تۇيمەباەۆ شىمكەنت قالاسىنىڭ اۋەجايىن رەتكە كەلتىرۋدى تاپسىردى

وڭتۇستىك قازاقستان وبلىسىنىڭ اكىمى جانسەيىت تۇيمەباەۆ شىمكەنتتى ارالاپ, شاھاردى اباتتاندىرۋ جۇمىستارى بويىنشا قالانىڭ باسشىلىق قۇرامىمەن كوشپەلى كەڭەس وتكىزدى, دەپ حابارلادى وبلىس اكىمدىگىنىڭ ءباسپاسوز قىزمەتى. وبلىس باسشىسى شىمكەنت اۋەجايىن ارالاپ, اۋەجاي ماڭىنداعى كولىك تۇراعى مەن اباتتاندىرۋدى الەمدىك ستاندارتتارعا ساي ەتۋدى تاپسىردى. ەڭ باستى ماسەلە تازالىق پەن ءتارتىپ ەكەنىن ەسكەرتتى. «قالامىزعا كەلەتىن شەتەلدىك قوناقتار سانى جىل ساناپ ارتىپ كەلەدى. سوندىقتان ءبىرىنشى كەزەكتە اۋەجايىمىزدى رەتكە كەلتىرۋىمىز قاجەت. مۇنداعى كولىك تۇراقتارى مەن اباتتاندىرۋ جۇمىستارىن الەمدىك ستاندارتقا ساي ەتىپ جاساۋعا ءتيىسپىز», – دەدى جانسەيىت قانسەيىت ۇلى. وبلىس اكىمىنىڭ ەرەكشە كوڭىل بولگەن ماسەلەسى – جەر تەلىمدەرى. بۇل سالادا جۇيەسىزدىك پەن زاڭسىزدىق كوپ ورىن العاندىقتان اتالعان جايت تياناقتى زەردەلەۋدى قاجەت ەتەدى. قالانىڭ باس جوسپارىنا ساي ەندى جەر تەلىمدەرى جەكە سەكتورداعى ءۇي قۇرىلىسىنا ەمەس, ەڭسەلى كوپقاباتتى تۇرعىن ءۇي كەشەندەرىن سالۋ ءۇشىن بەرىلمەك. وبلىس اكىمى شاھاردىڭ جاڭا بەت-بەينەسىن ناقتىلاۋدى تاپسىردى. سونداي-اق, ايماق باسشىسى قايناربۇلاق ساياجايىنا بارار جول بويىنداعى ساي-سالالارىن كوگالداندىرۋ جۇمىستارىنىڭ جوباسىمەن تانىستى. قالا ىشىندەگى اۋماعى 600 گەكتار ءۇش بىردەي تابيعي ساي-سالالار كەلەشەكتە سايالى ساياباقتارعا اينالۋى ءتيىس. بۇل بىرەگەي جوبا قۇرىلىسى كوكتەمدە قارقىن الۋى قاجەت. سايلاردا ورنالاساتىن دەمالىس ورىندارىندا بالالار ويىن الاڭشالارى مەن سپورت الاڭدارى, شاعىن ارحيتەكتۋرالىق كەسكىندەر, ورىندىقتار, جول شامدارى ورناتىلىپ, اعاش كوشەتتەرى وتىرعىزىلادى. اكىم سونداي-اق, اكىمشىلىك ىسكەرلىك ورتالىعى, استانا داڭعىلى, ۇ.ارعىنبەكوۆ كوشەلەرىندەگى كوگالداندىرۋ جۇمىستارىن دا نازاردان تىس قالدىرعان جوق. قالانى ارالاۋ بارىسىندا ءتيىستى قۇرىلىم جەتەكشىلەرىنە تاپسىرمالار بەرىلىپ, قىسقا مەرزىمدە نəتيجەگە قول جەتكىزىلۋ مىندەتتەلدى.