ىشكى ىستەر مينيسترلىگى بەرگەن رەسمي دەرەك بويىنشا, 2016 جىلى جاسوسپىرىمدەردىڭ وزىنە قول جۇمساۋعا يتەرمەلەۋ بويىنشا 9 قىلمىستىق ءىس قوزعالعان. بىراق ولارعا الەۋمەتتىك جەلىلەر مەن توپتاردىڭ تيگىزگەن ىقپالى جايلى ەش مالىمەت جوق. وسىعان وراي بۇگىن قر اقپارات جانە كوممۋنيكاتسيالار ءمينيسترى داۋرەن اباەۆ ءوزىنىڭ فەيسبۋكتەگى پاراقشاسىندا مۇنداي ۆيرتۋالدى ويىندار ماسەلەسىنىڭ وزەكتى بولىپ وتىرعانىن ايتتى. "بىراق اتالعان كۇدىكتى ويىنداردى باق-تىڭ قايتا-قايتا ەسكە سالۋى – كۇماندى قاۋىمداستىقتارعا جاسالعان جارناما ەكەنىن ۇمىتپاعان ءجون", دەدى مينيستر. ال قر ءىىم مەملەكەتتىك ءتىل جانە اقپارات دەپارتامەنتىنىڭ ديرەكتورى الماس سادۋباەۆ باق وكىلدەرىن وسى تاقىرىپقا قاتىستى اقپاراتتاردى تەك قۇزىرلى ورگان مالىمەتتەرىنە سۇيەنە وتىرىپ تاراتۋعا شاقىردى.
"كوك كيت" قاشان شىقتى؟
2016 جىلى رەسەيدە جاسوسپىرىمدەردىڭ وزىنە قول سالۋى مەن ۆيرتۋالدى ويىنداردىڭ بايلانىسى وزەكتى ماسەلە بولدى. بىراق تەرگەۋ بارىسىندا ءوزىن-ءوزى ولتىرگەن بالالاردىڭ ەشقانداي كۇماندى توپتارعا تىركەلمەگەنى انىقتالعان.
ەڭ العاش «كوك كيت» تۋرالى رەسەيلىك «نوۆايا گازەتا» باسىلىمى جازدى. وندا ء«ولىم توپتارى» ارقىلى 130 ءجاسوسپىرىمنىڭ وزىنە قول جۇمساعانى ايتىلعان. بىراق ولاردىڭ ەشقايسىسى ناقتى دالەلدەنبەگەن. "جاۋاپتى ورگاندار ماقالا اۆتورىنان 130 دەگەن ساندى قايدان العانى تۋرالى دا جارىتىپ جاۋاپ الا المادى", دەيدى lenta.ru.
ءبىر ايتا كەتەرلىگى, وسى سيپاتتاعى توپتاردى قۇرعانى ءۇشىن 2016 جىلدىڭ قاراشاسىنان بەرى قاماۋدا وتىرعان فيليپ ليس (فيليپپ بۋدەيكين) بۇل جاي ويىن ەكەنىن ايتىپ اقتالۋدا. ءبىر سوزىندە ول بۇل توپتى تەك ادام جيناۋ ءۇشىن اشقانىن ايتىپتى. مۋزىكانت رەتىندە ول تانىمالدىلىققا يە بولۋ ءۇشىن وسى توپتا ادام جيناپ, كەيىن اتاۋىن وزگەرتپەكشى بولعان. تەرگەۋ جۇمىستارى ءالى جۇرگىزىلىپ جاتىر. رەسەيدە مۇنداي اقپاراتتار لەگى ءوتىپ كەتتى. ءولىمنىڭ وسى توپتار كەسىرىنەن بولعانى دالەلدەنبەدى.
اقپارات اعىنى ورتالىق ازياعا جەتتى
وسىدان ەكى اپتا بۇرىن قىرعىزستاندا وسىنداي ءولىم توپتارى تۋرالى اقپارات پايدا بولدى. سول ۋاقىتتا ءوز-وزىنە قول جۇمساعان 8-سىنىپ وقۋشىسىنىڭ ولىمىنە قاتىستى تەرگەۋ ءالى اياقتالماعان. دەگەنمەن, قىرعىزستان رەسپۋبليكاسىنىڭ ءىىم ايتۋىنشا, جەتكىنشەكتەردىڭ ءسۋيتسيدى ءدال وسى توپتارمەن بايلانىستى ەكەندىگى دالەلدەنبەگەن.
