– مادىعالي ابدىعالي ۇلى, ۋنيۆەرسيادادا ونەر كورسەتكەن شاكىرتتەرىڭىزگە باعا بەرسەڭىز...
– كۇتكەن ناتيجەمىز ورىندالماسا دا, بارلىعى ويداعىداي دەپ ايتۋعا بولادى. سەبەبى, شورت-ترەكتە ميلليمەترلەر ءرول ويناپ كەتەتىنىن ەسكەرسەك, شاكىرتتەرىمنىڭ جەڭىپ العان مەدالى كوڭىلدى كونشىتەدى. ءبىزدىڭ نەگىزگى جوسپارىمىز – الەم كۋبوگى كەزەڭدەرىندە ءتاۋىر ناتيجە كورسەتىپ, الەم چەمپيوناتىنا جولدامانى كوبىرەك يەمدەنۋ. ءارى قاراي وليمپيادادان ولجالى ورالۋ. باستى ماقساتىمىز وسى.
– جانكۇيەرلەر سىزدەردەن التىن كۇتىپ ەدى...
– ءوزىم دە شاكىرتتەرىمنەن التىن كۇتتىم. الايدا, جاعداي باسقاشا ءوربىدى. مۇمكىن بولعان 8 التىننىڭ التاۋىن كورەيالىقتار, ەكەۋىن قىتايلىقتار جەڭىپ الدى. ولار مۇندا كىلەڭ مىقتىلارىن اكەلدى. ءسويتىپ, مىقتىلىعىن تاعى ءبىر دالەلدەدى.
– وسىنداي ناتيجەمەن وليمپيادادا جۇلدە الۋ وڭايعا سوقپايتىن سياقتى.
– وليمپيادا تۇعىرىنان كورىنۋ كەز كەلگەن سپورتشىنىڭ ارمانى ەمەس پە؟! ءبىز 2014 جىلى سوچي وليمپياداسىندا ۇزدىك بەستىكتەن كورىنگەننەن كەيىن, سوڭعى ەكى جىلدا نيدەرلاند ەلىنىڭ كونكيشىلەرىمەن تىعىز بايلانىس ورناتتىق. ياعني, ولارمەن بىرگە جاتتىعۋ جاساۋ مۇمكىندىگىنە يە بولدىق. العاشىندا گوللاندىقتار ەشكىممەن شەبەرلىك بولىسكىسى كەلمەيتىندىكتەرىن بىردەن ايتتى. الايدا, سپورت سالاسىنداعى باسشىلارىمىز جاقسى جۇمىس ىستەپ, كوزدەگەن ماقساتىمىزعا جەتۋگە بار جاعدايدى جاسادى. سودان كەيىن تاجىريبە جيناقتالا بەردى. قازىرگى دەڭگەيمەن سوچيدەگى دەڭگەيدى سالىستىرۋعا كەلمەيدى. سونداي ءبىرلەسكەن جاتتىعۋلاردىڭ ارقاسىندا اقش-تىڭ سولت-لەيك-سيتي قالاسىندا وتكەن الەم كۋبوگىندا ابزال اجىعاليەۆ 500 مەتر قىسقا قاشىقتىقتا چەمپيون اتاندى. كوماندالىق ەسەپتە دە جاقسى ءناتيجە كورسەتىپ, ءۇشىنشى ورىن الدىق.
– ابزال اجىعاليەۆتىڭ جەڭىسىنە سپورتتان حابارى بار جانداردىڭ بارلىعى قۋاندى دەسەك ارتىق ايتقانىمىز ەمەس. ابزال تۋرالى از-كەم ايتىپ بەرسەڭىز.
– كۋبوك الدىندا ابزالعا ەستافەتادا سەنىم ارتقان ەدىك. ال 1000 جانە 1500 مەتردە نۇربەرگەن جۇماعازيەۆتىڭ, 500 مەتردە دەنيس نيكيشانىڭ مۇمكىندىگى مول بولدى. كالگاري قالاسىندا وتكەن كۋبوكتىڭ العاشقى كەزەڭىندە نيكيشا فينالعا دەيىن جەتىپ, ءتورتىنشى ورىننان كورىندى. اجىعاليەۆ بولسا, ۇزدىك سەگىزدىككە كىردى. اراعا ءبىر اپتا سالىپ, سولت-لەيك-سيتيدە 54 سپورتشىنىڭ اراسىنان ابزالعا تەڭ كەلەر ەشكىم بولمادى. ول ءتورت كەزەڭدە دە (1/8 فينال, 1/4 فينال, 1/2 فينال جانە فينال) ءبىرىنشى كەلدى. سەنەسىز بە, ودان مۇنداي كورسەتكىشتى ەشكىم كۇتكەن جوق. كىشىگىرىم سەنساتسيا بولدى! ونىڭ مىقتىلىعى سول – قارسىلاسىنىڭ قاتەلىگىن كۇتىپ, ورايى كەلگەندە شابۋىلعا شىعادى. سونىڭ ارقاسىندا ول جەڭىسكە جەتتى. ونىڭ بۇل ءتاسىلى 5000 مەترلىك كوماندالىق ەستافەتادا كومەگىن تيگىزىپ, قولا مەدالعا يە بولدىق.
