مۇناي ءوندىرۋ, قايتا وڭدەۋ كولەمىن ارتتىرۋ قاجەت - نازارباەۆ

بۇگىن مەملەكەت باسشىسى نۇرسۇلتان نازارباەۆ ەنەرگەتيكا ءمينيسترى قانات بوزىمباەۆتى قابىلدادى. ۆەدومستۆو باسشىسى پرەزيدەنتكە ەنەرگەتيكا سالاسىن دامىتۋدىڭ باستى كورسەتكىشتەرى جانە وسى سەكتورداعى جوبالاردى ودان ءارى جاڭعىرتۋ جوسپارلارى تۋرالى باياندادى, دەپ حابارلايدى اقوردانىڭ رەسمي سايتى. كەزدەسۋ بارىسىندا ەلباسى ەنەرگەتيكالىق شيكىزات ءوندىرۋ جانە قايتا وڭدەۋ سالاسىنداعى جوبالاردى ىسكە اسىرۋ قاجەتتىگىنە نازار اۋداردى. "قاشاعاندا مۇناي ءوندىرۋ جۇمىستارى باستالدى. تەڭىز كەن ورنىنىڭ اياسىن كەڭەيتۋ تۋرالى شەشىم قابىلداندى. سونىمەن قاتار, قاراشىعاناققا قاتىستى ماسەلە شەشىمىن تاپتى. وسىعان بايلانىستى مۇناي ءوندىرۋ جانە ونى قايتا وڭدەۋ كولەمىن ارتتىرۋ قاجەت. بۇل ءۇشىن ءبىز مۇناي وڭدەيتىن ءۇش زاۋىتتى قايتا جاڭعىرتىپ جاتىرمىز," – دەدى نۇرسۇلتان نازارباەۆ. سونداي-اق, قازاقستان پرەزيدەنتى گاز ءوندىرۋ, ەلدى گازداندىرۋ جۇمىستارىن جۇرگىزۋدىڭ, بالقاش جىلۋ ەلەكتر ستانساسىنىڭ قۇرىلىسىنا قاتىستى ماسەلەلەردى شەشۋدىڭ, سونداي-اق ەنەرگەتيكا سالاسىنداعى نىسانداردى جەكەشەلەندىرۋدىڭ ماڭىزدىلىعىن اتاپ ءوتتى. ەنەرگەتيكا ءمينيسترى ەنەرگيا رەسۋرستارىن ءوندىرۋ جونىندەگى جوسپاردىڭ جەكەلەگەن كورسەتكىشتەر بويىنشا ارتىعىمەن ورىندالعانى, سونداي-اق 2016 جىلدىڭ قورىتىندىسى بويىنشا مۇناي ەكسپورتى ارتقانى تۋرالى حابارلادى. "مۇنايدى ءوندىرۋ جوسپارى 75,5 ميلليون توننا بولسا, وندىرىلگەن مۇنايدىڭ ناقتى كولەمى 78 ميلليون تونناعا جەتتى. قاشاعانداعى مۇناي ءوندىرىسى ەسەبىنەن جوسپاردىڭ ارتىعىمەن ورىندالعانى بايقالادى, وندا بىلتىر 1 ميلليون تونناعا جۋىق مۇناي الىندى. مۇناي ەكسپورتىن 62 ميلليون تونناعا دەيىن ارتتىردىق, ونىڭ 40 ميلليون تونناسى كاسپي قۇبىر كونسورتسيۋمى ارقىلى تاسىمالداندى. مەملەكەت قولداۋىنىڭ ارقاسىندا العاش رەت 325 مىڭ توننا بيتۋم قايتا وڭدەلدى. سۇيىق گاز ءوندىرىسىنىڭ كولەمى 136 تونناعا ارتتى," – دەدى ق.بوزىمباەۆ. سونىمەن بىرگە ەنەرگەتيكا ءمينيسترى مەملەكەت باسشىسىنا وندىرۋشىلەر مەن ترەيدەرلەر اراسىنداعى كەلىسىم ناتيجەسىندە اۆتوجۇرگىزۋشىلەر قاجەتتىلىگى ءۇشىن جەتكىزىلەتىن سۇيىق گاز كولەمىن ارتتىرۋ, ەلەكتر ەنەرگياسىن ەكسپورتتاۋ جاعدايى, گەولوگيالىق بارلاۋ جۇمىستارىن كۇشەيتۋ جونىندەگى جوسپارلار, سونداي-اق تۇتىنۋ نارىعىنداعى كۇردەلى كونيۋنكتۋراعا بايلانىستى ۋران ءوندىرۋ كولەمىن ازايتۋ پرەسپەكتيۆالارى تۋرالى باياندادى. ەلباسى كەزدەسۋ قورىتىندىسى بويىنشا بىرقاتار ناقتى تاپسىرما بەردى.