جالاۋ جەتىنشى رەت جەلبىرەدى

قازاقستان رەسپۋبليكاسىنىڭ كونستيتۋتسياسى كۇنى قارساڭىندا بايراعىن كوتەرگەن قول كۇرەسىنەن ازيا جانە تىنىق مۇحيتى جاعالاۋى ەلدەرىنىڭ ح ازيا چەمپيوناتى ءوز مارەسىنە جەتتى. ءۇش كۇنگە سوزىلعان تارتىستى باسەكەدە وزگە قارسىلاستارىنان جاقسى ونەر كورسەتكەن (1257 ۇپاي) قازاقستان قۇراماسى وسىمەن جەتىنشى رەت اتالعان سپورت تۇرىنەن ازيا چەمپيونى اتاندى. ەكىنشى جۇلدەلى ورىنعا 256 ۇپاي جيناعان كورشىلەس وزبەك ەلىنىڭ سپورتشىلارى يە بولسا, ءۇشىنشى ورىن قىرعىز قۇراماسىنا بۇيىردى. ولاردىڭ قورجىنىندا – 246 ۇپاي. ءتورتىنشى ورىنعا 18 سپورتشى اكەلگەن يران تابان تىرەدى. – وسى جىلدىڭ 2 جەلتوقسانى كۇنى الماتىداعى بالۋان شولاق اتىن­­­داعى سپورت سارايىندا الەمنىڭ 53 مەملەكەتىنىڭ 1 800 سپورتشىسى ءوزارا كۇش سىناساتىن 33-ءشى الەم چەمپيوناتى وتەدى دەپ كۇتىلۋدە. ەل سپورت­­شى­لارى وسى الەمدىك دودادا تاعى دا توپ جارىپ شىعاتىن­دىق­تارىنا سەنىمدىمىن, – دەيدى قول كۇرەسىنەن ازيا فەدەراتسياسىنىڭ پرەزيدەن­تى, حالىق­ارا­لىق جارىستاردىڭ بىرنەشە دۇركىن جەڭىمپازى مۇ­حامەتوللا اعزاموۆ. ونداسىن ەلۋباي. * * * ولگانىڭ  كۇمىس ولجاسى جەڭىل اتلەتيكادان وڭتۇستىك كورەيانىڭ تەگۋ قالاسىندا ءوتىپ جاتقان الەم چەمپيوناتىندا ولگا رىپاكوۆا ءۇش قارعىپ سەكىرۋدەن كۇمىس مەدالدى جەڭىپ الدى. وسى جۇلدەنى ولگا رىپاكوۆانىڭ التىنعا بەرگىسىز جۇلدەسى دەۋگە بولادى. بۇل جولى ول بيىلعى ماۋسىمدا سەكىرگەن ناتيجەسىن قايتا­لا­عان­دا, التىن جۇلدەنى دە جەڭىپ الاتىن ەدى. سول كەزدە ولگانىڭ 14,96 مەترگە سەكىرگەنىن بىلەمىز. ال كورەياداعى الەم چەمپيوناتىندا قازاق­ستاندىق جەڭىل اتلەتكە التىن مەدالدى جەڭىپ الۋ ءۇشىن التى-اق سانتيمەتر جەتپەي قالدى. ءسويتىپ, ول باس جۇلدەنى يەلەنگەن ءوزىنىڭ اتتاسى ۋكراينالىق ولگا سالادۋحانىڭ سەكىرگەن 14,94 مەترىنە جەتە المادى. و.رىپاكوۆانىڭ فينالداعى ناتيجەسى ونىڭ الدىڭعى كۇندەرگى ىرىكتەۋ سەكىرىستەرىنەن الدەقايدا جاقسى ەكەنىن ايتۋ كەرەك. الەم چەمپيو­نا­تى باستالعان كەزدە ول ءۇش قارعىپ سەكىرۋ سەكتورىندا باستى قارسىلاسى يارگيليس ساۆينەمەن ءبىر توپتا سىنعا ءتۇسىپ, العاشقى تالپىنىسىن ءساتسىز اياقتاعان ەدى. سول كەزدە ول سىزىقتى باسىپ كەتكەن بولاتىن. ال ەكىنشىسىندە 14,33 مەترگە سەكىرىپ, فينالعا جولداما العان ەدى.  