بياتلوننان قازاقستان قۇراماسى دوپينگ قولداندى دەگەن كۇدىككە ءىلىندى

اۆستريادا ءوتىپ جاتقان بياتلوننان الەم بىرىنشىلىگى كەزىندە قازاقستان قۇراماسى دوپينگ قولداندى دەگەن كۇدىككە ءىلىندى, دەپ حابارلايدى vesti.kz. جەرگىلىكتى جانارماي قۇيۋ بەكەتتەرىنىڭ بىرىندە بەلگىسىز سپورتشىلار مەديتسينالىق قالدىقتار سالىنعان قوراپتار مەن جارىس قۇجاتتارىن تاستاپ كەتكەن. اۆستريانىڭ دوپينگكە قارسى ۇلتتىق ورتالىعىنىڭ جۇرگىزگەن ساراپتاماسىنىڭ ناتيجەسىندە اتالمىش قوراپتار مەن قۇجاتتار قازاقستان دەلەگاتسياسىنا تيەسىلى ەكەندىگى انىقتالدى. وسىعان بايلانىستى, جەرگىلىكتى 30-عا جۋىق پوليتسيا وكىلدەرى قازاقستان دەلەگاتسياسىن تەكسەرىپ, ءار ءتۇرلى مەديتسينالىق قۇرالدار مەن ۇيالى تەلەفونداردى تاركىلەگەن. ارتىنشا قازاقستان قۇراماسىنىڭ بارلىق سپورتشىلارىنان قان-سىنامالارى الىندى. «ءبىز وزىمىزگە 100 پايىزعا سەنىمدىمىز. ارىمىز تازا. جاعدايدى تۇسىندىرمەستەن الىپ كەتتى. مۇمكىن جاتتىقتىرۋشىلارعا ءمان-جايدى تۇسىندىرگەن بولار. ازىرگە ءبىز ەشنارسە بىلمەيمىز», - دەيدى قازاقستاندىق شاڭعىشى ولگا پولتورانينا. «اۆستريا فەدەرالدىق پوليتسياسىنىڭ ءباسپاسوز ءماسليحاتىندا مالىمدەگەندەي, انتحولتس ماڭىندا مەديتسينالىق ءدارى-دارمەكتەردىڭ قالدىقتارى بار قوراپتار تابىلعان. ءدال سول جەردەن قازاقستان قۇراماسى دارىگەرىنىڭ اككرەديتاتسياسى تابىلدى. كەشە قوناق ۇيدە ءبىزدىڭ كوماندانى ءتىنتىپ شىقتى. دارىگەردىڭ مەديتسينالىق ءدارى-دارمەكتەرى تاركىلەندى. بىراق, بىزدە بارلىق زاتتىڭ رۇقساتى بار. سونداي-اق, پوليتسيا تابىلعان زاتتاردىڭ تەكسەرىلىپ جاتقاندىعىن مالىمدەدى. ولاردىڭ تىيىم سالىنعاندىعى نەمەسە جوقتىعىن ساراپتاما كورسەتەدى. ءبىزدىڭ كوماندا دوپينگ جانە دنك تەستىن تاپسىردى. ەندى ساراپتاما ناتيجەسىن كۇتىپ وتىرمىز. اۆستريانىڭ دوپينگ اگەنتتىگى قوراپتاردا تابىلعان ءدارى-دارمەكتەردىڭ ساراپتاماسىن الدى», - دەدى قر بياتلون فەدەراتسياسىنىڭ باس حاتشىسى ماناس ۇسەنوۆ.