ەرەكشە مۇقتاجدىقتارى بار مۇمكىندىگى شەكتەۋلى بالالارعا ارنالعان پسيحولوگيالىق-پەداگوگيكالىق تۇزەۋ كابينەتى «دارا» قورىنىڭ «ءارتۇرلى جانە تەڭ: ءبىز ينكليۋزيۆتى ءبىلىمدى جاقتايمىز» جوباسى اياسىندا قوستاناي وبلىستىق اكىمدىگىنىڭ قولداۋىمەن اشىلدى.
قوستاناي وبلىسىندا ەرەكشە مۇقتاجدىققا يە ون مىڭنان استام بالا تۇرادى. دامۋىندا وزگەرىس, ەرەكشەلىگى بار بالانىڭ اتا-اناسى ونى ءارى قاراي وسىرۋدە, وقىتىپ, دامىتۋدا ءوز پروبلەماسىمەن ءوزى بەتبە بەت وڭاشا قالادى. وسىعان وراي, قوستاناي قالاسىندا مۇگەدەك بالالار مەن ولاردىڭ وتباسىنا ءتيىمدى كومەك كورسەتەتىن ورتالىق ءبىرىنشى رەت اشىلدى. وندا ەرەكشە مۇقتاجدىعى بار مۇگەدەك بالالارعا كومەك بەرەتىن دەفەكتولوگ, پسيحولوگ, تيفلوپەداگوگ, لوگوپەد, سۋردوپەداگوگ, ماسساج جاساۋشى ماماندار بار. ورتالىقتا بالالاردىڭ الاڭسىز ويناۋىنا, ءجۇرىپ-تۇرۋىنا كەدەرگىسىز ءارى جابدىقتىڭ بارلىعى ارنايى ادىستەمە بويىنشا جاسالعان.
«كەز كەلگەن بالا وزگەلەرمەن تەڭ ءبىلىم الۋعا قۇقىلى. بالالاردىڭ بويىنداعى ەرەكشە قابىلەتتەرىن دامىتىپ, ولاردىڭ ومىردەن لايىقتى ورنىن تابۋىنا مۇمكىندىك جاسايتىن كابينەتتى اشۋعا ۇلەسىن قوسقان ازاماتتارعا العىسىم شەكسىز», – دەدى وبلىس اكىمى ارحيمەد بەگەجان ۇلى.
ورتالىققا 7 جاسقا دەيىنگى 125 بالا تىركەلگەن. ولار مامانداردان كەرەگىنشە كومەك الا الادى. «دارا» قايىرىمدىلىق قورىنىڭ جوبالار باسشىسى مارال شەشەمبەكوۆا مۇگەدەك بالانى دامىتۋ ءۇشىن ورتالىقتىڭ ماڭىزى زور ەكەندىگىن ايتتى.
كابينەتتەردى ارالاپ كورگەن وبلىس اكىمى ارحيمەد مۇحامبەتوۆ سۋردوكابينەتكە قاجەتتى جابدىقتار جانە كومپيۋتەرلىك تەحنيكا الۋ ءۇشىن قارجىلاي كومەك سەرتيفيكاتىن تاپسىردى.
ءنازيرا جارىمبەتوۆا,
«ەگەمەن قازاقستان»
