اياگوزدە بۇركىتشىلەر باسەكەسىنىڭ جەڭىمپازدارى انىقتالدى

كوك ءتاڭىرىسىن قولعا ۇيرەتكەن قازاقتىڭ قىران جىگىتتەرى ەكى كۇن بويى اڭىزدار مەن ابىزدار ەلى اياگوزدى دۇبىرگە بولەدى. اقتامبەردى تۋعان توپىراقتا قىراندارمەن بىرگە ۇلتتىق رۋحىمىز قالىقتاعانداي بولدى. ەكى كۇنگە سوزىلعان ءبۇر­كىت­شىلەردىڭ باسەكەسىنە ەلى­مىزدىڭ الماتى, اقمولا, اتى­راۋ, جام­بىل, قاراعاندى, پاۆلودار, وڭتۇستىك قازاقستان, سولتۇستىك قازاقستان, شىعىس قازاقستان وبلىستارى مەن استانا قالاسىنان 37 بۇركىت پەن 6 قارشىعا, ۇزىن سانى 43 قۇس قاتىستى. بۇعان دەيىن وتكەن ەل بىرىنشىلىكتەرىندە مۇنداي كورسەتكىش تىركەلمەگەن ەكەن. وزدەرى اڭشى, وزدەرى بۇركىت­شى, وزدەرى اقىن, ءبىر سوزبەن ايتقاندا, سەگىز قىرلى, ءبىر سىرلى ۇرجارلىق تاتتىمبەت كاپ ۇلى مەن ەرزات بايقاداموۆ سىندى ۇلتجاندى ازاماتتاردىڭ ۇيىمداستىرۋىمەن, ونەر جاناشىرى, مەتسەنات ءانۋار­بەك ءبيمۋرزيننىڭ قارجىلاي قول­داۋىمەن وتكەن قۇسبەگىلەر باسە­كە­سى­نىڭ العاشقى كۇنىندە قى­ران­­نىڭ با­بىن بايقايتىن قۇستى قولعا شا­قىرۋ, ەركىن ۇشىرۋ, شىرعا سالۋ سەكىلدى سايىستار وتكىزىلسە, ەكىنشى كۇنى ىرىكتەۋدەن ىركىلمەي وتكەن ءبۇر­كىتتەر قويان مەن تۇلكىگە ءتۇستى. سايىسقا قاتىسۋشىلاردىڭ جاس جاعىنان ەڭ ۇلكەنى – الماتى وب­لىسىنىڭ سار­قان قا­لا­سىنان كەلگەن 75 جاس­تاعى تالىمبەك ايسابەك ۇلى اقساقال. ەڭ جاسى – جام­بىل وب­لى­سىنىڭ مەركى اۋدانىنىڭ تۋماسى, 17-دەگى باعداۋلەت باباجان. تالىمبەك اقساقالدىڭ بۇركىت­شىلىكپەن شۇعىلدان­عانىنا 40 جىلدان اسىپتى. وسى جىلدار مۇعدارىندا 4-5 كوك ءتاڭىرىسىن قولعا ۇيرەتىپتى. – ءبىرىن 7-8 جىل, ەكىنشىسىن 10 جىل شاماسىندا اڭعا سالدىق. ءبىزدىڭ بابالارىمىز 30-33 جىل تۇلەتكەن ەكەن. ءبىز ەندى ول كىسىلەرگە جەتە الماسپىز. جەتە الماساق تا, ءىزىن باسىپ كەلە جاتىرمىز. بالالاردى تاربيەلەپ ءجۇرمىز, – دەيدى بۇركىتشى قاريا. ەكى كۇنگى سايىستا بابى مەن باعى قاتار كەلىسىپ, ونەرىمەن جۇرتتىڭ ايىزىن قاندىرعان قىراندار دا بولدى. التى كۇن جول ءجۇرىپ, اتىراۋدان كەلگەن ارمان قوشقاروۆتىڭ «نارىن», قاراعاندىلىق تەمىرالى جاپا­روۆتىڭ «مۇز­بالاق», اقمولالىق قانات ءشۇ­لەنباەۆتىڭ «ساق­تان», تارازدىق باۋىرجان يمانقۇ­لوۆتىڭ «قاراجان», استانالىق كۇنتۋعان ارمانبەكتىڭ «اقبا­لاق» اتتى بۇركىتتەرىنىڭ بابىندا ەكەنىن كوردى كوپشىلىك. جارىس قورىتىندىسىندا پاۆلودارلىق باقىتجان مۇقا­شەۆتىڭ «نايزاسى» 1-ورىندى, الماتى وبلىسىنان كەلگەن مۇرات كودەكوۆتىڭ «اقجولى» 2-ورىندى, اتىراۋلىق ارمان قوشقاروۆتىڭ «نارىن» ات­تى بۇركىتى 3-ورىندى يە­لەن­دى. قار­شىعاشىلار باسە­كەسىندە جام­بىلدىق با­­باجان باعداۋلەت 1-ورىنعا, الماتى وب­­لى­­سىنىڭ تۋماسى ايان سەيىتجان 2-ورىنعا, اق­مو­­لا­لىق ءابسا­لام قا­زى­­­باي 3-ورىنعا لايىق دەپ تا­نىل­­دى. ازامات قاسىم, «ەگەمەن قازاقستان» شىعىس قازاقستان وبلىسى سۋرەتتى تۇسىرگەن اۆتور