سولتۇستىك قازاقستاندا 100-گە جۋىق ەلدى مەكەندى سۋ باسۋى مۇمكىن

سولتۇستىك قازاقستان وبلىسىنىڭ اكىمدىگىندە ەۆاكۋاتسيالىق كوميسسيانىڭ وتىرىسى ءوتتى, دەپ حابارلايدى سقو تجد ءباسپاسوز قىزمەتى. جينالىسقا قاتىسۋشىلار وڭىرلىك ەۆاكۋاتسيالىق كوميسسيانىڭ توتەنشە جاعداي كەزىندەگى حالىقتىڭ قاۋىپسىزدىگىن قامتاماسىز ەتۋدەگى دايىندىعىن تالقىلادى. بولجام بويىنشا, سولتۇستىك قازاقستان وبلىسىنداعى سۋ تاسقىنى ورتاشا جىلدىق كورسەتكىشتەن جوعارى بولماق. سقو تجد باسشىسىنىڭ ورىنباسارى ەرىك سارىباەۆتىڭ ايتۋىنشا, وبلىس اۋداندارىنداعى ەۆاكۋاتسيالىق جوسپار قوسىمشا تۇزەتۋدى قاجەت ەتەدى. «وتكەن جىلعى ساراپتامالاردى قورىتىندىلاي وتىرىپ, دەپارتامەنت 94 ەلدى مەكەن مەن سۋ تاسقىنىنىڭ قاۋپى بار پەتروپاۆل قالاسىن ەسەپكە قويدى. ولاردىڭ كوبى ەسىل, تايىنشا جانە اققايىڭ اۋداندارىنا تيەسىلى», – دەپ اتاپ ءوتتى ەرىك سارىباەۆ. «حالىقپەن جينالىس وتكىزىپ, سۋ تاسقىنى كەزىندەگى ءىس-ارەكەتتەر ەرەجەسىن ۇيرەتۋ قاجەت. ادامداردى ەۆاكۋاتسيالاۋ بويىنشا جاتتىعۋلار وتكىزۋ كەرەك. ءبىزدىڭ مىندەتىمىز – سۋ تاسقىنىنىڭ زاردابىن ازايتىپ, ەلدى مەكەندەردى قورعاۋ, ادام شىعىنىن بولدىرماۋ, تۇرعىنداردىڭ قالىپتى ءومىر سۇرۋىنە جاعداي جاساۋ», – دەپ تۇيىندەدى وبلىس اكىمىنىڭ ورىنباسارى انارحان دۇيسەنوۆا.