اللوتەي: مەن قانات يسلامدى نوكاۋتقا تۇسىرەمىن

WBO Intercontinental بەلبەۋى ءۇشىن بولعان جەكپە-جەكتە قازاقستاندىق قانات يسلامنان (22-0, 18 كو) جەڭىلىپ قالعان گانالىق بوكسشى پاتريك اللوتەي (35-3, 28 كو) قازاقستاندىقپەن تاعى دا جۇدىرىقتاسقىسى كەلەتىنىن ايتتى, دەپ حابارلادى Vesti.kz. بوكسشىنىڭ ايتۋىنشا, ول تورەشىلەر دۇرىس شەشىم شىعارمادى دەپ ەسەپتەيدى ەكەن. "مەن سوڭعى جەكپە-جەكتە ۇپاي سانى بويىنشا جەڭدىم (گانادا جۇدىرىقتاسقان وتانداسى دجوردجيو اميزۋدى ايتىپ وتىر). اميزۋمەن جەكپە-جەك وڭاي بولعان جوق. ونى نوكاۋتقا تۇسىرگىم كەلدى, بىراق مۇندا باستىسى جەكپە-جەكتى باقىلاۋدا ۇستاۋىم كەرەك بولدى. ءادىس بويىنشا جەكپە-جەك ءساتتى بولدى", - دەدى اللوتەي. سونىمەن قاتار, بوكسشى الەم چەمپيونى بولۋدى ماقسات تۇتاتىنىن ايتتى. "كەلەسى جەكپە-جەگىمنىڭ قاشان وتەتىنىن بىلمەيمىن, سەبەبى مەنىڭ پروموۋتەرىم جوق", - دەيدى ول. سۇحبات بارىسىندا گانالىق بوكسشى قانات يسلاممەن تاعى دا جۇدىرىقتاسقىسى كەلەتىنىن ايتتى. "تاعاتسىزدانا كۇتىپ ءجۇرمىن. سەبەبى تورەشىلەر دۇرىس شەشىم شىعارمادى. بۇل جەكپە-جەكتە جەڭىسكە جەتكەنىمدى بىلەمىن. رەۆانش بولسا, مىقتىراق ەكەنىمدى دالەلدەيمىن. مۇمكىندىك بەرىڭىزدەر, سوندا مەن يسلامدى نوكاۋتقا تۇسىرەمىن", - دەپ مالىمدەدى ول. ال وسىعان دەيىن قانات يسلامنىڭ جەكپە-جەكتى نوكاۋتپەن جەڭۋگە جاراقاتى كەدەرگى بولعانىن مالىمدەگەن بولاتىن. گانالىق بوكسشى بۇعان قاتىستى بىلاي پىكىر ءبىلدىردى: "قانات ءوزىن-ءوزى الداپ ءجۇر! قولىن جاراقاتتاپ الۋىن مەن ماجبۇرلەدىم. مەنىڭ دە ەكى قولىما زاقىم كەلدى, بىراق مەن بۇل جايلى ەشكىمگە ايتپادىم دا. ەگەر ول مەنى نوكاۋتقا تۇسىرەمىن دەپ سەنسە, تاعى ءبىر كەزدەسەيىك. قانات يسلامدى قۇرمەتتەيمىن, بىراق جەكپە-جەك قازاقستاندا وتپەسە, ناتيجە باسقاشا بولار ەدى", دەدى ول. ەستەرىڭىزگە سالا كەتسەك, قانات يسلام مەن پاتريك اللوتەيدىڭ جەكپە-جەگى الماتىدا 29 قازاندا وتكەن بولاتىن.