سۋرەتشى گەورگي سوكوۆ وزىنىڭ 41-ءشى رەت اشىلىپ وتىرعان كورمەسىن «اق پەن قارا» دەپ اتاپتى. شىعارمالارى تەك گرافيكا جانرىندا ورىندالعان. «مەن ءۇشىن قاراما-قايشى وسى ەكى ءتۇستىڭ ءوزى كوپ نارسە ايتاتىنداي كورىنەدى. قازىر ءتۇستىڭ الۋان ءتۇرىن پايدالانىپ سالاتىن كەسكىندەمە جانرى سۇرانىسقا يە ەكەنىن بىلەمىن. بىراق ونەر دەگەن ۇلى ۇعىمدا شەكتەۋ بولماۋى ءتيىس. مەن «ويىمدى نەگە گرافيكا جانرىمەن ايتپايمىن؟» دەدى گەورگي ميحايلوۆيچ كورمەنىڭ اشىلۋ سالتاناتىندا. گەورگي ميحايلوۆيچ سوكوۆتىڭ سوزىنشە, قازىرگى كورمەلەردە گرافيكا سيرەك ۇسىنىلادى, ويتكەنى كەز كەلگەن زاماناۋي سۋرەتشى كۇردەلى, ءارى كوپ ەڭبەكتى قاجەت ەتەتىن ناقىش تەحنيكاسىندا جۇمىس جاساۋعا بەل بۋا بەرمەيدى. گ. سوكوۆتىڭ گرافيكالىق تۋىندىلارىنىڭ سيۋجەتتەرىندە دالا سالت اتتىلارى, رىتسارلار, اۆتوردى تولعانتاتىن ادەبي كەيىپكەرلەر ءجيى كەزدەسەدى. سۋرەتشى تۋىندىلارىنا جوعارى ورىنداۋ مادەنيەتى, باي قيال, مانەرلىلىك, اق پەن قارا تۇستەردىڭ كەرەعارلىعى ءتان. ول مىسقىلشىل, اشۋلى, سىرشىل بولا الادى, وعان تۇرمىستىڭ جانە ءومىردىڭ اسقاق تۇستارىنا قول جەتكىزۋ وڭاي.
سالتاناتتا وبلىستىق مادەنيەت باسقارماسىنىڭ باسشىسى ەرلان قالماقوۆ سۋرەتشىنى كورمەنىڭ اشىلۋ سالتاناتىمەن قۇتتىقتاي وتىرىپ, ونەر ادامدارىنىڭ شىعارمالارىندا ۇندەستىك بولاتىنىن ايتتى. ول مۇقاعالي ماقاتاەۆتىڭ ولەڭىن ورىس تىلىندە وقىپ بەردى. سونىمەن قاتار ونىڭ شاكىرتتەرى, ارىپتەستەرى جانە سۋرەتشىنىڭ تالانتىن قۇرمەتتەيتىن كورەرمەندەر جىلى لەبىزدەرىن ايتتى.
ءنازيرا جارىمبەتوۆا, «ەگەمەن قازاقستان»
