سەمەي ەرتەڭىنە سەنىممەن قارايدى

«نۇر وتان» پارتياسى توراعاسىنىڭ ءبىرىنشى ورىنباسارى سەمەيدە بولدى. مۇحتار قۇل-مۇحاممەد وڭىردەگى ەلەكتر قۋاتىنىڭ جاڭعىرۋى بارىسىمەن تانىستى, سونداي-اق جاڭا جەدەل جاردەم اۋرۋحاناسىندا دارىگەرلەرمەن جۇزدەسىپ, ەلباسىنىڭ قازاقستان حالقىنا جولداۋىندا بەلگىلەنگەن دەنساۋلىق ساقتاۋ سالاسىن دامىتۋعا باعىتتالعان باسىم باعىتتارىن تالقىلادى. سەمەي قالاسىنداعى وزەكتى پروبلەمالاردىڭ ءبىرى – جىلۋمەن قامتاماسىز ەتۋ ماسەلەسى. جەرگىلىكتى ەنەرگەتيكالىق ين­فراقۇرىلىمنىڭ ابدەن توزىعى جەتكەندىكتەن ءجيى بۇزىلىپ, قىس مەزگىلىندە تۇرعىندارعا قيىنشىلىقتار تۋعىزادى. پرەزيدەنتتىڭ تاپسىرماسى بويىنشا بۇل جەردە ەلەكتر قۋاتىن تۇبەگەيلى قاي­تا قۇرۋ باستالىپ كەتتى. قالا­نىڭ سولتۇستىك جاعالاۋى ءبولى­گىندەگى تۇرعىن ءۇي مەن اكىم­شى­لىك عي­ماراتتاردىڭ 10 پايى­زىن جىلۋ­مەن قامتاما­سىز ەتە­تىن №1 جىلۋ-ەنەرگە­تي­كالىق ور­تا­­لىعىن جاڭارتۋ جۇمىس­تارى اياقتالدى دەسە دە بو­لادى. جەر­گىلىكتى تۇرعىن­دار جاڭار­تىل­عان جىلۋ-ەنەرگە­تيكالىق ورتا­لىعىنىڭ ىسكە قوسىلۋىن اسىعا كۇتۋدە, الايدا, ول ءۇشىن ءالى دە ميللياردتان استام تەڭ­گە قاراجات قاجەت. جوبانى اياعى­نا دەيىن جەتكىزۋ ءۇشىن ءوڭىر باس­­شىسى «نۇر وتان» پارتياسى­نان كومەك سۇرادى. «نۇر وتان» پارتياسى توراعاسىنىڭ ءبىرىنشى ورىن­باسارى «100 مەكتەپ, 100 اۋرۋ­حا­نا» پرەزيدەنتتىك باعدار­لا­ما­­سىنىڭ شەڭبەرىندە قالادا جاڭادان سالىنعان مەديتسي­نالىق جەدەل جاردەم اۋرۋحانا­سىن­داعى ساۋلە اۋرۋىنا شال­دىققان ادامداردىڭ مۇڭ-مۇق­تاجدارىنا ەرەكشە نازار اۋداردى. سەمەي پوليگونىنداعى ياد­رولىق جارىلىستاردىڭ سال­دارىنان ايماقتاعى ونكولو­گيا اۋرۋىنىڭ دەڭگەيى جوعا­رى. الايدا, ءدال وسى ۋاقىت­قا دەيىن مۇندا زاماناۋي دياگ­نوستيكالىق ورتالىق بولماعان ەدى, سوندىقتان دا قاتەرلى ىسىك اۋرۋىنا دۋشار بولعاندارعا باسقا قالالار مەن الەم ەلدە­رىنىڭ اۋرۋحانالارىنا بارىپ ەمدەلۋىنە تۋرا كەلەتىن, مۇنى كوپشىلىكتىڭ قالتاسى كوتەرە بەر­مەيدى. زاماناۋي مەديتسينالىق جەدەل جاردەم اۋرۋحاناسىنىڭ ىسكە قوسىلۋىنا بايلانىستى مۇنداي قاجەتتىلىكتىڭ كەرەگى بولماي قالدى. الدىڭعى قا­تار­لى ەۋروپالىق قۇرال-جابدىق­تار كەشەندى دياگنوستيكانى جاساۋعا جانە ەڭ العاشقى كەزەڭ­دەگى ساۋلە اۋرۋىنىڭ بەلگى­لەرىن انىقتاۋعا مۇمكىندىك بەرەدى, بۇل ءوز كەزەگىندە, ەمنىڭ تيىمدىلىگىن ارتتىرا تۇسەدى. تەك قانا اۋرۋحانالاردىڭ تەحنيكالىق جابدىقتالۋىنا مەملەكەت 2,5 ميللياردتان اس­تام تەڭگە سالدى, ال جوبانىڭ جالپى قۇنى 10 ميلليارد تەڭگەدەن اسادى. جىل سايىن مەديتسينالىق جەدەل جاردەم اۋرۋحاناسى 30 مىڭنان استام ادامدى قابىلداي الادى. سەمەيدەگى دارىگەرلەرمەن اڭگىمەلەسۋ كەزىندە مۇحتار قۇل-مۇحاممەد پرەزيدەنت جاريا ەتكەن «ءۇشىنشى جاڭ­عى­رۋ­دىڭ» بۇكىل قازاقستاندى قامتي­تىنىن جانە دەنساۋلىق ساقتاۋ سالاسىنىڭ دا ودان تىس قال­مايتىنىن اتاپ ءوتتى. «مەم­لەكەت باسشىسىنىڭ جول­داۋىندا الەۋمەتتىك ماسەلە­لەرگە, ونىڭ ىشىندە دەنساۋلىق ساقتاۋ سالاسىنا ايرىقشا كوڭىل بولىنگەن. ەلىمىزدە 1 ءشىل­دە­دەن باستاپ جالپى الەمدىك تاجىريبەنىڭ تيىمدىلىگىنە نەگىز­دەلگەن مىندەتتى مەديتسينالىق ساقتاندىرۋ جۇيەسى ەنگىزىلەدى. ءبىز بۇعان دايىن بولىپ, مە­ديتسينالىق قىزمەت كورسەتۋ سالاسىنىڭ اياسىن مەيلىنشە كەڭەيتۋىمىز قاجەت», – دەدى «نۇر وتان» پارتياسى توراعاسىنىڭ ءبىرىنشى ورىنباسارى. ءوڭىردىڭ مەديتسينا قىز­مەتكەرلەرى مۇحتار قۇل-مۇ­­حاممەدكە ەلباسىنىڭ قا­زاق­ستان حالقىنا جولداۋىمەن مۇ­قيات تانىسىپ شىققاندارىن ايتىپ, مەملەكەت باسشىسى بەل­­گىلەپ بەر­گەن ەل دامۋى­نىڭ با­عىتىن تولىق قولداي­تىن­دارىن جەت­كىزدى. راۋشان نۇعمانبەكوۆا سەمەي