1 ناۋرىزدان باستاپ ەسكى 1000 تەڭگەلىكتەر اينالىمنان الىنىپ تاستالادى

قازاقستان رەسپۋبليكاسىنىڭ ۇلتتىق بانكى 2017 جىلعى 1 ناۋرىزدان باستاپ 2006 جىلعى ۇلگىدەگى نومينالى 1000 تەڭگەلىك بانكنوتتاردىڭ اينالىستا بولۋىن اياقتايتىنىن جانە تولەم قۇرالى بولۋىن توقتاتاتىنىن ەسكە سالادى, دەپ حابارلايدى ۇلتتىق بانك. اتالعان كۇنگە دەيىن بۇل بانكنوتتار زاڭدى تولەم قۇرالى بولىپ تابىلادى جانە قازاقستان رەسپۋبليكاسىنىڭ بۇكىل اۋماعىندا تولەمدەر جانە بانك وپەراتسيالارى ءۇشىن قانداي دا بولماسىن شەكتەۋسىز پايدالانىلادى. 2006 جىلعى ۇلگىدەگى نومينالى 1000 تەڭگەلىك بانكنوتتاردى ۇلتتىق بانكتىڭ بارلىق فيليالدارىندا ولاردىڭ اينالىستا بولۋىنىڭ اياقتالۋ كۇنىن كۇتپەي ايىرباستاۋعا بولادى. ودان كەيىن 12 اي ىشىندە – 2017 جىلعى 1 ناۋرىز – 2018 جىلعى 28 اقپان ارالىعىندا قوسا العاندا – كورسەتىلگەن بانكنوتتار كەز كەلگەن ەكىنشى دەڭگەيدەگى بانكتە ايىرباستالادى. قر ۇلتتىق بانكىنىڭ بارلىق فيليالدارىندا 2006 جىلعى ۇلگىدەگى نومينالى 1000 تەڭگەلىك بانكنوتتار ايىرباستاۋ ءۇشىن 2021 جىلعى 28 اقپانعا دەيىن قابىلدانادى. ۇلتتىق بانك فيليالدارى بۇل بانكنوتتاردى كوميسسيا الماي ايىرباستايدى. بۇل رەتتە ۇلتتىق بانك زاڭدى تولەم قۇرالى بولىپ تابىلاتىن نومينالى 1000 تەڭگەلىك ەسكەرتكىش بانكنوتتاردىڭ اينالىستا ەكەندىگىن حابارلايدى. قازاقستان رەسپۋبليكاسىنىڭ اكىمشىلىك قۇقىق بۇزۋشىلىق تۋرالى كودەكسىنە سايكەس اينالىستاعى بانكنوتتاردى قابىلداۋدان باس تارتۋ شاعىن كاسiپكەرلiك سۋبەكتiلەرiنە نەمەسە كوممەرتسيالىق ەمەس ۇيىمدارعا – بەس, ورتا كاسiپكەرلiك سۋبەكتiلەرiنە – ون, iرi كاسiپكەرلiك سۋبەكتiلەرiنە جيىرما بەس ايلىق ەسەپتiك كورسەتكiش مولشەرiندە ايىپپۇل سالۋعا اكەپ سوعادى. بانكتەردىڭ جانە بانك وپەراتسيالارىنىڭ جەكەلەگەن تۇرلەرiن جۇزەگە اسىراتىن ۇيىمداردىڭ بانكنوتتاردى قابىلداۋدان, ۇساقتاۋدان جانە ايىرباستاۋدان باس تارتۋى ەلۋ ايلىق ەسەپتiك كورسەتكiش مولشەرiندە ايىپپۇل سالۋعا اكەپ سوعادى. سۇراقتار تۋىنداعان جاعدايدا قارجىلىق قىزمەتتەردى تۇتىنۋشىلاردىڭ قۇقىقتارىن قورعاۋ جانە سىرتقى كوممۋنيكاتسيالار باسقارماسىنا +7 (727) 2788 058, 2619-234, 2704-585 تەلەفوندارى بويىنشا جانە قولما-قول اقشامەن جۇمىس جۇرگىزۋ باسقارماسىنا +7 (727) 2704-569 تەلەفونى بويىنشا حابارلاسۋعا بولادى.