ءار نارسەنىڭ پارقى سالىستىرعاندا بىلىنەدى. مىسالى, 2015 جىلى يسپانيانىڭ گرانادا قالاسىندا وتكەن بۇكىلالەمدىك قىسقى ستۋدەنتتەر ويىندارىندا ءبىزدىڭ ەلدىڭ سپورتشىلارى 11 مەدال ولجالاعان بولاتىن. ونىڭ بەسەۋى التىن بولسا, التاۋى كۇمىس ەدى. ەندى مىنە, قازاقستان قۇراماسى ءوزىنىڭ بۇل كورسەتكىشىنەن ءۇش ەسەدەي اسىپ ءتۇستى. الماتىداعى ۋنيۆەرسيادا الاۋى سونگەن كەزدە ءبىزدىڭ قورجىنىمىزدا 36 مەدال بولدى. التىن جۇلدەنىڭ ءوزى 11-گە جەتتى, كۇمىستەن سەگىز مەدال الساق, 17 رەت قولا جۇلدەنى قاناعات ەتتىك. ءسويتىپ, ستۋدەنت سپورتشىلارىمىز جالپىكوماندالىق ەسەپتە تەك رەسەي كومانداسىن عانا العا جىبەرىپ, مارتەبەلى ەكىنشى ورىنعا تاباندى نىق تىرەدى. مۇنى ءبىز ەلىمىزدەگى قىسقى سپورتتىڭ قىسىل-تاياڭ شاقتى ارتقا قالدىرىپ, قۇلاش سەرمەپ دامۋدىڭ داڭعىلىنا تۇسكەنى دەپ ۇيعاردىق.
وسكەمەندىكتەر ورگە سۇيرەدى
الماتى-2017 ۋنيۆەرسياداسىندا ەكى مىڭنان استام اتلەتتەر سپورتتىڭ 12 ءتۇرى – بياتلون, شاڭعى جانە كونكيمەن جۇگىرۋ, كەرلينگ, شاڭعى جارىس جانە قوسسايىس, شاڭعىمەن ترامپليننەن سەكىرۋ, سنوۋبورد, مانەرلەپ سىرعاناۋ, فريستايل, شايبالى حوككەي جانە شورت-ترەك بويىنشا 85 مەدال جيىنتىعىن ساراپقا سالدى. ءبىزدىڭ جۇلدەلى بولعان سپورتشىلارىمىزدىڭ تابىسىن وڭىرلەر تۇرعىسىنان الىپ سالىستىرا قارايتىن بولساق, شىعىس قازاقستان وبلىسى ستۋدەنتتەرىنىڭ شوقتىعى بيىك تۇر. مىسالى, وسى ءوڭىردىڭ ورەندەرى قازاقستان قورجىنىنا 7 التىن, 2 كۇمىس جانە 2 قولا مەدال سالدى. اسىرەسە, 22 جاستاعى بياتلونشى گالينا ۆيشنەۆسكايانىڭ قول جەتكىزگەن تابىسىن ايرىقشا اتاپ وتۋگە بولادى. سپورتشى 7,5 شاقىرىمدىق سپرينتەرلىك ماسس-ستارت سىنىندا جانە ءتورت اتىس شەبى بار 12,5 شاقىرىم قاشىقتىقتا الدىنا جان سالمادى. بۇعان قوسا ول 15 شاقىرىمعا سوزىلعان جەكە جارىستا جانە كوماندالىق ەستافەتا سىنىندا كۇمىس جۇلدەگە يە بولدى. سونداي-اق, فريستايلشىلار دميتري رەيحارد پەن يۋليا گالىشەۆا تۋرالى دا تەك قانا جىلى لەبىز بىلدىرگەن ءجون. ولار موگۋل بويىنشا وتكەن فينالدىق سىندا ارقايسىسى 70 باللدان جوعارى ۇپايعا يە بولدى. جاس تالانت – نەبارى 19 جاستاعى شاڭعىشى يۆان ءليۋفتىڭ دە تاماشا ونەرىن ايتپاي كەتۋگە بولمايدى. ول سپرينتەرلىك قاشىقتىقتا الدىنا جان سالماي, قازاقستاننىڭ جۇلدە قورىنا التىنشى التىن مەدالدى قوسقان ەدى. بۇدان بولەك, ءبىر عانا شىعىس قازاقستان وبلىسىنىڭ 19 حوككەيشىسى قازاقستان قۇراما كومانداسىنا مۇشە بولىپ, مۇز ايدىنىندا ونەر كورسەتتى. مىنە, وسى ايتىلعانداردى سارالاي كەلە, وسكەمەن ءوڭىرىن قىسقى سپورتىمىزدىڭ قاينار كوزى نەمەسە چەمپيونداردىڭ ۇستاحاناسى دەپ نىق سەنىممەن ايتۋعا بولادى.ەڭبەك ەتسەڭ ەرىنبەي...
