جارىلىپ كەتكەن جەر, قاڭىراپ قالعان بوس بەسىك, سىنعان شاڭىراق – يەسىز قالعان جەر مەن شاڭىراعى ورتاسىنا تۇسكەن ەل... ءولىپ جاتقان بالىقتار, بەسىكتى شىرماپ العان سۇر جىلاندار – شەتىنەگەن بالالار مەن ەلدى مەڭدەگەن دەرت...
بۇل – ارال تەڭىزىنىڭ تاعدىرى ايرىقشا الاڭداۋشىلىق تۋعىزىپ تۇرعان كەزەڭدەگى ەكولوگيالىق ماسەلەنى, سول ايماقتى مەكەن ەتكەن تۇرعىنداردىڭ قاسىرەتىن ءدوپ باسىپ كورسەتە بىلگەن سۋرەتشىنىڭ «ارال تاعدىرى» اتتى ايرىقشا تۋىندىسى.
«ت.جۇرگەنوۆ اتىنداعى ونەر اكادەمياسىندا وقىپ ءجۇرگەندە ەلگە بارعانىمدا ءۇش جاسار نەمەرە قارىنداسىم شەتىنەپ كەتتى. ءبىز جاقتا سۋ كوبىنەسە اششى بولاتىن. ويناپ جۇرگەن بالا سونداي اششى سۋدى ءىشىپ قويعان ەكەن... سول شەتىنەپ كەتكەن قارىنداسىما ارناپ «ارال تاعدىرى» دەگەن گوبەلەندى توقىدىم. كەيىننەن «جەر-انا شاقىرادى», «ارال» سەرياسى دەگەن كارتينالارىمدى سالدىم. جاس كەزىمدە وسىنداي سيۋرەاليستىك باعىتتا كوپ جۇمىس ىستەدىم», دەپ تۇسىندىرەدى سۋرەتشى مۇحامبەتقالي سامرات ۇلى ءوزىنىڭ وسى ەڭبەگىنىڭ ءمانىسىن.
ءار الۋان جانرلى, كوپ قىرلى سۋرەتشى, ءتۇرلى ستيل مەن تەحنيكالاردا: قولدانبالى-ونەر, گوبەلەن, گرافيكا, كەسكىندەمە جانە اكۆارەل تۇرلەرىمەن جۇمىس ىستەيتىن قىلقالام يەسى, قازاقستان سۋرەتشىلەر وداعىنىڭ مۇشەسى مۇحامبەتقالي دۇيسەمباەۆ مەملەكەتتىك ورتالىق مۋزەيىندە «ونەر – تۇنىپ تۇرعان قۇپيا» اتتى كورمەسىن وتكىزدى.
و.تاڭسىقباەۆ اتىنداعى الماتى ساندىك-قولدانبالى ونەر كوللەدجىندە 22 جىلدان بەرى وقىتۋشى بولىپ جۇمىس ىستەپ كەلە جاتقان سۋرەتشى م.دۇيسەمباەۆ كورمەسىندە كورەر-مەندەر نازارىنا ءوزىنىڭ جەكە كوللەكتسياسىنان الىنعان 70-تەن استام جۇمىسىن ۇسىنىپتى.
سۋرەتشىنىڭ «تۇرار رىسقۇلوۆ», «احمەت بايتۇرسىنوۆ», «ءدىنمۇحامەد قوناەۆ» اتتى قازاق زيالىلارىنىڭ پورترەتتىك گوبەلەندەر سەرياسىنان باستاپ, ءومىردىڭ ءبىر ساتتىك كورىنىستەرىن قاعازعا قاپىسىز, نازىك سەزىممەن, شىنايى ءتۇسىرۋ ارقىلى اۋىل ومىرىنە دەگەن ساعىنىش سەزىمىنە تولى «بالالىقتى ەسكە الۋ», «كورشى» اتتى اكۆارەلدىك تۋىندىلارى, سونىمەن قاتار, ەكولوگيا تاقىرىبىنداعى «ۋاقىت تراگەدياسى», «ەكولوگيا», «ارال» گوبەلەندەرى سىندى ارال تراگەدياسىنا ارناعان شىعارمالارى, «مەنىڭ قازاقستانىم» اتتى كارتيناسى ەشكىمدى بەيجاي قالدىرماسى انىق.
ميرا بايبەك, «ەگەمەن قازاقستان»
الماتى
