سەنات ساۋساق ءىزىن مىندەتتى تاپسىرۋ تۋرالى زاڭ جوباسىن قابىلدادى

بۇگىن پارلامەنت سەناتىنىڭ جالپى وتىرىسىندا جوعارعى پالاتا دەپۋتاتتارى «داكتيلوسكوپيالىق جانە گەنومدىق تىركەۋ تۋرالى» زاڭ جوباسىن قابىلدادى, دەپ حابارلايدى قازاقپارات. «زاڭ جوباسى داكتيلوسكوپيالىق جانە گەنومدىق تىركەۋ جۇرگىزۋگە جانە سول اقپاراتتى ادامنىڭ جەكە تۇلعاسىن انىقتاۋ مەن راستاۋ ماقساتىندا قولدانۋعا قۇقىقتىق نەگىز بەرەدى»,-دەپ حابارلادى قر ىشكى ىستەر ءمينيسترى قالمۇحانبەت قاسىموۆ زاڭ جوباسىن تانىستىرا وتىرىپ. ءمينيستردىڭ ايتۋىنشا, ساۋساق ءىزىن الۋ حالىقارالىق دەڭگەيدە كەڭىنەن قولدانىلاتىن تاجىريبە جانە ادامنىڭ جەكە تۇلعاسىن انىقتايتىن ۇلتتىق قۇجاتتاردا قولدانىلىپ جۇرگەن حالىقارالىق ستاندارتقا اينالعان. 2009 جىلدان بەرى  قازاقستاندىقتار جەكە تولقۇجات پەن جەكە باسىن كۋالاندىراتىن قۇجاتقا سۋرەتىن, ءوزى تۋرالى اقپاراتتى, قولىن ەلەكتروندى چيپ ارقىلى ورناتىپ ءجۇر  ال, ساۋساق ءىزىن تىركەۋ تۋرالى زاڭ جوباسىندا داكتيلوسكوپيالىق جانە گەنومدىق تىركەۋگە جاتاتىن تۇلعالاردىڭ توبى, سونداي-اق ونى جينايتىن جانە ساقتاۋعا جاۋاپتى مەملەكەتتىك ورگانداردىڭ تولىق تىزبەسى انىقتالادى. 1992 جىلى قازاقستان قۇجاتتاردىڭ بيومەتريكالىق پارامەترلەرى تۋرالى حالىقارالىق كەلىسىمدى راتيفيكاتسيالادى. قازىرگى كەزدە تۇلعانى كۋالاندىراتىن 11 قۇجاتتىڭ جەتەۋىندە بيومەتريكالىق كورسەتكىشتەردى ەنگىزۋ قاراستىرىلادى. ءبىزدىڭ تولقۇجاتتار مەن جەكە كۋالىكتەردە ەلەكتروندى چيپتەر بەكىتىلگەن, بۇلار ارقىلى بيومەتريكالىق مالىمەتتەردى ەنگىزۋگە بولادى. داكتيلوسكوپيكالىق تىركەۋ تولقۇجات پەن جەكە كۋالىكتى نەمەسە تەڭىزشىنىڭ جەكە كۋالىگىن راسىمدەۋ كەزىندە ىسكە اسىرىلادى. بالالار 12-دەن 16 جاسقا دەيىن تولقۇجات العان كەزدە ولار ءوز ەركىمەن نەمەسە اتا-اناسىنىڭ كەلىسىمىمەن داكتيلوسكوپيكالىق تىركەۋگە الىنادى. 12 جاستان كىشى بالالار بۇنداي تىركەۋمەن قامتىلمايدى. سونىمەن قاتار شەتەلدىكتەر ۆيزا العان كەزدە ساۋساق ىزدەرىن تاپسىراتىن بولادى. بۇدان بولەك, داكتيلوسكوپيكالىق تىركەۋ بوسقىندارعا, ەڭبەك ميگرانتتارىنا, قازاقستاندا تۇراتىن شەتەلدىكتەرگە قاتىستى ەسكەرىلىپ وتىر.