«مەن سەنى ساعىنعاندا...»

«مەنىڭ نازىك جانىمدى كىم تۇسىنەر» دەپ كەتكەن مۇقاعالي ماقاتاەۆتىڭ بولمىسىن تەرەڭ تانىعان فاريزا اپامىز اقىن ومىردەن وتكەندە «جارالى ءجۇ­رەگىمدى جارعا سوعام, ور­نىڭدى ەش تۇلعامەن تولتىرا الماي» دەپ, ارتىنان «ول ەندى سۇڭقار جىردىڭ قاناتىندا, كوك تەڭبىل پلانەتانى ارالايدى» دەگەن ەكەن. شىنىندا, مۇقاعالي قازىر حالىقتىق اقىنعا اينالدى. اسىرەسە, ءوزى عاسىرلار كو­شىندە جاستاردىڭ زامانداسى بولامىن دەگەنى بۇلجىماي كەلىپ, قازىر تولقىن-تولقىن ۇرپاقتىڭ سىر­لاسىنا اينالدى. وتكەن سەنبى كۇنى ەلورداداعى رايىمبەك باتىر اتىنداعى №50 «قازعارىش» مەكتەپ-ليتسەيىندە اقىننىڭ تۋعان كۇنىنە وراي «مەن سەنى ساعىنعاندا...» دەگەن اتپەن ادەمى كەش ءوتتى. كەش­تى ءبىلىم ورداسىنىڭ باسشىسى روزا بولاتاەۆا اشىپ, اقىننىڭ ءومىر جولىنا, ولەڭ ورنەكتەرىنە توقتالدى. بۇدان كەيىن وقۋشىلار مۇقاعاليدىڭ ولەڭدەرىن وقىپ, جينالعانداردى كۇي كۇمبىرىنە بولەپ, بي ىرعاعىمەن تەربەدى. ۇستازدار قاۋىمى «قوش, ماحاببات!» اتتى دراماسىنداعى جاستارعا قاجەت تۇراقتىلىق پەن ادالدىقتى باياندايتىن ساتتەردى ادەمى كورىنىستەرمەن العا تارتتى. جالپى, وركەنيەتتى ەلدەردە, ونىڭ ىشىندە كورشىمىز رەسەي حالقى ا.پۋشكيننەن باستاپ, ن.رۋبتسوۆقا دەيىنگى اتاقتى اقىن­دارىنىڭ تۋعان كۇنىن جىر الەمىنە اينالدىرىپ, بۇكىل ەل كولەمىندە اتاپ ءوتىپ جاتاتىنى بەلگىلى. سونداي ءۇردىس ءبىزدىڭ وتانىمىزدا دا قالىپتاسسا, ولەڭ دۇنيەسىندەگى الىپتارىمىزدى كەيىنگى ۇر­پاق تانىپ, ولاردىڭ رۋحاني قۇن­دىلىعىنان ءنار الىپ, ۇلتتىڭ جاقسىلارىن ارداق تۇتۋدى ۇيرەنەر ەدى. سونىمەن, ولەڭ مەن قارا ءسوزدى ۇشتاستىرعان مۇقا­عالي تۋىندىلارىن ءار قىرىنان كەلىپ تۇلەتۋگە مەكتەپ ديرەكتورىنىڭ ورىنباسارلارى ن.ىسقاقوۆا مەن ا.يمانباەۆانىڭ, سول سەكىل­دى كىتاپ­حانا مەڭگەرۋشىسى ا.جاق­سىلىقوۆانىڭ, قازاق ءتىلى ءپانىنىڭ مۇعالىمى گ.الدابەر­گەنو­ۆانىڭ كوپ ەڭبەك سىڭىرگەنىن اتاپ ايتۋعا بولادى. سۇلەيمەن مامەت, «ەگەمەن قازاقستان»