«تەمىرلان» نە ءۇشىن جىل تاڭداۋى اتاندى؟

ارينە, بۇل كىتاپتى ەل تاريحىن تەرەڭ تانىپ, دۇنيەتانىمىن كەڭەيتكىسى كەلگەندەردىڭ وقىعانى نەمەسە قىزىعا قولعا الارى انىق. دەگەنمەن, ۇلگى ەتەرلىك باستامانىڭ ورتا جولدا قالماي, ناتيجەلى داستۇرگە اينالعانى قۋانتادى. ايتىپ وتىرعانىمىز – «ءبىر ولكە – ءبىر كىتاپ» وبلىستىق اكتسياسى. بۇل وسىدان ءۇش جىل بۇرىن, بۇگىندە شىمكەنتتەگى وتىرار عىلىمي-امبەباپ كىتاپحاناسىنىڭ ديرەكتورى كۇليا ايداربەكوۆانىڭ وبلىستىق مادەنيەت باسقارماسىنىڭ تىزگىنىن ۇستاعان كەزدەگى يگى باستامالارىنىڭ ءبىرى بولاتىن. «ءبىر ولكە – ءبىر كىتاپ» وبلىستىق اكتسياسىنىڭ 2017 جىلعى تاڭداۋى جۋىردا انىقتالدى. جازۋشىلار, ءبىر توپ زيالى قاۋىم وكىلدەرى, تىلدەردى وقىتۋ جانە دامىتۋ سالاسىنىڭ قىزمەتكەرلەرى, كىتاپحاناشىلار, وقىرماندار باسقوسىپ, پىكىر الىسا كەلە, 2017 جىلى ولكەمىزدە ورتاقتاسا وقيتىن كىتاپ – جازۋشى, حالىقارالىق الاش سىيلىعىنىڭ يەگەرى ەركىنبەك تۇرىسوۆتىڭ «تەمىرلان» كىتابى دەپ بەلگىلەدى. وسى ارادا ايتا كەتەلىك, 2014 جىلى – س. ەرۋباەۆتىڭ «مەنىڭ قۇرداستارىم» رومانى, 2015 جىلى – اڭگىمە جانرىنىڭ حاس شەبەرى ت. الىمقۇلوۆتىڭ «تەلقوڭىر» اڭگىمەسى, 2016 جىلى حالىق اقىنى قازانعاپ بايبول ۇلىنىڭ كىتاپتارى تاڭدالعان بولاتىن. جازۋشى ەركىنبەك تۇرىسوۆتىڭ «تەمىرلان» تاريحي رومانىندا الەمگە ايان ورتا عاسىر ءامىرى اقساق تەمىردىڭ اياقتالماعان اقىرعى جورىعى تۇسىندا, بۇگىنگى ورتالىق ازيا مەن يران, وڭتۇستىك قازاقستان جەرىندەگى جاعداي باياندالادى. بۇدان التى عاسىر بۇرىن وتكەن وقيعالار جايىنداعى تاريحي دەرەك, ەل ىشىندە ساقتالعان اڭىزدار نەگىزىندە اۆتور جيھانگەر پاديشاھتىڭ تۇلعاسىن جانە ونى قورشاعان ورتانىڭ تىرشىلىك-تىنىسىن سۋرەتتەيدى. تۇركىستان شاھارى تۇركى الەمىنىڭ 2017 جىلعى مادەني استاناسى بولىپ جاريالانعان تۇستا بۇل ادەبي ەڭبەكتىڭ تانىمدىق قۇنى ارتا تۇسەرى انىق. قازاقستان رەسپۋبليكاسىنا ەڭبەگى سىڭگەن قايراتكەر, حالىقارالىق «الاش» ادەبي سىيلىعىنىڭ لاۋرەاتى, جازۋشى ەركىنبەك تۇرىسوۆتىڭ جەكە مۋزەي-كابينەتى بار. وتىرار عىلىمي-امبەباپ كىتاپحاناسىندا. بۇل جازۋشىنىڭ ەڭبەگى باعالانىپ, جاسالعان قامقورلىقتىڭ ءبىرى بولسا كەرەك. جۋىردا وندا جازۋشىنىڭ بەس تومدىق تاريحي-كوركەم شىعارمالارى مەن «ماڭگىلىك سارىن», «بايدىبەك» اتتى تاعىلىمعا تولى كىتاپتارىنىڭ تۇساۋكەسەرىنە وراي كەزدەسۋ كەشى بولىپ ءوتتى. عالىمجان ەلشىباي, «ەگەمەن قازاقستان» شىمكەنت