قولداۋسىز قالمايدى

قازاق جەتىم, جەسىرىن جىلاتپاعان. اقتوبە وبلىسى ءىىد قولداۋىمەن جاڭا جىل قارساڭىندا قىزمەتتىك مىندەتتەرىن اتقارۋ كەزىندە ەرلىكپەن قازا تاپقان قىزمەتكەرلەردىڭ وتباسىنا 1 ميلليون تەڭگە كولەمىندە اقشالاي كومەك كورسەتىلدى. ەل تىنىشتىعىن, ازاماتتاردىڭ قاۋىپسىزدىگىن قورعاۋ جولىندا ار-نامىستارىن جوعارى ۇستاپ, قىزمەتتىك مىندەتتەرىن ادال اتقارىپ,  ءوز ومىرلەرىن قيىپ, كەلەر ۇرپاققا ۇلگى بولعان اسىل ازاماتتار ەش ۋاقىتتا ۇمىتىلمايدى. 1991 جىلدان بەرى اقتوبە وبلىسى ءىىد-دە 9 پوليتسيا قىزمەتكەرى قىزمەتتىك مىندەتتەرىن اتقارۋ كەزىندە ەرلىكپەن قازا تاپقان. ولاردىڭ قاتارىندا:  ايسا كارتوۆ, امانگەلدى قوسجانوۆ, اببات نۇرىمجانوۆ,  الپىسباي نۇرلان, ايدوس بۋرانباەۆ, رۋسلان جولدىباەۆ, رۇستەم كەنجالين جانە تەمىربەك جاقسىلىقباەۆ بار. اقتوبە وبلىسى ءىىد جەكە قۇرامى قازاقستان رەسپۋبليكاسىنىڭ 25 جىلدىق مەرەيتويىنا وراي قىزمەتتىك مىندەتتەرىن اتقارۋ كەزىندە قازا بولعان قىزمەتكەرلەر وتباسىنا 100 000 تەڭگە مولشەرىندە الەۋمەتتىك كومەك كورسەتسە, جاڭا جىل قارساڭىندا 1 000 000 تەڭگەدەن اۋداردى. دەپارتامەنتتە وتكەن مەرەكەلىك ءىس-شارا بارىسىندا 2002 جىلى قارعالى اۋدانىندا قىلمىسكەرلەردى قۇرىقتاۋ كەزىندە قازا تاپقان ابات نۇرىمجانوۆتىڭ جەسىرى مارينا نۇرىمجانوۆا كوزىنە جاس الىپ تۇرىپ, العىسىن ءبىلدىردى: «جولداسىم ابات سول كەزدە قارعالى اۋداندىق ىشكى ىستەر ءبولىمى باستىعىنىڭ جەدەل جۇمىس بويىنشا ورىنباسارى بولدى. ەكى قىلمىسكەردى قىلمىستارى ۇستىندە ۇستاماق بولعان كەزدە قاپىدا قازا تاپتى. اقتوبە وبلىسى ءىىد ءبىزدى قامقورلىقسىز قالدىرعان جوق. اسىراۋشىمىزدان ايىرىلعان سوڭ مەنى قىزمەتكە قابىلداپ, جولداسىمنىڭ ءىسىن جالعاستىردىم. بۇگىندە پوليتسيا كاپيتانى شەنىندە قىزمەت اتقارىپ وتىرمىن. مورالدىق جانە ماتەريالدىق كومەكتەرىن اياپ جاتقان جوق. مەن ەڭ الدىمەن ءىىد باستىعى ماحامبەت ابيساتوۆ پەن ارىپتەستەرىمە ايرىقشا ريزاشىلىعىمدى بىلدىرگىم كەلەدى. جاڭا جىل الدىندا بەرىلگەن بۇل قوماقتى سوما كوپتەگەن الەۋمەتتىك ماسەلەلەرىمىزدى شەشۋگە كومەك بولدى, اسىرەسە, كىشى قىزىم ليليا قاتتى قۋاندى, ول وسى قاراجاتتان ورىنبور قالاسىنا بارىپ كوزىنە وپەراتسيا جاساتپاقشى», – دەدى. مىنە, وسىنداي ساۋاپتى ءىس كوپكە ونەگە دەپ سانايمىز. لاۋرا زابيحوۆا, جۋرناليست اقتوبە