برەنت ماركاسى مۇناي نارىعىنان شىعىپ قالۋى مۇمكىن

الەم نارىعى الداعى جىلدارى مۇنايدىڭ باسقا ماركاسىنا كوشۋى ىقتيمال, دەيدى "الپاري" ساراپشىسى رومان تكاچۋك. "بىرنەشە جىلدان بەرى "مۇناي" مەن "برەنت" ءبىر ۇعىم رەتىندە پايدالانىلىپ كەلدى. مۇناي نارىعىنداعى كوپتەگەن كەلىسسوزدەر نەگىزىنەن برەنت ماركاسىمەن جاسالدى. قارا التىننىڭ باسقا سۇرىپتارى, رەسەيدىڭ Urals ماركاسى, اقش-تىڭ WTI-ى, ساۋد ارابياسىنىڭ Arab Light جانە يراكتىڭ Basra Light سۇرىپتارىنىڭ باعاسى برەنت باعاسىنا قاراي بەلگىلەندى. جالپى, برەنت ءسوزى وسى ماركالى مۇناي شىعاتىن كەن ورىندارىنىڭ اتىنا قويىلعان. Broom, Rannoch, Etive, Ness جانە Tarbert كەن ورىندارىنان شىققاندىقتان, مۇنايدىڭ بۇل سۇرىپىن برەنت دەپ اتاعان. ال مۇناي نارىعىندا باسقالارعا قاراعاندا باعالى بولۋى جەتكىزۋدىڭ تۇراقتىلىعى مەن شيكىزاتتىڭ پايىزدىق ۇلەسىنىڭ از بولۋىنا بايلانىستى", - دەيدى ساراپشى. الايدا, ساراپشىنىڭ پىكىرىنشە, جاعداي ءالى وزگەرۋى مۇمكىن. 70 جىلدارى بۇل ماركانىڭ ءوندىرىسى تاۋلىگىنە 900 مىڭ باررەل بولسا, قازىر بۇل كورسەتكىش ەكى ەسەگە ازايدى. تاياۋدا Shell كومپانياسى برەنت كەن ورىندارىنان ءوندىرىستى الىپ تاستاۋ تۋرالى باستاما كوتەردى. بۇل ءۇردىس الداعى ون جىلعا دەيىن سوزىلۋى مۇمكىن, دەگەنمەن, برەنت باعاسىنا بۇل قازىردەن كەرى اسەر ەتپەك. «سول سەبەپتى الەم نارىعى وزگە مۇناي ماركاسىنا اۋىسپاق. ال قازىرگى جاعدايدا امەريكالىق WTI (West Texas Intermediate نەمەسە light sweet) ماركاسىنىڭ ءباسى جوعارى. حيميالىق قۇرامى جاعىنان ول برەنتكە ۇقساس جانە ينۆەستورلارعا بۇرىننان تانىس», — دەيدى رومان تكاچۋك.