وسى سىندا لوندون وليمپياداسىنىڭ جولداماسىنا قول جەتكىزگەن تاعى ءبىر سپورتشىمىز يرينا ەكتوۆا ىرىكتەۋدەن وتە المادى. سونداي-اق بيىكتىكتەن سەكىرۋ سەكتورىندا مارينا ايتوۆا دا فينالعا شىعا العان جوق. ول 1,89 مەترگە سەكىرىپ, 19-شى ورىندى يەلەنسە, 800 مەترگە جۇگىرۋدە مارگاريتا ماتسكو 31-ءشى ورىننان كورىندى. و.رىسپاكوۆانىڭ كۇمىسى الەم چەمپيوناتىندا قازاقستاندىق سپورت­شىلار قول جەتكىزگەن جالعىز مەدال بولىپ قالىپ وتىر. * * * «ەگەمەن» ليگادا وينايدى وسى كۇندەرى استانا مەن الماتى قالالارىندا شاعىن فۋتبولدان اۋەسقوي فۋتبولشىلار ليگاسى وتۋدە. وعان بارلىعى 100-دەن استام كوماندا قاتىسۋدا. استاناداعى قالالىق چەمپيونات وسىدان بىرنەشە كۇن بۇرىن باستالسا, الماتىداعى جارىس 3 قىركۇيەك كۇنى جالاۋىن كوتەردى. وسى ەكى قالادا ءوتىپ جاتقان جارىستىڭ ءبىر ەرەكشەلىگى, استاناداعى باسەكەگە 24 كوماندا قاتىسىپ, «ا» ليگاسىندا ويناسا, الماتىداعى چەمپيونات «ا», «ۆ», «س» بولىپ ءۇش ليگاعا بولىنگەن. اتالعان ليگالاردىڭ ارقايسىسىندا 18 كوماندا كۇش سىناسۋدا. بيىل ليگادا وينايتىن كوماندالاردىڭ قاتارى بىرنەشە ۇجىممەن تولىقتى. ولاردىڭ اراسىندا فۋتبولدان «ەگەمەن قازاقستان» گازەتىنىڭ كومانداسى دا بار. كوماندانىڭ اتى «ەگەمەن» دەپ اتالادى. جالپى, «ەگەمەن قازاقستان» گازەتى كومانداسىنىڭ وسىدان بىرنەشە جىل بۇرىن اۋەسقوي فۋتبولشىلار ليگاسى باستالعالى بەرى باق اراسىندا Air Astana, K cell, Beeline, قازكوممەرتسبانك, حالىق بانكى, بازيس-ا سياقتى بانكتەر, جەكەلەگەن فيرمالار, ۇيالى بايلانىس وپەراتورلارى مەن باسقا دا كوپتەگەن ۇجىمدارمەن باسەكەلەسىپ, چەمپيوناتقا قاتىسىپ جۇرگەن جالعىز كوماندا ەكەنىن ايتۋ كەرەك. «استانا قالاسىنىڭ اۋەسقوي فۋتبولشىلار ليگاسى» قوعامدىق بىرلەستىگىنىڭ توراعاسى ەرلان جارىلقاسىنوۆتىڭ ايتۋىنشا, وسىنداي باسەكەلەستىكتىڭ ارقاسىندا كوماندالار تاجىريبە جيناقتاپ, سپورتتىق بابىن جىل سايىن ارتتىرىپ كەلەدى. قازىر الماتىدا عانا ەمەس, استاناداعى ليگادا دا جان الىسىپ, جان بەرىسىپ جاتقان كوماندالار كوبەيە تۇسۋدە. ولاردىڭ ويىندارىنا الەكسەي پۋگاچەۆ, گەورگي چەحوۆسكي, ورىنباسار داۋرەنبەكوۆ, ۆالەري ساليموۆ سياقتى ازاماتتار تورەلىك جاساۋدا. بۇل ۇدەرىستى ەلىمىز فۋتبولىن دامىتۋعا قوسىلىپ جاتقان ۇلكەن ۇلەس دەۋىمىز كەرەك. داستان كەنجالين. سۋرەتتى تۇسىرگەن ورىنباي بالمۇرات.