جامبىل وبلىسىنىڭ 11 مەكتەبىندە روبوتوتەحنيكا ۇيىرمەسى بار

جامبىل ءوڭىرىنىڭ مەكتەپتەرىندە «روبوتوتەحنيكا» ۇيىرمەلەرىن اشۋعا كوڭىل ءبولىنىپ جاتىر, دەپ حابارلادى جامبىل وبلىسى اكىمدىگىنىڭ ءباسپاسوز قىزمەتى. «تارازداعى ءنومىرى 54-مەكتەپ وقۋشىلارى قولدارى بوساي قالسا, وسى سىنىپقا ۇمتىلادى. بالعىندار روبوت قۇراستىرىپ, ونى باسقارۋدى ۇيرەنۋدە. ولار سان ءتۇرلى تەحنيكا جيناۋعا ارنالعان ارنايى قۇراستىرمالى بولشەكتەرمەن جۇمىس ىستەيدى», - دەلىنگەن حابارلامادا. ايماقتاعى 6 وقۋ وشاعىندا قازىر وسىنداي ۇيىرمەلەر جۇمىس ىستەپ تۇر. قىزىقتى دا قاجەتتى ىسپەن الىس اۋىلدارداعى بالالار دا قامتىلعان. ودان بولەك, تارازداعى تەحنيكالىق شىعارماشىلىق ورتالىعىندا 100-گە تارتا جەتكىنشەك روبوت جاساۋمەن اينالىسۋدا. بالالار قولىمەن جاسالعان سونداي دۇنيەلەردىڭ ءبىرى – اربا. وقۋشىلار دوڭگەلەكتىڭ ورنىنا تەمىر اياق جاساپ, قادامداپ جۇرەتىندەي قىلعان. ايتۋلارىنشا, سول ارقىلى اۋىر جۇكتەردى وڭاي تاسىپ, قىرعا قاراي شىعۋدا قينالماۋعا بولادى. قازىر ۇيىرمە قاتىسۋشىلارى ەلەكتروندى باعدارلامالار جاساۋ ءىسىن مىقتاپ مەڭگەرۋگە كىرىسكەن. ول باعدارلامالار كومەگىمەن روبوتتارعا كۇردەلى تاپسىرمالار بەرىپ, ورىنداتۋ كوزدەلۋدە. وبلىستا مۇنداي ۇيىرمەلەرى بار مەكتەپتەر سانىن ارتتىرۋ كوزدەلگەن. ايماق باسشىسىنىڭ تاپسىرماسىنا سايكەس وبلىستىق ءبىلىم باسقارماسى جاڭا وقۋ جىلىنا كەمىندە 11 وقۋ وشاعىن قامتۋى ءتيىس. باستى كوڭىل اۋىلدىق جەرلەردەگى ءبىلىم نىساندارىنا بەرىلمەكشى.