ۋنيۆەرسيادا ويىندارىندا ەڭ جوعارى سىياقىنى كىم الادى؟

ستۋدەنتتەر اراسىنداعى باسەكەنىڭ باستالار الدىندا قر مادەنيەت جانە سپورت ءمينيسترى ارىستانبەك مۇحامەدي ۇلى ۋنيۆەرسيادادا توپ جارعان سپورتشىلار 4,9 ميلليون, كۇمىس جۇلدەگەرلەر 3,3 ميلليون, ال قولا جۇلدە العاندار 1,6 ميلليون تەڭگە كولەمىندە سىياقى الاتىنىن ايتتى. سونىمەن قاتار, شاكىرتتەرى جۇلدەگەرلەر قاتارىنا ىلىككەن باپكەرلەر دە قۇر قول قالمايتىنىن جەتكىزگەن. ۋنيۆەرسيادا ويىندارىندا قازاقستان قۇراماسى 11 التىن, 8 كۇمىس جانە 17 قولا, جالپى سانى 36 جۇلدە جەڭىپ الدى. ءسويتىپ كوماندالىق ەسەپتە تەك رەسەيدى العا جىبەرىپ, ەكىنشى ورىنعا تۇراقتادى. التىن مەدال جەڭىپ العان سپورتشىلار ءۇشىن 63 ميلليون 700 مىڭ تەڭگە, كۇمىس مەدال العان سپورتشىلار ءۇشىن 125 ميلليون 400 مىڭ تەڭگە, قولا جۇلدەگەرلەر ءۇشىن 40 ميلليون تەڭگە مەملەكەت قازىناسىنان بولىنەتىن بولادى. Vesti.kz مالىمەتى بويىنشا, سپورتشىلار ءۇشىن 229 ميلليون 100 مىڭ تەڭگە تولەنەدى. ءدال وسىنداي كولەمدە جاتتىقتىرۋشىلارى دا سىياقى الادى. بارلىعىن قوسا ەسەپتەگەندە مەملەكەت تاراپىنان سىياقىعا 458 ميلليون 200 مىڭ تەڭگە بولىنەتىن بولادى. ۋنيۆەرسيادا ويىندارىندا قازاقستاندىق سپورتشىلار اراسىندا ەڭ كوپ سىياقىنى گالينا ۆيشنەۆسكايا الادى. بۇل سپورتشىنىڭ ۋنيۆەرسيادا ويىندارىنداعى سىياقىسى (ەكى التىن, ەكى كۇمىس) 16 ميلليون 400 مىڭ تەڭگەنى قۇرايدى. وسى مولشەر بويىنشا ەكىنشى ورىندا اننا شەۆشەنكو. ول 13 ميلليون الادى. شاڭعىشىمىز باسەكە بارىسىندا ءبىر التىن, ءبىر كۇمىس جانە ەكى قولا جەڭىپ الدى. فريستايلشى دميتري رەيحارد پەن يۋليا گالىشەۆالاردىڭ سىياقىسى – 9 ميلليون 800 مىڭ تەڭگە. بۇل ەكى سپورتشى ۋنيۆەرسيادادا ەكى التىن العان.