باۋىرجان بايبەك تاشكەنت قالاسىنىڭ اكىمىمەن كەزدەستى

الماتىدا وتكەن كەزدەسۋدە باۋىرلاس ەكى حالىقتىڭ, تاعدىرلاس ەكى قالانىڭ اتىنان ءسوز سويلەگەن شاھار باسشىلارى تاريحي بايلانىستاردىڭ ەكى ارادا بۇعان دەيىن دە ەشقاشان ۇزىلمەگەنىن تىلگە تيەك ەتتى. ونىڭ ايقىن كۋاسى – قازىرگى تاڭدا الماتىدا 129 بىرىككەن, 236 وزبەك كاسىپورىندارى قارقىندى جۇمىس ىستەپ كەلەدى. الماتى قالاسىنىڭ اكىمى باۋىرجان بايبەك وتكەن جىلدىڭ 10 ايىمەن سالىستىرعاندا اراداعى تاۋار اينالىمى 62 پايىزعا ءوسىپ, 200 ميليون اقش دوللارىن قۇراعانىن دا ەسكە سالۋدى ۇمىتپادى. بيزنەس پەن جەكە كاپيتالدىڭ نەگىزگى بولىگى, بانكتەردىڭ باس كەڭسەلەرىنىڭ 90 پايىزى وسى الماتىدا ورنالاسقانىن العا تارتا سويلەگەن اكىم مۇندا «كەلەم دەۋشى» بارشا ينۆەستورلارعا ەسىكتىڭ ايقارا اشىق ەكەنىن, سونداي-اق وزدەرىن تاشكەنت پەن جالپى وزبەكستاننىڭ تۋريستىك كلاستەرىنىڭ دامۋى قىزىقتىرىپ وتىرعانىن ايتىپ ءوتتى. ءوز كەزەگىندە تاشكەنت قالاسىنىڭ حاكىمى راحمونبەك ۋسمانوۆ بۇل ساپارىندا, اسىرەسە الماتىنىڭ «قولجەتىمدى باسپانا-2020» مەملەكەتتىك جوباسىنا ەرەكشە نازار اۋدارا كەلگەنىن جاريا ەتتى. «ءبىزدىڭ تاشكەنت ءۇشىن بۇل جوبا وتە كوكەيتەستى ماسەلە ەكەنىن ايتار ەدىم. سوندىقتان دا ءبىز بولاشاقتا وسى باعدارلامانىڭ ءىس-تەتىكتەرىن ءوزىمىزدىڭ تاجىريبەمىزدە پايدالانساق دەگەن نيەتتەمىز», – دەدى راحمونبەك ۋسمانوۆ. كەزدەسۋ بارىسىندا الماتىدا وتەتىن 28-ءشى الەمدىك قىسقى «ۋنيۆەرسيادا-2017» ويىندارىنا وزبەك سپورتشىلارىنىڭ دا قاتىساتىندىقتارى ءمالىم بولدى. تالعات ءسۇيىنباي, «ەگەمەن قازاقستان»