ال قازاقستاندا بۇل توپ تۋرالى العاش اقپارات قاراعاندىنىڭ 19 جاسار ستۋدەنتى ءوز-وزىنە قول جۇمساعاندا شىقتى. تۋىستارى ونى وسى توپتا بولدى دەگەن جورامال ايتتى. بۇل اقپاراتتى تاراتقان اقپارات قۇرالدارى ekaraganda.kz پورتالىنا سىلتەمە جاسادى. ال قر ءىىم مەملەكەتتىك ءتىل جانە اقپارات دەپارتامەنتىنىڭ ديرەكتورى الماس سادۋباەۆتىڭ ايتۋىنشا, گالينا سيبيرياكوۆانىڭ ءوز-وزىنە قول جۇمساۋىنا وسى توپتاردىڭ اسەر ەتكەنى ءالى راستالعان جوق. "سيبيرياكوۆانىڭ ولىمىنە قاتىستى قر قىلمىستىق كودەكسىنىڭ 105 بابىبەن سوتقا دەيىنگى تەرگەۋ جۇرگىزىلىپ جاتىر", دەدى ول. دەپارتامەنت باسشىسىنىڭ ايتۋىنشا, قىزدىڭ اتا-اناسى سوڭعى اقپاراتتار لەگىنە وراي وسىنداي بولجام جاساعان. "تەرگەۋ شارالارى جۇرگىزىلىپ جاتىر. باق وكىلدەرىنە بۇل تاقىرىپتى ۇشىقتىرماۋعا شاقىرامىز. ازاماتتارعا بايسالدىلىق تانىتىپ, ۇرەيگە بوي الدىرماۋدى سۇرايمىز", دەدى الماس سادۋباەۆ.
اۋديوجازبالارعا سەنۋگە بولا ما؟
قازىر WhatsApp مەسسەندجەرى ارقىلى ءتۇرلى جازبالاردىڭ سكرين سۋرەتتەرى مەن اۋديوجازبالار تارالىپ جاتقانى بەلگىلى. وسىعان وراي الماس سادۋباەۆ ازاماتتاردى الەۋمەتتىك جەلىلەردەن نەمەسە باسقا دا كۇماندى اقپارات كوزدەرىنەن الىنعان مالىمەتتەرگە سەنبەۋگە شاقىردى. "تەك رەسمي ورگان وكىلدەرىنە سۇيەنىڭىزدەر. جالعان اقپارات تاراتۋ ءۇشىن دە قىلمىستىق جاۋاپكەرشىلىك قاراستىرىلعانىن ەستەرىڭىزگە سالامىن. رەسمي تۇردە مالىمدەيمىن, ءبىزدىڭ ەلدە كامەلەتتىك جاسقا تولماعان بالالاردىڭ ينتەرنەتتەگى سۋيتسيدتىك ويىندارعا بايلانىستى ءوز-وزىنە قول جۇمساۋ دەرەگى تىركەلمەگەن", دەدى الماس سادۋباەۆ.
Egemen.kz "ۆكونتاكتە" الەۋمەتتىك جەلىسىنەن "مورە كيتوۆ" دەگەن تاقىرىپپەن 300 قاۋىمداستىق, "سيني كيت" دەگەن 247 قاۋىمداستىق كەزدەستىردى. وندا "تيحي دوم" دەگەن 450-گە جۋىق توپ بار ەكەن. الايدا, ولاردان ءسۋيتسيدتى ناسيحاتتايتىن ماتەريالدار تابىلمادى. اراسىندا جارنامالىق توپتار, سۋيتسيدكە قارسى توپتار مەن كەزدەيسوق وسى "ويىندارمەن" اتتاس ۇيىم پاراقشالارى دا بار. ال ءسۋيتسيدتى ناسيحاتتايتىن كەيبىر توپتارعا كىرە المادىق. سەبەبى, ولار قر اقپارات جانە كوممۋنيكاتسيالار مينيسترلىگىنىڭ بايلانىس, اقپارات جانە باق سالاسىنداعى مەملەكەتتىك باقىلاۋ كوميتەتىنىڭ تالابىمەن بۇعاتتالعان. وسى ورايدا ايتا كەتەتىن نارسە, اقپارات جانە كوممۋنيكاتسيالار ءمينيسترى داۋرەن اباەۆ: "مينيسترلىك سۋيتسيدتىك باعىتتاعى توپتاردى انىقتاۋ ماقساتىندا الەۋمەتتىك مەدياعا تۇراقتى تۇردە مونيتورينگ جۇرگىزىپ وتىرادى. سوڭعى جىلدارى كۇماندى كونتەنتى بار جۇزدەگەن توپتار جويىلدى", دەگەن بولاتىن.
ەستەرىڭىزگە سالا كەتسەك, بۇعان دەيىن ءبىز كۇماندى توپتارعا شاعىم تۇسىرۋگە بولاتىنىن ايتقانبىز.
گۇلنۇر قۋانىشبەكقىزى,
"ەگەمەن قازاقستان"
