جانارماي باعاسىن نەگىزسىز كوتەرگەن بەكەتتەر جازالانادى

قازاقستان رەسپۋبليكاسى ۇلتتىق ەكونوميكا مينيسترلىگى بەنزين باعاسىنىڭ كوتەرىلۋىنە بايلانىستى, مۇناي ونىمدەرىن وتكىزۋ نارىق سۋبەكتىلەرىنە جانە تۇتىنۋشىلارعا مۇنداي ءىس-قيمىلدار نەگىزسىز بولعان جاعدايدا مونوپولياعا قارسى دەن قويۋ شارالارى قابىلداناتىنىن حابارلايدى, دەپ جازادى قر ۇلتتىق ەكونوميكا مينيسترلىگىنىڭ ءباسپاسوز قىزمەتى. سونداي-اق بۇگىنگى كۇنى «مۇناي ونىمدەرىنىڭ جەكەلەگەن تۇرلەرىن ءوندىرۋدى جانە ولاردىڭ اينالىمىن مەملەكەتتىك رەتتەۋ تۋرالى» قازاقستان رەسپۋبليكاسىنىڭ زاڭىنا سايكەس باعالاردى مەملەكەتتىك رەتتەۋ اي-80 بەنزينىن بولشەك ساۋدادا وتكىزۋگە قولدانىلاتىنىن ەسكەرتەمىز. بۇل رەتتە, بۇرىن رەتتەۋ قولدانىلعان اي-92 بەنزينى (مەملەكەتتىك رەتتەۋ 2015 جىلعى قىركۇيەكتەن باستاپ الىپ تاستالدى) مەن ديزەل وتىنىنا (مەملەكەتتىك رەتتەۋ 2016 جىلعى تامىزدان باستاپ الىپ تاستالدى) باعالاردى بولشەك ساۋدادا وتكىزۋشىلەر ءوز بەتىنشە بەلگىلەيدى. قازاقستان رەسپۋبليكاسى مۇناي ونىمدەرىنىڭ ىشكى نارىعى (قر ەنەرگەتيكا مينيسترلىگىنىڭ دەرەكتەرى بويىنشا) رەسەي فەدەراتسياسىنان اكەلىنەتىن جەتكىزىلىمدەردەن يمپورتقا تاۋەلدى ەكەنىن اتاپ ءوتۋ قاجەت. وسىعان بايلانىستى, يمپورتتالاتىن مۇناي ونىمدەرىن ساتىپ الۋ باعالارى بولشەك ساۋدا باعالارىن قالىپتاستىرۋعا ىقپال ەتەدى. قازىرگى كەزدە مونوپولياعا قارسى ورگان نارىق سۋبەكتىلەرى قىزمەتىنىڭ باسەكەلەستىكتى قورعاۋ سالاسىنداعى زاڭناماعا سايكەس كەلۋى تۇرعىسىنان مۇناي ونىمدەرىن وتكىزۋ نارىعىنداعى احۋالعا اپتا سايىن مونيتورينگ جۇرگىزەدى.  مونوپولياعا قارسى دەن قويۋ شارالارى مۇناي ونىمدەرى باعالارىنىڭ وسۋىنە سەبەپ بولعان باسەكەلەستىككە قارسى كەلىسىلگەن ءىس-قيمىلدار جانە نارىق سۋبەكتىلەرىنىڭ كەلىسىمدەرى, ۇستەم جاعدايدى تەرىس پايدالانۋ فاكتىلەرى بويىنشا قولدانىلادى. نارىق سۋبەكتىلەرىنەن اقپارات الۋ ناتيجەلەرى بويىنشا باسەكەلەستىكتى قورعاۋ سالاسىنداعى زاڭنامانى بۇزۋشىلىق بەلگىلەرى انىقتالعان جاعدايدا, مونوپولياعا قارسى ورگان تەرگەپ-تەكسەرۋ جۇرگىزۋگە باستاما جاساۋعا قۇقىلى.