الماتىدا قىرعىز ءنومىرلى كولىكتەرگە قارسى رەيد باستالماق

الماتى قالالىق ىشكى ىستەر دەپارتامەنتى, مەملەكەتتىك كىرىستەر دەپارتامەنتى جانە قالالىق پروكۋراتۋرا بىرلەسىپ قىرعىزستاندا تىركەلگەن اۆتوكولىكتەردى جۇرگىزىپ جۇرگەن قازاقستان ازاماتتارىن انىقتاۋ جۇمىستارىن قولعا العالى وتىر. بۇل تۋرالى zakon.kz پورتالى حابارلايدى. رەيدتەردى باستاۋعا سەبەپ – سوڭعى ۋاقىتتا قىرعىز رەسپۋبليكاسىندا تىركەلگەن كولىكتەردىڭ كوپتەپ كەلۋى. ۇستالعان قىرعىز ءنومىرلى كولىكتەر ۋاقىتشا ساقتاۋ ورىندارىنا قويىلىپ, ولاردى جۇرگىزۋشى قازاقستان ازاماتتارىنا ايىپپۇل سالىنادى. مۇنىڭ الدىنداعى وپەراتيۆتى-پروفيلاكتيكالىق شارالار ناتيجەسىندە كورشى ەلدە تىركەلگەن 306 اۆتوكولىك ۇستالىپ, ولارعا يەلىك ەتۋشىلەر اكىمشىلىك جاۋاپكەرشىلىككە تارتىلعان. ۋاقىتشا ساقتاۋ قويماسىنا قويىلعان 44 ماشينا سۇراۋسىز قالىپ, 7 كولىك سوت شەشىمىنەن مەملەكەت پايداسىنا تاركىلەنگەن. الماتى قالالىق مەملەكەتتىك كىرىستەر دەپارتامەنتى قىرعىز ازاماتتارىنىڭ اۆتوكولىكتەرىن قازاقستان تەرريتورياسىندا ۋاقىتشا جۇرگىزۋگە بەرۋگە بولمايتىنىن حابارلاپ وتىر. ياعني, ەۋرازيالىق ەكونوميكالىق وداق ەلدەرىندە تۇراتىن جەكە تۇلعالارعا قىرعىز كولىكتەرىن سەنىمحات ارقىلى جۇرگىزۋگە تىيىم سالىنادى.