ەل تاۋەلسىزدىگىنىڭ مەرەيتويى قارساڭىڭدا اتىراۋلىق پوشتا وكىلدەرى ءۇشىن دە وڭ وزگەرىستەر مەن يگى جاڭالىقتار ورىن الدى. «قازپوشتا» اق ءوز كليەنتتەرىنە كورسەتىلەتىن قىزمەت تۇرلەرىنە وزگەرتۋلەر ەنگىزىپ, جاڭارتۋ باعدارلامالارىن ىسكە اسىرۋدا. سونىمەن قاتار, قالانىڭ بىرنەشە بولىمشەسىندە جوندەۋ جۇمىستارى جۇرگىزىلىپ جاتىر.
«قازىر جوندەۋ جۇمىستارى قولعا الىنعان بولىمشەلەردىڭ ءبىرى اباي كوشەسى, №6 ۇيىندە ورنالاسقان ورتالىق قىزمەت كورسەتۋ بولىمشەسىنەن بولەك №7, №5 جانە №3 پوشتا بايلانىسى ءبولىمشەلەرىنە دە جاڭارتۋ جۇمىستارى جۇرگىزىلەدى. بۇدان باسقا وبلىستاعى ءتورت اۋدان (قۇرمانعازى, قىزىلقوعا, جىلىوي, يساتاي) ورتالىعىنداعى بولىمشەلەر دە كەزەگىمەن جاڭارتىلاتىن بولادى», دەيدى اتىراۋ وبلىستىق فيليالىنىڭ ديرەكتورى باۋىرجان وتەپباەۆ.
«سامۇرىق-قازىنا» ءال-اۋقات قورىنىڭ قولداۋىمەن ىسكە اسىپ جاتقان بۇل باعدارلاما اياسىندا تۇرعىندارعا ىڭعايلى بولۋ ءۇشىن دە ءبىراز ەڭبەك جاسالدى. بۇل رەتتە, سالەمدەمەلەردى الۋ قىزمەتى دە بۇرىنعىدان الدەقايدا جەڭىل وتەتىنىن اتاپ وتكەن ءجون. ەندى كليەنتتەرگە كەزەكتە تۇرۋدىڭ قاجەتى جوق. ول ءۇشىن ارنايى «ءسالەمدەمەلەر سۋپەرماركەتى» جۇمىس جاسايدى. كليەنت الدىن الا سمس ارقىلى حابارلاندىرىلادى. كەيىن ءوز پوشتا بولىمشەسىندە تەرمينال كومەگىمەن زاتتارى تۇرعان ۇياشىعىنىڭ ءنومىرىن الىپ, سالەمدەمەسىن ءوزى الادى. ەڭ باستىسى, جەكە باسىن راستايتىن جەكە كۋالىگى بولۋى شارت. بۇل كومپانيانىڭ شىعىندارىن قىسقارتۋعا دا ەداۋىر سەپتىگىن تيگىزبەك.
سونىمەن قاتار, پوشتا ءبولىمشەلەرى ءبىرشاما زاماناۋي قۇرىلعىلارمەن قامتىلماق. بولىمدەر بىرنەشە زالعا بولىنەدى. بۇنىڭ الدىندا قاجەتتى قىزمەتتەرى ءارتۇرلى ادامدار ءبىر كەزەككە تۇرسا, ەندى ارقايسىسى ءۇشىن ارنايى ءبولىم جۇمىس جاسايتىن بولادى. بۇل دا كليەنتتەر مەن قىزمەتكەرلەردىڭ ۋاقىتىن ۇنەمدەۋگە بىردەن-ءبىر جول. جاڭارتىلعان پوشتالاردا قارجىلىق اۋدارىمدار, پوشتا بايلانىسى, اقشا ايىرباستاۋ سىندى قىزمەتتەر ءۇشىن ارنايى بولىمدەر اشىلماق. ولاردىڭ بارلىعى دا بانكومات, پوستومات سياقتى جاڭا تەحنولوگيالارمەن جابدىقتالادى. ال جەكە تۇلعالار مەن كورپوراتيۆتىك كليەنتتەر ءۇشىن ارنايى وپەراتسيالىق زال ىسكە قوسىلادى. ايتا كەتۋ كەرەك, مۇمكىندىگى شەكتەۋلى ازاماتتار ءۇشىن دە ارنايى, تەز ءارى وڭاي كورسەتىلەتىن قىزمەتتەر قاراستىرىلعان.
بۇدان بولەك, حالىقپەن تىكەلەي قارىم-قاتىناس ورناتىپ, قىستىڭ قاھارلى ايازى مەن جازدىڭ شىلىڭگىر ىستىعىندا دا اياقتارى تالماي جۇمىس جاسايتىن پوشتاشىلارعا قۋانۋعا سەبەپ تابىلدى. ەل ەگەمەندىگىنىڭ 25 جىلدىعىنا وراي ولارعا قىزمەتتە پايدالانىلاتىن 8 كولىكتىڭ كىلتى سالتاناتتى تۇردە تابىستالدى. الداعى ۋاقىتتا ەلىمىزدە ءالى دە 40 كولىك پەن قاجەتتى قۇرال-جابدىقتار بولىنبەك. ال جوندەۋ جۇمىستارىنان ەلىمىز بويىنشا ءجۇز پوشتا بولىمشەسى ءوتۋى ءتيىس. جانە بۇل كۇتىپ تۇرعان جاقسى وزگەرىستەردىڭ تەك ءبىر پاراسى عانا.
بەك كەنجەەۆ
اتىراۋ
