2017 جىلى بارلىق اۋدان ورتالىقتارى 4G جەلىسىمەن قامتىلادى

2016 جىلى قازىرگى زامانعى تەلەكوممۋنيكاتسيالىق ينفراقۇرىلىمدى قۇرۋ قورىتىندىسىندا ينتەرنەت قولدانۋشىلارىنىڭ سانى 72,9 پايىزعا جەتتى. بۇل تۋرالى اقپارات جانە كوممۋنيكاتسيا ءمينيسترى داۋرەن اباەۆ اقپارات جانە كوممۋنيكاتسيا مينيسترلىگىنىڭ كەڭەيتىلگەن وتىرىسىندا ايتتى. ءمينيستردىڭ ايتۋىنشا, بۇل كورسەتكىش قازاقستاندى جاھاندىق باسەكەلەستىكتىڭ يندەكسى رەيتينگىسىندە 41-ءشى ورىنعا شىعارعان. سونىمەن قاتار مينيستر 3G جانە 4G جەلىلەرى بەلسەندى دامىپ جاتقانىنا توقتالدى. «بەلسەندى تۇردە 3G جانە 4G جەلىلەرى دامۋدا. ولاردىڭ سانى 14,2 ملن-عا جەتتى. 2017 جىلدىڭ سوڭىنا تامان 4G جەلىسىمەن بارلىق اۋدان ورتالىقتارىن قامتۋ جوسپارلانىپ وتىر.  2016 جىلى رەسپۋبليكالىق بيۋدجەتكە  72 ملرد تەڭگە راديوجيىلىك سالاسى بويىنشا كىرىس ءتۇستى», - دەدى اباەۆ. ول ايتىپ وتكەندەي, قالا مەن اۋىل اراسىنداعى «تسيفرلىق تەڭسىزدىكتى» تومەندەتۋ ماقساتىندا مينيسترلىك 2020 جىلعا دەيىن ءمجا اياسىندا 2 ملن تۇراتىن 3 مىڭ اۋىلدى وپتيكالىق-تالشىقتى بايلانىس جەلىسىمەن قامتۋدى جوسپارلاپ وتىر.