الاكول اۋدانىندا مايلى داقىلدار وڭدەيتىن زاۋىت اشىلدى

بۇگىن الماتى وبلىسىنىڭ اكىمى اماندىق باتالوۆ الاكول اۋدانىندا «25 جىلدىققا – 25 كاسىپورىن» اكتسياسىنىڭ اياسىندا «الاكول – نان» جشس-نىڭ مايلى داقىلدار وڭدەيتىن زاۋىتىن سالتاناتتى تۇردە اشتى, دەپ حابارلادى الماتى وبلىسى اكىمىنىڭ ءباسپاسوز قىزمەتى. مايلى داقىلداردىڭ بارلىق تۇرلەرىن وڭدەيتىن زاۋىتتىڭ جالپى قۇنى – 450 ملن تەڭگە, ونىڭ ىشىندە 130 ملن تەڭگەسى «قازاگروقارجى» اق ارقىلى قارجىلاندىرىلعان. جوبانىڭ جالپى قۋاتتىلىعى تاۋلىگىنە 40 توننا مايلى داقىلداردى وڭدەيدى. «ەلىمىزدە وسىرىلەتىن سويانىڭ 95 پايىزى الماتى وبلىسىندا وسەدى. وڭىرىمىزدە سويا وڭدەيتىن ءتورت زاۋىت بار. بۇل – بەسىنشىسى. ەلباسى ەلدى مەكەندەردە اسا اۋقىمدى بولماسا دا وسىنداي 30-50 ادامدى جۇمىس ورنىمەن قامتيتىن شاعىن زاۋىتتاردى ىسكە قوسۋ قاجەتتىگىن تاپسىرعان بولاتىن. سوندىقتان مۇنداي كاسىپورىنداردىڭ سانىن ءالى دە كوبەيتەتىن بولامىز», – دەدى وبلىس اكىمى. سويا وسىرەتىن شارۋا قوجالىقتارىنىڭ ايتۋىنشا, بۇعان دەيىن وسىرگەن ونىمدەرىن وتكىزەتىن ورىن تابۋ قيىندىق تۋدىراتىن جانە وتكىزگەن كۇننىڭ وزىندە ارزانعا كەتەتىن. ال جاڭا اشىلعان بۇل زاۋىت ديقانداردان ءونىمدى 1 تونناسىن 140 مىڭ تەڭگەدەن قابىلدايدى. بۇل شارۋالار ءۇشىن دە اسا ءتيىمدى بولىپ وتىر.