ەكسپو اۋماعىندا 40-تان استام تاماقتانۋ ورنى سالىنادى

ەكسپو- 2017 كورمەسىنە ارنالعان  جالپى تاماقتاندىرۋدى ۇيىمداستىرۋ جۇمىسى بايقاۋىنىڭ ارالىق ناتيجەسى جاريالاندى. "استانا ەكسپو-2017» ۇلتتىق كومپانياسىنىڭ كوممەرتسيالاندىرۋ دەپارتامەنتىنىڭ ديرەكتورى داۋلەت ەركىمباەۆ باق وكىلدەرىمەن كەزدەستى. دەپارتامەنت ديرەكتورى كورمەگە ارنالعان قوعامدىق تاماقتاندىرۋدى ۇيىمداستىرۋ بايقاۋىنىڭ ارالىق ناتيجەسىمەن تانىستىردى. «مەيرامحانا قىزمەت كورسەتۋ جۇمىستارىن ۇيىمداستىرۋ وسىنداي كەڭ اۋقىمدى ءىس-شارالاردىڭ قاجەتتى ءارى ماڭىزدى اسپەكتىسى. قىزمەت كورسەتۋ, ياعني سەرۆيس ءار مەملەكەتتەن كەلگەن تۇلعالار مەن كورمەگە قاتىسۋشى مەملەكەت دەلەگاتتارىنىڭ, سونىمەن قاتار, قالا قوناقتارى مەن تۇرعىندارىنىڭ ويىنان شىعۋى كەرەك. بۇگىنگى كۇنى 15-كە جۋىق مەملەكەت وزدەرىنىڭ ۇلتتىق اسحاناسىن بىلدىرەتىن تاماقتانۋ ورىندارىن ۇيىمداستۋدى جوسپارلادى. بۇل يتاليا, گەرمانيا, پولشا جانە ت.ب مەملەكەتتەر», - دەدى د.ەركىمباەۆ. سونداي-اق, كورمەگە اۋماعى 10 مىڭ شارشى مەتردەن  اساتىن جالپى تاماقتانۋدى ۇيىمداستىرۋعا ارنالعان كوممەرتسيالىق ورىندار ءبولىندى. جالپى العاندا, 40-تان اسا تاماقتانۋ ورىندارىن ۇيىمداستىرۋ جوسپارلانىپ وتىر. كوممەرتسيالىق پاۆيلونداردىڭ ءبىرىنشى قاباتتارىندا مەيرامحانا, كوفەحانا, بارلار ورنالاسادى. ەكىنشى قاباتتاردا ساۋدا ورتالىقتارىنداعىداي فاست-فۋد بولادى. جالپى تاماقتاندىرۋ ورىندارىن ۇيىمداستىرعان كەزدە بارلىق الەۋمەتتىك توپتار مەن تابىس دەڭگەيى قارالدى. «2016 جىلدىڭ سوڭىنان باستاپ بايقاۋدى جارنامالاۋ باستالدى. اتاپ ءوتۋ كەرەك, بيزنەس بەلسەندى قاتىسىپ جاتىر. سونىمەن, بۇگىنگى تاڭدا 71% جالداۋشىلار انىقتالدى. جالداۋشىلاردى تاڭداپ العان كەزدە, ەڭ الدىىمەن, قىزمەت كورسەتۋ جۇمىسى, نارىقتىق تاجىريبەسى مەن قولجەتىمدى باعا ساياساتىنا اسا نازار اۋدارىلادى. كاسىپكەرلىك سەكتوردى بەلسەندى قاتىسۋعا شاقىرامىز. نە دەگەنمەن, بۇل ءبىزدىڭ وتاندىق وندىرۋشىلەرگە وزدەرىن كورسەتۋگە ارنالعان تاپتىرماس مۇمكىندىك»,- دەدى «استانا ەكسپو-2017»ۇك كوممەرتسيالاندىرۋ دەپارتامەنتىنىڭ  ديرەكتورى. قازىرگى تاڭدا 115 مەملەكەت پەن 18 حالىقارالىق ۇيىم وزدەرىنىڭ ەكسپو-2017 كورمەسىنە قاتىساتىندارىن راستادى.