استانادا قاتەرلى ىسىكتى ەمدەۋدىڭ جاڭا تەحنولوگيالارى ەنگىزىلۋدە. بۇل تۋرالى دەنساۋلىق ساقتاۋ باسقارماسى جانە سالاۋاتتى ءومىر سالتىن قالىپتاستىرۋ ورتالىعى ەلوردانىڭ ونكولوگيالىق ورتالىعىندا دۇنيەجۇزىلىك قاتەرلى ىسىكپەن كۇرەس كۇنى ونكولوگيالىق اۋرۋلاردىڭ الدىن الۋ جانە ەرتە انىقتاۋ بويىنشا بىرلەسكەن بريفينگ بارىسىندا ءمالىم بولدى.
قالا اكىمدىگى حابارلاعانداي, شارا بارىسىندا قاتەرلىك ىسىكتەردى ەمدەۋدە مۋلتي ديستسيپلينارلىق ءادىستى ودان ءارى دامىتۋ ماسەلەسى تالقىلاندى.
استانادا قاتەرلى ىسىكتەردى دياگنوستيكالاۋ مەن ەمدەۋدە جاڭا تەحنولوگيالار قازىردىڭ وزىندە قولدانىلۋدا, اتاپ ايتقاندا, ونكولوگيالىق ورتالىق جاڭا زاماناۋي جابدىقتار ساتىپ الدى.
«ارنايى كومپيۋتەرلىك توموگرافتىڭ باقىلاۋىمەن 6 ءتۇر بويىنشا قاتەرلى ىسىكتىڭ ەرتە دياگنوستيكاسى مەن سكرينيگتەرىنىڭ جاڭا ادىستەرى ەنگىزىلۋدە. تەكسەرۋلەر مەملەكەتتىك بيۋدجەت ەسەبىنەن تەگىن جۇرگىزىلەدى», - دەپ اتاپ كورسەتتى استانا ق. ونكولوگتار, راديولوگتار قاۋىمداستىعىنىڭ توراعاسى, ونكوورتالىقتىڭ باس دارىگەرى مۇحتار تولەۋتاەۆ.
2016 جىلى ىسىكتى ەمحاناعا دەيىنگى كەزەڭدە انىقتاۋ ءۇشىن ستەرەوتاكسيكالىق بيوپسيا, جانە ەشبىر تىرتىقسىز, حيرۋرگيالىق كوسمەتيكالىق اسەرلەردىڭ كومەگىمەن ۋدز باقىلاۋىمەن كىشى كولەمدەگى ىسىكتەردى كەسىپ الىپ تاستاۋعا بولاتىن ۆاكۋمدىق اسپيراتسيوندىق بيوپسيا قولدانىلا باستادى.
جاڭا تەحنولوگيالاردى ەنگىزۋدىڭ ارقاسىندا اۋرۋدى ەرتە كەزەڭدە انىقتاۋ جاعدايلارى ارتتى, مىسالى, سكرينينگ ارقىلى راكتىڭ انىقتالۋى 100% قۇرادى.
2016 جىلدىڭ قورىتىندىسى بويىنشا قاتەرلى ىسىككە شالدىعۋ كورسەتكىشى 100 مىڭ حالىققا شاققاندا 200,6 بولدى, 2015 جىلى بۇل كورسەتكىش 100 مىڭعا 198,4 بولعان. ناۋقاستاردا قاتەرلى ىسىكتەردىڭ انىقتالۋ كورسەتكىشىنىڭ ارتۋى سكرينينگتىك باعدارلامالاردىڭ ەنگىزىلۋىمەن جانە وزگە وڭىرلەردەن كەلەتىن پاتسيەنتتەردىڭ كوبەيۋىنە بايلانىستى.
«استانا ق. ونكولوگيالىق ورتالىعىندا رەسپۋبليكادا العاش رەت باس جانە مويىنداعى ىسىكتەر كەزىندە ميكروحيرۋرگيالىق قالپىنا كەلتىرۋ وپەراتسيالارى - ءتىل, تومەنگى جاق پلاستيكاسى, كەۋدە قۋىسىنىڭ, كىشى جامباس, قۇرساق قۋىسى ورگاندارىنا ەندوۆيدەوحيرۋرگيالىق وپەراتسيالار ەنگىزىلدى», - دەدى ونكولوگ دارىگەر مۇحتار ەسەنجان ۇلى.
