تۇركى اكادەمياسىنا بۇۇ باس حاتشىسىنىڭ ورىنباسارى كەلدى

استانادا جۇمىس ساپارىمەن جۇرگەن بىرىككەن ۇلتتار ۇيىمى باس حاتشىسىنىڭ ورىنباسارى, بۇۇ دامۋ باعدارلاماسى ەۋروپا مەن تمد ەلدەرى بويىنشا وڭىرلىك بيۋروسىنىڭ ديرەكتورى, بۇۇ ەكسپو-2017 حالىقارالىق مامانداندىرىلعان كورمەسىنىڭ باس كوميسسارى جيحان سۇلتانوعلۋ حانىم بۇگىن تۇركى اكادەمياسى حالىقارالىق ۇيىمىنا (TWESCO) ارنايى كەلدى. مارتەبەلى مەيماندى قارسى العان TWESCO باسشىسى دارحان قىدىرالى ۇيىمنىڭ قىزمەتى مەن ميسسياسى جايلى كەڭىنەن تانىستىردى. اكادەميانىڭ حالىقارالىق بايلانىستارى مەن عىلىمي جوبالارى, جاريالاعان ەڭبەكتەرىمەن بىرگە كەلەشەكتەگى جوسپارلارى جونىندە مول ماعلۇمات بەردى. ەكىجاقتى كەزدەسۋگە سونىمەن قاتار, تۇركى مەملەكەتتەرى اقساقالدار كەڭەسىنىڭ مۇشەسى ءادىل احمەتوۆ, بۇۇدب-نىڭ قازاقستانداعى تۇراقتى وكىلىنىڭ ورىنباسارى مۋنحتۋيا التانگەرەل, قازاقستانداعى بۇۇدب دەپارتامەنت باسشىلارى يرينا گوريۋنوۆا مەن دانا امانوۆا قاتىستى. TWESCO كىتاپحاناسى مەن تۇركى تاريحى مۋزەيىمەن تانىسقان جيحان سۇلتانوعلۋ حانىم اكادەميانىڭ قىزمەتىن جانە تۇركى دۇنيەسىنىڭ ينتەگراتسياسىن نىعايتىپ, دامىتۋداعى ۇلەسىن جوعارى باعالادى. اكادەميا باسشىسى تارتۋ ەتكەن قۇندى كىتاپتاردى, ونىڭ ىشىندە جۋىردا عانا تۇساۋى كەسىلگەن «جويىلۋ قاۋپىندەگى تۇركى تىلدەرى» ءتورت تومدىعىن زور ىقىلاسپەن قابىل الىپ, كوپتومدىقتىڭ عىلىمي ماڭىزى زور دەپ اتاپ ءوتتى. كەلەلى كەزدەسۋ سوڭىندا جيحان سۇلتانوعلۋ حانىم اكادەميانىڭ تىلەك كىتابىنا جىلى لەبىزىن جازىپ قالدىردى. ايتا كەتۋ كەرەك, بۇۇ باس حاتشىسىنىڭ ورىنباسارى ج.سۇلتانوعلۋ 2016 جىلى TWESCO-نىڭ نيۋ-يوركتەگى بۇۇ باس كەڭسەسىندە وتكىزگەن «2030 جوسپارى ءۇشىن جىبەك جولى بويىنداعى سينەرگيا» اتتى حالىقارالىق سيمپوزيۋم جۇمىسىنا ارنايى قاتىسىپ, جيىننىڭ جوعارى دەڭگەيدە وتۋىنە قولداۋ كورسەتكەن بولاتىن.