جەڭىسكە جەتكەن, جۇلدەلى بولعان سپورتشىلارىمىز سىي-سياپاتتان قۇر قالمايدى. مىسالى, ەلىمىزدىڭ مادەنيەت جانە سپورت ءمينيسترى ارىستانبەك مۇحامەدي ۇلى چەمپيوندارىمىزدىڭ 4,9 ميلليون تەڭگەدەن, كۇمىس جۇلدەگەرلەردىڭ 3,3 ميلليون تەڭگەدەن جانە دە قولا مەدال يەگەرلەرىنىڭ 1,6 ميلليون تەڭگەدەن سىياقى الاتىنىن مالىمدەدى. بۇل – الەمدىك دەڭگەيدەگى دودادا ەل نامىسىن لايىقتى قورعاعان ەرلەرگە دەگەن شىنايى قۇرمەت. بىلە-بىلسەك, سپورتشىلارىمىزدى ماتەريالدىق تۇرعىدان وسىلايشا ماراپاتتاۋدىڭ ءوزى بۇل سالاداعى جاس بۋىندى بيىك ماقساتتارعا ءارى ىنتالاندىرىپ, قۇلشىندىرارى ءسوزسىز. جالپى, ءبىزدىڭ سپورتشىلار ىشىندە سىياقىنى ەڭ كوپ الاتىن – بياتلونشى گالينا ۆيشنەۆسكايا. شىعىسقازاقستاندىق شاڭعىشى ءھام مەرگەن قىز ەكى التىن جانە ەكى كۇمىس مەدالدارى ءۇشىن 16 ميلليون 400 مىڭ تەڭگەنى جامباسقا باسادى. شاڭعىشى اننا شەۆچەنكونىڭ دا ءاميانى اقشاعا سىقاي تولماقشى. جۇيرىك شاڭعىسىنىڭ ارقاسىندا التىن, كۇمىس جانە قولا جۇلدەلەردى جەڭىپ العان جەلاياق سپورتشىنىڭ ماڭداي تەرى 13 ميلليون تەڭگەگە باعالاندى. بۇدان كەيىنگى ساتىدا فريستايل شەبەرلەرى – دميتري رەيحەرد پەن يۋليا گالىشەۆا. ولاردىڭ ارقايسىسىنا 9 ميلليون 800 مىڭ تەڭگەدەن سىياقى بەرىلەدى.قىر استىندا – قىسقى ويىندار
ساناۋلى كۇندەردەن كەيىن ساپپورو قالاسىندا قىسقى ءVىىى قىسقى ازيا ويىندارى باستالادى. الماتىداعى اقجولتاي جەڭىستەر جاپونيادا جالعاسىن تاپسا دەپ تىلەيسىڭ. دەگەنمەن, ءبىزدىڭ قىسقى سپورتشىلار ءۇشىن ەڭ باستى دودا – 2018 جىلى وڭتۇستىك كورەيانىڭ پحەنچحان قالاسىندا وتەتىن ءححىىى قىسقى وليمپيا ويىندارى. بۇل ءدۇبىرلى دوداعا قازاقستاندىق سپورتشىلار دايىندىقتى باستاپ تا كەتكەن سىڭايلى. «ءبىز ءۇشىن, – دەدى ۇلتتىق وليمپيادا كوميتەتىنىڭ پرەزيدەنتى تيمۋر ق ۇلىباەۆ. – كەلەسى جىلى بولاتىن قىسقى وليمپيا ويىندارى. وڭتۇستىك كورەيادا وتەتىن بۇل دوداعا قاتىساتىن سپورتشىلارىمىزدىڭ دايىندىعى ءۇشىن ءوز تاراپىمىزدان قولدان كەلگەن جاعدايدىڭ ءبارىن جاسايمىز». البەتتە, جاقىن كۇندەرى سپورتشىلارىمىزدىڭ الماتى-2017 ۋنيۆەرسياداسىنداعى ونەرى جان-جاقتى ءھام تەرەڭ تالداۋدان وتەتىنى ءسوزسىز. جەتىستىكتەر ءوز الدىنا, جىبەرىلگەن كەمشىلىكتەر مەن قاتەلىكتەر سىن ساداعىنا ءىلىنىپ, سارالاناتىنى جانە راس. سايىپ كەلگەندە, مۇنىڭ ءبارى دە قىر استىندا تۇرعان قىسقى ازيا جانە كەلەسى جىلعى قىسقى وليمپيا ويىندارىنا دەگەن مۇقيات دايىندىقتىڭ مىقتى ىرگەتاسى بولسا قۇبا-قۇپ.اششى ساباق بولسا يگى...
