بەردىبەك ساپارباەۆ اقتوبە ءدارىحانالارىن جاسىرىن ارالاپ, باعالاردى كورگەنىن ايتتى

اقتوبە وبلىسىنىڭ اكىمى بەردىبەك ساپارباەۆ باعالاردى ءبىلۋ ءۇشىن قالا ءدارىحانالارىن زەينەتكەر كەيپىندە ارالادى. ساتۋشىلار ايماق باسشىسىن تانىماعان. اكىم دارىلەردىڭ باعاسىن كورىپ جۇرەگى ۇستاپ قالا جازداعانىن ايتتى. بۇل تۋرالى tengrinews.kz حابارلايدى. ايماقتاعى مەديتسينالىق مەكەمەلەردىڭ ەسەبىن تىڭداعان بەردىبەك ساپارباەۆ جاسالىپ جاتقان جۇمىستارعا كوڭىلى تولمايتىنىن ءبىلدىردى. وبلىس جەتەكشىسى اسىرەسە مەديتسينالىق جانە فارماتسەۆتيكالىق ىستەر كوميتەتى باسشىسىنىڭ دارىلەردىڭ باعاسى رەتتەلگەنى تۋرالى سوزىنە ىزا بولدى. «نەگە وتىرىك ايتاسىز؟ ەشقانداي دا تومەن باعا جوق, مەن ءوزىم تەكسەردىم, ءدارىحانالاردى ارالادىم. ءبىر پايىز دا ارزانداۋ جوق. مۇمكىن, ءسىزدىڭ ءوزىڭىز باراتىن ءدارىحانا بار شىعار. مەن قاراپايىم ساتىپ الۋشى رەتىندە تەكسەردىم. باعالاردى كورىپ جۇرەگىم ۇستاپ قالا جازدادى. ءار ءدارىحانادا قىمبات باعالار تۋرالى شاعىمدانۋعا ارنالعان تەلەفون بولۋى ءتيىس. كەي اۋدانداردا باعا ەكى ەسە ءوسىپ كەتكەن. سوندىقتان ادامدار اۋداننان اقتوبەگە كەلۋگە ءماجبۇر. دارىگە جەتەم دەگەنشە, ادام ءولىپ كەتۋى مۇمكىن, قۇداي ساقتاسىن» دەدى ساپارباەۆ. ايماق باسشىسى شەنەۋنىكتەردىڭ ءدارىحانالاردى وزدەرى ارالاپ, فارماتسەۆتەردىڭ قابىلدانعان مەموراندۋم شارتتارىن قالاي ورىنداپ جاتقانىن تەكسەرمەيتىنىن ايتتى. ساپارباەۆ اقتوبەدە دارىلەردى تومەندەتىلگەن باعامەن ساتاتىن ارنايى ءدارىحانا اشۋ ماسەلەسىن قاراستىرۋدى ۇسىندى.