– سوندا اجىعاليەۆكە 500 مەتر قولايلى بولىپ تۇر عوي؟
– ءيا, 500 مەتر ونىڭ قاشىقتىعى, ال 5000 مەتردى شىدامدى جىگىتتەر عانا جىلدام جۇگىرىپ وتەدى. بۇل قاسيەت تە ونىڭ بويىنان تابىلادى.
– الەم كۋبوگى نەشە كەزەڭنەن تۇرادى؟
– كۋبوك التى كەزەڭگە دەيىن جالعاسادى. بەسىنشى كەزەڭ ارتتا قالدى. گەرمانيانىڭ درەزدەن قالاسىندا وتكەن سايىستا كوماندامىزدىڭ ەكىنشى قۇرامى ونەر كورسەتتى. بۇيىرتسا, سوڭعى كەزەڭنىڭ جالاۋى مينسك (بەلارۋس) قالاسىندا جەلبىرەيدى. ول جاققا نەگىزگى قۇرامداعى جىگىتتەرمەن بارامىز دەپ وتىرمىز.
– بۇل كۋبوك سىنى بىزگە نە بەرەدى؟
– الەم كۋبوگىنا ءبىر كوماندادان 6 ەر, 6 قىز بالانىڭ قاتىسۋعا مۇمكىندىگى بار. ال الەم جانە ازيا چەمپيوناتتارى, ازيا مەن ۋنيۆەرسيادا ويىندارىنا 10 (5-5) سپورتشىعا دەيىن قاتىسا الادى. الەم كۋبوگى كەزەڭدەرىندە كوماندالىق ەسەپتە ۇزدىك وندىققا كىرسەك, ناۋرىز ايىندا روتتەردامدا (گوللانديا) وتەتىن الەم چەمپيوناتىندا تولىق قۇرامدا ونەر كورسەتە الامىز.
– نەگىزگى قۇرامنىڭ ءىزىن باساتىن جاستارىمىزدىڭ جاعدايى قالاي؟
– بۇگىندە ەرلەر قۇراماسىنىڭ جاستارى ماقتاۋعا تۇرارلىق. ولار 2018 جىلدان كەيىن نەگىزگى قۇرامانىڭ مۇشەلەرى اتاناتىنى ءسوزسىز. سەبەبى, قازىردىڭ وزىندە جاقسى ناتيجە كورسەتىپ جۇرگەن جاقسىباەۆ, قاجىعالي, شامۇحانوۆ, عالياحمەتوۆ, سۇلەيمەنوۆ سىندى 18-20 جاستاعى سايدىڭ تاسىنداي ىرىكتەلگەن شاكىرتتەرىم بار.
– ال قىزدارىمىزدىڭ جاعدايى قالاي؟
– قىزداردىڭ كورسەتكەن ناتيجەسى كوڭىل كونشىتپەيدى. سوعان قاراماستان, ۋنيۆەرسيادادا قىزدار قۇراماسى كوماندالىق ەسەپتە ءۇشىنشى ورىن الدى. بۇل جامان كورسەتكىش ەمەس. كۇرامانى كۇشەيتۋ ءۇشىن وڭتۇستىك كورەيادان كيم ەنگ ا دەگەن سپورتشىنى شاقىردىق. ول ازيا چەمپيوناتتارىندا قاتىسىپ جۇرگەن تالانتتى قىز. 3000 مەتردە كورەيانىڭ چەمپيونى. سونداي-اق, كرەستوۆا, تيحونوۆا, ناگاي سەكىلدى ءتاۋىر ونەر كورسەتىپ جۇرگەن سپورتشىلارىمىز بار. بىراق, ولاردىڭ ءىزىن باساتىن جاستاردى دايىنداۋىمىز كەرەك.
– اڭگىمەڭىزگە راحمەت.
اڭگىمەلەسكەن الماس ماناپ, «ەگەمەن قازاقستان»
الماتى
