ەلىمىزدە جەكەمەنشىك اۋرۋحانالار الدىنداعى كەدەرگىلەر جويىلادى

قر دەنساۋلىق ساقتاۋ ءمينيسترى ەلجان ءبىرتانوۆتىڭ توراعالىعىمەن دەنساۋلىق ساقتاۋ سالاسىندا كاسىپكەرلىكتى دامىتۋعا كەدەرگى بولىپ وتىرعان شەكتەۋلەردى جويۋ ماسەلەسىنە ارنالعان كەڭەس ءوتتى, دەپ حابارلايدى قازاقپارات. ەلباسى نۇرسۇلتان نازارباەۆتىڭ 2017 جىلعى 31 قاڭتارىنداعى جولداۋىندا بيزنەستىڭ الدىندا تۇرعان كەدەرگىلەردى جويۋ تۋرالى تاپسىرما بەرگەن بولاتىن. مەملەكەت باسشىسى باسكەلەستىكتى ارتتىرۋ ءۇشىن مىندەتتى الەۋمەتتىك مەديتسينالىق ساقتاندىرۋ اياسىندا جەكە مەديتسينالىق مەكەمەلەرگە مەملەكەتتىك ۇيىمدارمەن ءبىر دەڭگەيدە مۇمكىندىك جاساۋ كەرەكتىگىن اتاپ وتكەن بولاتىن. قازاقستانداعى 901 اۋرۋحانانىڭ 161-ءى, 3149 امبۋلاتورلىق-ەمحانالىق مەكەمەنىڭ 941-ءى جەكە مەنشىكتە. مەديتسينالىق قىزمەتكە اقى تولەۋ كوميتەتىنىڭ مالىمەتى بويىنشا, 2016 جىلى 288 كوممەرتسيالىق مەديتسينالىق ۇيىم كەپىلدەندىرىلگەن تەگىن مەديتسينالىق قىزمەت اۋقىمى اياسىندا جۇمىس ىستەگەن. بۇل مەملەكەتتىك تاپسىرىستىڭ 28 پايىزى. مىندەتتى الەۋمەتتىك مەديتسينالىق ساقتاندىرۋ اياسىندا جەكە سەكتورعا حالىققا مەملەكەتتىك تاپسىرىس اياسىندا دا, ساقتاندىرۋ اياسىندا دا مەديتسينالىق قىزمەت كورسەتۋگە مۇمكىندىك بەرۋ قاراستىرىلعان. ءوز كەزەگىندە ازاماتتارعا مەديتسينالىق مەكەمەنى تاڭداۋ قۇقىعى بەرىلەدى. بۇل مەديتسينالىق قىزمەتتەر نارىعىنداعى باسەكەنى كۇشەيتىپ, ونىڭ ساپاسىن كوتەرۋى ءتيىس. دەنساۋلىق ساقتاۋ مينيسترلىگى مەن قازاقستاندىق جەكە مەديتسينالىق قۇرىلىمدار قاۋىمداستىعى بىرلەسىپ جۇرگىزگەن ساراپتاما بارىسىندا, دەنساۋلىق ساقتاۋ سالاسىندا كاسىپكەرلىكتى دامىتۋعا قولبايلاۋ بولىپ وتىرعان ەڭ ماڭىزدى كەدەرگىلەر انىقتالدى. مىسالى, مەديتسينالىق مەكەمەلەردىڭ عيماراتتارىنداعى بولمەلەردىڭ اۋقىمىنا قويىلاتىن تالاپتار تىم جوعارى. بۇل الەمدىك تاجىريبەگە ساي ەمەس, ءارى شىعىنداردىڭ نەگىزسىز وسۋىنە ىقپال ەتەدى. ءبىر-بىرىنە قايشى كەلەتىن قۇقىقتىق نورماتيۆتىك اكتىلەر دە از ەمەس. جينالعان ۇسىنىستار دەنساۋلىق ساقتاۋ سالاسىنداعى اكىمشىلىك كەدەرگىلەردى جويۋعا ارنالعان شارالاردى جاساقتاۋ بارىسىندا ەسكەرىلەدى. بۇل ءۇشىن دەنساۋلىق ساقتاۋدى دامىتۋ رەسپۋبلكالىق ورتالىعىنىڭ جانىنان زاڭگەرلەر مەن دەنساۋلىق ساقتاۋ ۇيىمداستىرۋشىلارىنان تۇراتىن قۇرىلىم جاساقتالدى. ول ۇكىمەتتەن, مەديتسينالىق قاۋىمداستىقتان, بيزنەس وكىلدەرىنەن تۇسكەن ۇسىنىستاردى جۇزەگە اسىرۋمەن اينالىسادى. «مەديتسينالىق مەكەمەلەردىڭ جۇمىسىن رەتتەيتىن قۇقىقتىق-نورماتيۆتىك اكتىلەرگە تۇبەگەيلى ساراپتاما جاسالىپ, قايتا قارالۋى ءتيىس مەملەكەتتىك فۋنكتسيالار انىقتالادى. كادرلاردىڭ سانىن رەتتەۋ, مەديتسينالىق قىزمەت پەن ءدارى-دارمەككە قولجەتىمدىلىك, تسيفرلىق مەديتسينا, مەديتسينالىق قىزمەتتىڭ كورسەتىلۋ ءتارتىبى, ساپاسى مەن قاۋىپسىزدىگى, مەملەكەتتىك-جەكە ارىپتەستىكتى دامىتۋ, سانيتارلىق-ەپيدەميولوگيالىق قىزمەت سالالارىنداعى اكىمشىلىك-قۇقىقتىق كەدەرگىلەردى مۇمكىندىگىنشە ازايتۋ جوسپارلانىپ وتىر», – دەپ اتاپ ءوتتى دەنساۋلىق ساقتاۋدى دامىتۋ رەسپۋبليكالىق ورتالىعى باس ديرەكتورىنىڭ مىندەتىن اتقارۋشى اينۇر ايىپحانوۆا. قازاقستاندىق جەكە مەديتسينالىق قۇرىلىمدار قاۋىمداستىعىنىڭ توراعاسى گۇلنار وتەپوۆانىڭ ايتۋىنشا, سانيتارلىق-ەپيدەميولوگيالىق سالانىڭ جۇمىسىن رەتتەيتىن قۇقىقتىق-نورماتيۆتىك اكتىلەردى, سانيتارلىق جانە قۇرىلىستىق ەرەجەلەر مەن نورمالاردى قايتا قاراۋ كەرەك. ونىڭ پىكىرىنشە, قۇقىقتىق بازاداعى قايشىلىقتار مەن مەملەكەتتىك ورگاندار جۇمىسىنىڭ ۇيلەسىمسىزدىگى جەكە سەكتوردىڭ دامۋىنا كەدەرگى جاساپ وتىر. وتىرىسقا دەنساۋلىق ساقتاۋ مينيسترلىگى كوميتەتتەرى مەن دەپارتامەنتتەرىنىڭ باسشىلارى, ۇلتتىق ەكونوميكا مينيسترلىگىنىڭ, كاسىپكەرلەردىڭ «اتامەكەن» ۇلتتىق پالاتاسىنىڭ, مەديتسينا جانە فارماتسەۆتيكا سالاسىنداعى ءىرى بيزنەس-قاۋىمداستىقتار, الەمدىك بانكتىڭ جوبالارعا قولداۋ جاساۋ توبىنىڭ, حالىقارالىق كونسالتينگتىك, ۇكىمەتتىك ەمەس ۇيىمداردىڭ وكىلدەرى قاتىستى.