عىلىمي-يننوۆاتسيالىق الەۋەتىمەن تانىستى

كەشە پرەمەر-مينيستر باقىتجان ساعىنتاەۆ نازارباەۆ ۋنيۆەرسيتەتكە بارىپ, پرەزيدەنت جولداۋىن ىسكە اسىرۋ مەن ۇكىمەتتىڭ كەڭەيتىلگەن وتىرىسى بارىسىندا بەرگەن تاپسىرمالارىن ورىنداۋ ماسەلەلەرى جونىندە كەڭەس وتكىزدى, دەپ حابارلادى پرەمەر-ءمينيستردىڭ ءباسپاسوز قىزمەتى. نازارباەۆ ۋنيۆەرسيتەت اۋقىمدى عىلىمي-ءبىلىم بەرۋ ەكوجۇيەسى, مۇندا وقىتۋدان بولەك, ءتۇرلى عىلىمي-يننوۆاتسيالىق زەرتتەۋلەر جۇرگىزىلەدى. پرەزيدەنت ءوز جولداۋىندا قازاقستاندا تسيفرلى يندۋستريانى دامىتۋ ەكونوميكانىڭ وزگە سالالارىنىڭ دا دامۋىنا تۇرتكى بولاتىنىن ايتىپ ءوتتى. وسى ورايدا ول نەگىزىندە جاڭا, پەرسپەكتيۆالى تەحنولوگيالار مەن يننوۆاتسيالار بولاتىن ەكونوميكا ءوسىمىنىڭ جاڭا ۇلگىسىن قۇرۋ تۋرالى مىندەت قويدى. وسى ماقساتقا قول جەتكىزۋ ءۇشىن پرەزيدەنت بارلىق مۇمكىندىكتەر مەن رەسۋرستاردى شوعىرلاندىرۋ قاجەتتىگىن ايتتى. پرەمەر-مينيستر باقىتجان ساعىنتاەۆ وقۋ ورنىنا نازارباەۆ ۋنيۆەرسيتەتتىڭ مەملەكەت باسشىسىنىڭ العا قويعان مىندەتتەرىن ىسكە اسىرۋداعى مۇمكىندىكتەرىمەن تانىسۋ ماقساتىندا باردى. باقىتجان ساعىنتاەۆ ۋنيۆەرسيتەتتىڭ وقۋ زەرتحانالارىندا بولىپ, ستۋدەنتتەردىڭ عىلىمي جوبالار بويىنشا زەرتتەۋلەر جۇرگىزەتىن ورىندارىنىڭ جاعدايىمەن جانە ونداعى جابدىقتارمەن تانىسىپ شىقتى. نۋ-دىڭ تەحنوپاركى مەن وقۋ ورنىنىڭ اينالاسىندا بەلسەندى تۇردە دامىپ جاتقان «Astana Business Campus» يننوۆاتسيالىق كلاستەرىن ارالاۋ بارىسىندا ول وسىندا جۇزەگە اسىرىلىپ جاتقان زەرتتەۋ جوبالارىنىڭ ناتيجەلەرىمەن تانىستى. سونىمەن قاتار, پرەمەر-مينيستر بيزنەس-ينكۋباتوردىڭ, بيوتەحنولوگيالىق زەرتحانانىڭ جانە «Heart Stitch» فيزيكا جانە اككۋمۋلياتورلار ينستيتۋتى زەرتحانالارىنىڭ جۇمىسىمەن تانىستى. كەيىن ب.ساعىنتاەۆ نازارباەۆ ۋنيۆەر­سيتەتتىڭ­ پروفەسسور-وقىتۋشىلار قۇرامىمەن كەزدەسۋ وتكىزدى. كەزدەسۋ بارىسىندا پرە­زي­دەنتتىڭ العا قويعان مىندەتتەرىن ات­قارۋداعى وقۋ عيماراتىنىڭ ءرولى تۋرالى ايتىلدى. «مەملەكەت باسشىسى ءوز جولداۋىندا ۇكىمەتتىڭ الدىنا جاڭا مىندەتتەر قويدى – ەكونوميكالىق ءوسىمنىڭ جاڭا ۇلگىسىن قۇرۋ قاجەت. وزدەرىڭىز بىلەسىزدەر, قازاقستان قورى باي سانالاتىن شيكىزاتتىڭ قۇنى سوڭعى ەكى-ءۇش جىلدا وتە تومەنگى دەڭگەيدە جانە ول بىزگە جەتكىلىكتى ەكونوميكا ءوسىمىن بەرمەيدى. دەگەنمەن, ەلىمىزدىڭ مىندەتى 2050 جىلعا قاراي الەمنىڭ دامىعان 30 ەلىنىڭ قاتارىنا كىرۋ جانە وسى توپ-قا كىرۋ ءۇشىن بىزدە جىل سايىن 5% ءوسىم بولۋى شارت. وسىعان وراي ءبىز جاڭا يندۋستريانى دامىتىپ, ەل ەكونوميكاسىنىڭ باسەكەگە قابىلەتتىلىگىن ارتتىرۋىمىز قاجەت», دەدى ب. ساعىنتاەۆ.