مەملەكەت باسشىسى مەن يران پرەزيدەنتى اراسىندا شاعىن كەلىسسوز ءوتتى

اقوردادا ەلباسى نۇرسۇلتان نازارباەۆ پەن يران يسلام رەسپۋبليكاسىنىڭ پرەزيدەنتى حاسان رۋحاني اراسىندا شاعىن قۇرامداعى كەلىسسوز وتۋدە, دەپ حابارلادى قازاقپارات. قازاقستانعا رەسمي ساپارمەن كەلگەن يران پرەزيدەنتىن اقوردادا نۇرسۇلتان نازارباەۆ قارسى الىپ, تاراپتار ءبىر-بىرىنە ءوز ەلدەرىنىڭ ۇكىمەت مۇشەلەرىن تانىستىردى. كەلەسى كەزەكتە قازاقستان پرەزيدەنتى مەن مارتەبەلى مەيمان ارنايى دايىندالعان مىنبەرگە كوتەرىلىپ, ەكى ەلدىڭ ءانۇراندارى شىرقالدى. وسىدان كەيىن پرەزيدەنتتەر سالتاناتتى جاعدايعا وراي ساپ تۇزەگەن قۇرمەت قاراۋىلىنىڭ الدىمەن ءجۇرىپ ءوتىپ, شاعىن قۇرامداعى كەلىسسوزدەر وتكىزۋ زالىنا كىردى. شاعىن قۇرامداعى كەلىسسوزدەن كەيىن تاراپتاردىڭ كەڭەيتىلگەن قۇرامداعى كەلىسسوزدەرى كۇتىلۋدە. كەلىسسوزدەر قورىتىندىسىنا وراي قازاقستان مەن يران ءبىرىنشى باسشىلارىنىڭ بىرلەسكەن مالىمدەمەسى مەن ەكىجاقتى ىنتىماقتاستىق قۇجاتتارىنا قول قويۋ جوسپارلانعان.