26-باپقا ەنگىزىلەتىن وزگەرىستەردىڭ جەرگە قاتىسى جوق - ساراپشى

استانادا رەسپۋبليكالىق نوتارياتتىق پالاتانىڭ ۇيىمداستىرۋىمەن  قازاقستان رەسپۋبليكاسى كونستيتۋتسياسىنىڭ 26-بابىنا ارنالعان دوڭگەلەك ۇستەل ءوتتى. وعان باس پروكۋراتۋرا, ادىلەت مينيسترلىگى, «اتامەكەن» ۇلتتىق كاسىپكەرلەر پالاتاسى, «قازاقستاندىق زاڭگەرلەر وداعى» رەسپۋبليكالىق قوعامدىق بىرلەستىگىنىڭ وكىلدەرى مەن عالىمدار قاتىستى. جيىندا زاڭگەرلەر كونستيتۋتسيالىق رەفورمانى جان-جاقتى سارالاپ, ءوز وي-پىكىرلەرىن ءبىلدىردى. وندا ماماندار سوڭعى كەزدە حالىق اراسىندا داۋ تۋعىزعان اتا زاڭىمىزدىڭ 26-بابىنا وزگەرىستەردى ەنگىزۋدى قولدايتىندارىن, ويتكەنى, حالىقارالىق نورمالارعا سايكەس, كەز-كەلگەن ەلدىڭ ازاماتى شەتەلدە مەنشىك يەسى بولۋعا تولىق قاقىسى بار ەكەنىن ايتتى. مىسالى, قازاقستان رەسپۋبليكاسى پرەزيدەنتى جانىنداعى ادام قۇقىقتارى جونىندەگى كوميسسيانىڭ ساراپشىلار كەڭەسى توراعاسىنىڭ ورىنباسارى مارات باشيروۆ بۇكىل الەمدە شەتەل ازاماتتارى جەر-ءجۇزىنىڭ قاي تۇكپىرىندە بولسىن م ۇلىكتى جەكەشەندىرىلە الاتىنىن, وعان ءبىزدىڭ وتانداستارىمىزدىڭ دا قاقى بار ەكەنىن جەتكىزدى. –جاسىراتىنى جوق, ەلىمىز تاۋەلسىزدىك العان كەزدە  وسى ماسەلە كونستيتۋتسياعا جازىلماي قالدى. قازىر اتا زاڭىمىزدىڭ 26-بابىنا وزگەرىستەر ەنگىزسەك, قازاقستاندا تۇراتىن بارلىق ادامدار ءوزى قالاعان دۇنيەنىڭ ءبارىن جەكەمەنشىككە الۋىنا بولادى.  الايدا, شەتەل ازاماتتارى جەردى ەشقاشان جەكەشەلەندىرە المايدى. وعان جەر كودەكسى بويىنشا قاقى جوق. جەر تەك قازاقستان ازاماتتارىنا عانا بەرىلەدى. ەگەر ءبىز 26-باپقا وزگەرىستەر ەنگىزسەك, شەتەلدىكتەرگە بيزنەستى دامىتۋعا, ەلىمىزگە ينۆەستيتسيا تارتۋعا مۇمكىندىك بەرەتىن ەدىك. سوندىقتان مەن كونستيتۋتسياعا وزگەرىستەر ەنگىزۋدى قولدايمىن, – دەدى ول. كەزدەسۋدە رەسپۋبليكالىق نوتارياتتىق پالاتانىڭ ءتورايىمى اسەل ءجانابىلوۆا, زاڭگەرلەر ليۋدميلا كۋتەنكو مەن ولەگ پولۋموردۆينوۆ قولدانىستاعى اتا زاڭعا وزگەرىستەردىڭ ەنگىزىلۋىنە ەش قارسى ەمەستىگىن, شەتەلدەردە اۋىل شارۋاشىلىعىنا ارنالعان جەرلەردىڭ 40 پايىزدان استامى جەكەمەنشىككە بەرىلەتىنىن, ال ءبىزدىڭ ەلدە جەر ساتىلماسا دا باسقا جىلجىمايتىن م ۇلىكتەر مەن ءوندىرىس ورىندارى جەكەمەنشىككە بەرىلسە ودان مەملەكەت تەك قانا پايدا تاباتىنىن مالىمدەدى. دوڭگەلەك ۇستەلدە ماماندار مەنشىك قۇقىعىنىڭ كەپىلدىگىن ودان ءارى نىعايتۋ ءۇشىن ۇسىنىستارىن ايتىپ,  جۇمىس توبىنا جولدادى. داستان كەنجالين, «ەگەمەن قازاقستان»