اقتوبە قالاسىندا قوعامدىق كولىكتەر جاڭارادى

اقتوبە قالاسىندا كۇنىنە 50 باعىت بويىنشا قوعامدىق كولىك جۇرەدى. تۇرعىنداردان ءجيى شاعىم ەستيتىن قالا اكىمى ءىلياس يسپانوۆ بيىل ەۋروپالىق قايتا قۇرۋ جانە دامۋ بانكى ارقىلى نەسيە الىپ, 290 اۆتوبۋس ساتىپ الۋدى كوزدەپ وتىر, دەپ حابارلايدى قازاقپارات. اقتوبە قالاسىنداعى قوعامدىق كولىك قاتىناسىنا «اۆتوپارك» جشس مەن اقتوبە قالاسىنىڭ جولاۋشىلار اۆتوكولىگى كاسىپورنى جاۋاپتى. العاشقىسى جەكە, كەيىنگىسى مەملەكەتتىك-كوممۋنالدىق كاسىپورىن. «ەكى كومپانيانىڭ دا جۇمىسى وتە ناشار. دۇرىس جۇمىس ىستەي المايدى. تەندەردى ۇتىپ العان. ەكى جىلدا تەحنيكا جاڭارتىلۋى ءتيىس مىندەتتى ورىندامايدى. تەك «جولاقىنى قىمباتتاتۋ» ۇسىنىسىن ءتۇسىردى. بىزدە قازىر كوپ قىزمەت ءتۇرى قىمباتتاپ جاتىر. سوندىقتان الەۋمەتتىك جاعدايدى ەسكەرىپ, قوعامدىق تاسىمالداۋ نارىعىنا جاڭا كومپانيانى اكەلۋدى, ەۋروپالىق قايتا قۇرۋ جانە دامۋ بانكى ارقىلى قارجى الۋدى جوسپارلاپ وتىرمىز», – دەدى قالا اكىمى. جوسپار بويىنشا بيىل 290 اۆتوبۋس ساتىپ الىنادى. سالىقتان, سوت پروتسەسىنەن جينالعان قارجىعا مەملەكەتتىك ساتىپ الۋ كونكۋرسى وتكىزىلىپ, قوعامدىق كولىكتەر جاڭارادى. اقتوبەدە ايالداما ماسەلەسى دە وڭ شەشىمىن تاپپاي تۇر. ەسەپتەي كەلە قالادا 496 ايالداما بار ەكەنى انىقتالدى. ونىڭ 190-ىندا قوعامدىق كولىك توقتايتىن ارنايى جولاق قاراستىرىلماعان. ال 112 ايالدامانىڭ ارنايى پاۆيلونى جوق. بيىل بۇل جۇمىستى ءارى قاراي جالعاستىرۋعا بيۋدجەتتەن 33 ميلليون تەڭگە قاراستىرىلدى. بارلىعى 70 ايالداماعا جاڭبىردان, كۇن كوزىنەن, جەلدەن قورعايتىن پاۆيلون تۇرعىزىلادى.