اۋىل مۇعالىمىنىڭ احۋالى الاڭداتادى

«ەگەمەن قازاقستان» گازەتىنىڭ بيىلعى 19 قاڭتارداعى №12 سانىندا اۋىل مۇعالىمىنىڭ احۋالى» اتتى ماقالانى كوزىمىز شالدى (اۆتورى – تەمىر قۇسايىن). بۇل ماقالا ۇستازدار قاۋىمىنا ۇلكەن وي سالدى. شىندىعىندا, الەۋمەتتىك ماسەلەسى شەشىلمەگەن مۇعالىم قالاي الاڭسىز ەڭبەك ەتەدى؟ ەڭبەكاقى كولەمىن ارتتىرۋ مەملەكەت قازىناسىنا قيىنعا تۇسسە دە, الەۋمەتتىك جاع­دايىنا قارايلاسۋعا بولار ەدى. جاسى­راتىنى جوق, كەڭەس وداعى كەزىندە ۇستازدار قاۋىمىنىڭ مارتەبەسى دە, تۇرمىس-تىرشىلىگى دە جوعارى بولدى. ماسەلەن, مۇعالىمدەرگە اي سايىن 44 كۆت/ساع. ەلەكتر ەنەر­گيا­سى, سونداي-اق, جىلىنا 5 توننا كومىر بەرىلەتىنى ەسىمىزدە. وسى رەتتە ەلىمىزدىڭ وتىن مەن ەنەرگەتيكا ورتالىعى سانالاتىن پاۆلودار وبلىسى اۋماعىندا جەرگىلىكتى ءبىلىم سالاسىنىڭ قىز­مەتكەرلەرىنە جوعارىداعى الەۋمەتتىك جەڭىلدىكتەر مەن كومەك­تەردى ۇسىنسا اجەپتاۋىر سەرپىلىس تۋعىزار ەدى. تاعى ءبىر وزەكتى ماسەلە, كەزىندە پاۆلودار وبلىسىنىڭ مۇعا­لىمدەر ءبىلىمىن جەتىلدىرۋ ينستيتۋتى جانىنان پەداگوگ مامانداردىڭ دەنساۋلىعىن تۇزەۋگە باعىتتالعان «اعارتۋ» اتتى پروفيلاكتوري بولىپ ەدى. اتالعان ورتالىقتا مۇعالىمدەر كاسىپوداق ارقىلى تەگىن ەم-دوم الاتىن. ياعني, ءبىلىمىن جەتىلدىرۋ كۋرسىنا بارعان مۇعالىمدەر قاۋىمى دەنساۋلىقتارىن دا تۇزەپ قايتاتىن. قازىر بۇل مەكەمە جەكەنىڭ قولىنا ءوتىپ باسقا سالادا قىزمەت كورسەتەدى. ال بۇگىندە ورتالىققا ءبىلىمىن جەتىلدىرۋگە بارعان مۇعالىم ەكى اپتا, كەيدە ءبىر اي ۋاقىت بويى پاتەر جالداپ, جاتىن ورىن ىزدەپ جۇرۋگە ءماجبۇر بولىپ وتىر. جۋىردا ءبىلىم جانە عىلىم مينيسترلىگى جاڭا فورماتتا وقىتۋ باعدارلاماسىن قا­بىلداپ, مۇعالىمدەردى ءتۇرلى كۋرستاردا وقىتۋعا ۇكىمەتتەن قىرۋار قارا­جات ءبولىنىپ جات­قا­نىن جاريالادى. وسى ارادا الگى قيىندىقتاردى ەسەپكە الىپ, ءتيىمدى شەشۋدىڭ جولدارىن قاراستىرۋ كەرەك دەپ ويلايمىز. سونداي-اق, ۇستازداردىڭ زەينەتكەرلىك جاسى دا قايتا قا­راۋدى قاجەت ەتەدى. مىسالى, جۇ­مىسى قاۋىپتى اسكەريلەر مەن ىشكى ىستەر ورگاندارى قىز­­مەتكەرلەرىن 45 جاسىندا زەينەتكە شىعاراتىنى بەل­گىلى. سول سياقتى مۇعا­لىم­دەر قاۋىمىنىڭ دا جۇ­مىسى جە­ڭىل ەمەس. ولار كۇن­دەلىكتى في­­زيكالىق جانە پسيحو­لو­گيالىق تۇرعىدان ەرتە قاجي­تىن ماماندىق يەلەرى. ياعني, مۇعالىم قىزمەتىن سارالاپ, ارنايى زەرتتەۋلەر ءجۇر­گىزىپ, قو­رىتىندى جاسايتىن ۋا­قىتتىڭ كەلگەنى انىق. اباي يكەشوۆ, ءماشھۇر-ءجۇسىپ كوپەەۆ اتىنداعى ورتا مەكتەپتىڭ بيولوگيا جانە حيميا پاندەرىنىڭ مۇعالىمى پاۆلودار وبلىسى, باياناۋىل اۋدانى, جاڭاجول اۋىلى