قۇرىلىسى باستالعان ۇزىندىعى 2,9 شاقىرىمدى قۇرايتىن ۇ.ارعىنبەكوۆ كوشەسى قۇرىلىسىنىڭ نەبارى 150 مەترى اياقتالعان. جاۋاپتى مەردىگەر مەكەمە «ارت قۇرىلىس» جشس جول قۇرىلىسىنىڭ قالعان بولىگىن كۇز ايلارىندا پايدالانۋعا بەرەتىنىن ايتىپ, قۇرىلىسقا قولبايلاۋ بولعان  51 نىساننىڭ بۇگىندە 21-ءى كەلىسىمىن بەرگەنىن جەتكىزدى. كوشە قۇرىلىسىنىڭ باياۋلىعىنا سىن ايتقان ايماق باسشىسى جول قۇرىلىسىن الداعى  ەكى ايدا اياقتاپ, ەل يگىلىگىنە پايدالانۋعا بەرۋدى تاپسىردى. «ۇزىندىعى نەبارى 2,9 شاقىرىم بولاتىن كوشەنىڭ قۇرىلىسىن كۇز ايلارىنا دەيىن سوزۋدىڭ قاجەتى جوق. قۇرىلىسقا قاجەتتى قارجى تولىعىمەن ءبولىندى. ەندى كۇزگە دەيىن سوزباي ەكى ايدا اياقتاۋدى تاپسىرامىن. ءبىز قىسقا مەرزىمدە قۇرىلىس جۇرگىزۋدى  تۇركيالىق باۋىرلارىمىزدان ۇيرەنۋىمىز قاجەت. ەگەر جۇمىس تولىق اياقتالسا, قالاداعى كولىك كەپتەلىسىن مەيلىنشە ازايتۋعا مۇمكىندىك تۋادى», - دەدى اكىم. مۇنان سوڭ, ءوڭىر باسشىسى «بەكجان» بازارى ماڭىنان سالىناتىن تەمىرلان تاس جولى قيىلىسىنداعى وتپە جولدىڭ قۇرىلىس سىزباسىمەن تانىستى.  جالپى قۇنى 1 ملرد. 737 ملن. تەڭگە بولاتىن جوبانىڭ قۇرىلىس جۇمىستارى وسى جىلى باستالاتىن بولادى. اتالعان جوبا تولىعىمەن ىسكە قوسىلعاندا تاشكەنت, تۇركىستان, الماتى باعىتىنداعى جول قاتىناسى رەتتەلىپ, كولىك كەپتەلىسى تۇبەگەيلى شەشىلەتىن بولادى. سونىمەن قاتار, اكىم «بەكجان» ساۋدا ورتالىعى مەن ونداعى اۆتوبەكەتتىڭ جۇمىسىمەن تانىستى. تاۋلىگىنە 250 اۆتوبۋس قابىلداۋعا قاۋقارلى ساپارجايدىڭ جالپى كولەمى 23 مىڭ شارشى مەتردى قۇرايدى. بۇل بەكەتتە بۇگىندە 17 جولاۋشى تاسمالداۋشى مەكەمە 5 مىڭعا جۋىق جولاۋشىعا قىزمەت كورسەتىپ وتىر. زاماناۋي ۇلگىدە قايتا جاڭعىرتىلعان «بەكجان» كەشەنىنىڭ جۇمىسىنا وڭ باعاسىن بەرگەن  وبلىس اكىمى بازار باسشىلىعىنا وتاندىق تاۋار وندىرۋشىلەر ءۇشىن قاجەتتى ساۋدا قاتارلارىن اشۋ قاجەتتىگىن ايتتى. سونىمەن قوسا, اكىم جاۋاپتى سالا باسشىلارىنا قالاداعى بازارلار سانيتارلىق تالاپقا ساي بولۋىن قاداعالاۋدى ەسكەرتىپ, ساتۋشىلارعا ءتيىستى جاعداي جاسالۋ كەرەك ەكەنىن اتاپ ءوتتى.