وقو-دا 2016 جىلى دەمەۋشىلەر ەسەبىنەن 52 سپورت الاڭى سالىندى

2016 جىلى قالا, اۋداندارداعى ەلدى مەكەندەردە دەمەۋشىلەر ەسەبىنەن 52 سپورت الاڭشالارى سالىنىپ, پايدالانۋعا بەرىلدى. سونداي-اق, ەلدى مەكەندەردە جەرگىلىكتى بيۋدجەت, بيزنەستىڭ الەۋمەتتىك جاۋاپكەرشىلىگى اياسىندا جانە «جۇمىسپەن قامتۋ 2020» جول كارتاسى باعدارلاماسى اياسىندا وبلىس كولەمىندە جالپى 116 سپورت الاڭشالارى سالىندى. بۇل تۋرالى بۇگىن وقو ايماقتىق كوممۋنيكاتسيالار قىزمەتىندە وتكەن بريفينگتە وبلىستىق دەنە شىنىقتىرۋ جانە سپورت باسقارماسىنىڭ باسشىسى ن.الىبەك ءمالىم ەتتى, دەپ حابارلادى وقو اكىمىنىڭ ءباسپاسوز قىزمەتى. باسقارما باسشىسىنىڭ ايتۋىنشا, بۇقارالىق سپورتتى دامىتۋ ماقساتىندا 2016 جىلى وبلىس اۋماعىندا 4849 ءتۇرلى سپورتتىق ءىس-شارالار وتكىزىلىپ, وعان  550 مىڭنا استام ادام قاتىسسا, ونىڭ ىشىندە اۋىلدى جەرلەردە ۇيىمداستىرىلعان 3151 سپورتتىق شاراعا 362 975 ازامات قامتىلعان. ال, وتكەن جىلدىڭ قورىتىندىسى بويىنشا وبلىستا دەنە شىنىقتىرۋ جانە سپورتپەن تۇراقتى تۇردە شۇعىلدانۋشىلار سانى 708 884 ادامدى قۇراپ, وبلىستاعى بارلىق جاستاعى حالىقتىڭ قامتىلۋى  24,7 پايىزعا  جەتىپ وتىر. اۋا-رايى قولايلى, قىسى جىلى بولاتىن وڭىردە سپورتپەن شۇعىلدانامىن دەگەن ازاماتتارعا بۇگىندە بارلىق جاعداي جاسالۋدا. شاردارا اۋدانى مەن تۇركىستان قالاسىندا سپورت كەشەندەرى اشىلدى. ال, شىمكەنت قالاسىندا بارلىق ساناتتاعى ازاماتتارعا دەنە شىنىقتىرۋ جانە سپورتپەن شۇعىلدانۋى ءۇشىن «جەڭىس», «تاۋەلسىزدىك», ساياباقتارى مەن «ءنۇرسات» شاعىن اۋدانى مەن «ناۋرىز» الاڭىندا 4 «Street Workout» سپورتتىق قوزعالىسىنا ارنالعان ارنايى الاڭشالار ستاندارتقا ساي سالىنىپ, حالىق يگىلىگىنە بەرىلگەن.