وزىمىزدە وتكەن ۋنيۆەرسيادا سىنىندا ءۇمىتتى اقتاماعان سپورتشىلاردىڭ بولعانى دا راس. اسىرەسە, التىن جۇلدە كۇتكەندە شورت-ترەك شەبەرلەرىنىڭ سىننان ءبىر ەمەس, بىرنەشە مارتە سۇرىنگەنى كوڭىلدى الاڭ قىلدى. بار بولمىسى ۇشقىرلىق پەن اككىلىككە قۇرىلعان بۇل سپورت تۇرىندەگى جاعداي جاڭىلىس باسقان ءبىر قادام, ىركىلىپ قالعان ءبىر ساتكە ءباسىبۇتىن بايلانعان. بۇعان دەيىن كوزگە ءتۇسىپ, اۋىزعا ىلىگىپ جۇرگەن ابزال اجىعاليەۆ, نۇربەرگەن جۇماعازيەۆ, نۇرتىلەك قاجىعاليەۆ, ايدار بەكجانوۆ جانە دەنيس نيكيشا سىندى شەبەرلەر ءۇشىن بۇل دوداداعى سان سوقتىرعان اتتەگەنايلار اششى ساباق بولسا يگى دەيمىز. شورت-ترەكشىلەرىمىزدىڭ شالالاۋ ونەر كورسەتكەنىن باس باپكەردىڭ ءوزى دە مويىندادى. «ءوزىم دە شاكىرتتەرىمنەن التىن كۇتتىم. الايدا, جاعداي باسقاشا ءوربىدى. مۇمكىن بولعان 8 التىننىڭ التاۋىن كورەيالىقتار, ەكەۋىن قىتايلىقتار جەڭىپ الدى. ولار مىقتىلىعىن تاعى ءبىر دالەلدەدى», دەگەن ەدى «ەگەمەن قازاقستان» گازەتىنىڭ تىلشىسىنە بەرگەن سۇحباتىندا شورت-ترەكتەن ەل قۇراماسىنىڭ باس جاتتىقتىرۋشىسى مادىعالي قارسىبەكوۆ. قالاي بولعان كۇندە دە, بۇگىن بۇيىرماعان التىن جۇلدە ساپپورو نەمەسە پحەنچحان مۇز ايدىنىندا الدىمىزدان جارقىراپ شىعار دەگەنگە سەنگىمىز-اق كەلەدى. مۇمكىندىگىنەن الدەقايدا تومەن ونەر كورسەتكەندەر قاتارىندا جەلاياق كونكيشىلەرىمىزدىڭ دە بولعانى انىق. اسىرەسە, ەرلەر قۇراما كومانداسىنىڭ كوشباسشىسى رومان كەرچتىڭ كورسەتكىشى كوڭىل كونشىتپەدى. قىزدار اراسىنداعى شاشاسىنا شاڭ جۇقتىرمايدى دەگەن جەلاياق كونكيشىمىز ەكاتەرينا ايدوۆا دا شابان جۇگىردى. البەتتە, بۇل جەردە اۋا رايىنىڭ قولايسىز بولىپ, ايگىلى «مەدەۋ» مۇزىنىڭ ادەتتەگىدەي جالتىراپ جاتپاعانىن العا تارتۋعا بولار. دەگەنمەن, كونكيشىلەر كومانداسىن ورگە سۇيرەپ جۇرگەن بۇل سپورتشىلارعا الداعى ۋاقىتتا ارتىلار جاۋاپكەرشىلىكتىڭ جۇگى تىم اۋىر بولماعىن ايتا كەتكەن ءجون. فريستايل-اكروباتيكا سپورتىنىڭ شەبەرلەرى باعلان ىڭكاربەك, جانبوتا الدابەرگەنوۆا جانە جىبەك اراپباەۆانىڭ دا بارىنشا ءساتتى ونەر كورسەتۋلەرىنە بولۋشى ەدى. جۇپتاسىپ سەكىرۋدەگى جالعىز التىن جۇلدە مۇنداي تاجىريبەلى سپورتشىلار ءۇشىن ازدىق ەتتى دەگەن وي دا قىلاڭ بەرەدى. ەرلەر اراسىنداعى حوككەي قۇراماسىنىڭ اقىرعى ساتتە التىن جۇلدەدەن ايىرىلىپ قالعانى دا ءبىز ءۇشىن ورنى تولماس وكىنىش بولدى. ال حوككەيشى قىزدارىمىزدىڭ ونەرى ءتىپتى دە سىن كوتەرمەدى. ەڭسە تىكتەمەسە, بولمايتىن ءتۇرى بار. دەگەنمەن, ۋىستان سۋسىپ كەتكەن جۇلدەنى ەمەس, ۋىستاپ العان مەدالداردى ەسەپكە الار بولساق, وسىمەن 28-ءشى رەت الاۋ جاعىپ, جالاۋ جەلبىرەتكەن ۋنيۆەرسيادا قاي جاعىنان الىپ قاراساق تا, قازاق ەلى ءۇشىن قۇتتى-قايىرلى بولدى. الدىمىزداعى دودالى جارىستاردا دا مەرەيىمىز ءدال وسىلاي مارتەبەلى بولساشى دەپ تىلەدىك! قايرات ءابىلدينوۆ, «ەگەمەن قازاقستان» استانا
