وتاندىق ونەرتاپقىشتىڭ وزىق جوباسى

تامىز ايىندا «استانا ەكسپو-2017» ۇلتتىق كومپانياسى» اق پەن ەنەرگەتيكا مينيسترلىگى بالاما ەنەرگەتيكا سالاسىنداعى ەڭ ۇزدىك يدەيا نەمەسە جوباعا بايقاۋ جاريالاعان بولاتىن. كەشە ەكسپو ورتالىعىندا سونىڭ قورىتىندىسى شىعارىلىپ, جۇزدەن جۇيرىك, مىڭنان مىقتى شىققان ونەرتاپقىش انىقتالدى. «عالىمدار مەن ونەرتاپقىشتار اراسىنداعى جەڭىمپازدار حالىق­تىڭ جالپى داۋىس بەرۋى ارقىلى انىق­تالدى. ۇزدىك يننوۆاتسيالىق جوبا ەكسپو-2017 كورمەسىندەگى قازاق­ستاندىق پاۆيلونعا قويىلادى. بەس ايدىڭ ىشىندە جوباعا 100-دەن استام ءوتىنىش كەلىپ ءتۇستى. ارنايى قۇرىل­عان كوميسسيا مۇشەلەرى 50 جوبا­نى تاڭداپ الدى. بىزدە قىزمەت كور­سەتۋدىڭ بارلىق تۇرلەرىنە اقى تولەۋ كەرەك. ايتالىق, تۇرمىس جاي­لى بولۋ ءۇشىن كوممۋنالدىق تولەم­دەردى دەر كەزىندە تولەۋ قاجەت. ال الما­تىلىق ونەرتاپقىش مارات يسەكەەۆ تۇبىرتەكتەگى «ەلەكتر ءۇشىن» دەگەن باعاننان ءبىرجولا قۇتىلۋدىڭ جولىن ۇسىنادى. ول ەنەرگيانى تەگىن الاتىن جەل ستانساسىن جاسادى. ونىڭ جۇمىسى ءبىزدىڭ كوڭىلىمىزدەن شىقتى», دەيدى ۇيىمداستىرۋشىلار. جوبا جەڭىمپازى بولعان مارات ءوز ەڭبەگى جايلى توقتالىپ, كەڭىنەن تانىستىردى. ««مەنىڭ جوبامنىڭ اتاۋى – «كوپ دەڭگەيلى جانە كوپ قاتارلى روتور جەل ستانساسى». قازاق دالاسىندا جەل كۇشتى بولعاندىقتان, جاس عالىم­دار ۇجىمى قوندىرعىنى اۋىل­دىق جەرلەرگە ورناتىپ, ءبىزدىڭ جەل ستان­ساسى ارقىلى ولاردى تەگىن ەلەكتر قۋاتىمەن قامتاماسىز ەتۋدى ۇيعارىپ وتىر. قۇرىلىم توبەسى مەن ەدەنى بار, تەك قابىرعاسىز كوپ قاباتتى ءۇي­دىڭ قاڭقاسىن ەلەستەتەدى. ىشىندەگى تىگىنەن ورناتىلعان دىڭگەكتەرگە جەل­مەن اينالاتىن قالاقشا بەكىتىلگەن. باسقا جەل قوندىرعىلارىنان باستى ايىرماشىلىعى – وسى كونسترۋكتسيا ارقىلى بۇل وكپەك جەل اسەرىن پايدا­لانادى. ءسويتىپ, جەلدىڭ ەكپىنىن كۇ­شەي­تىپ, باسقا ستانسالارعا قاراعان­دا اناعۇرلىم كوپ ەنەرگيا الادى. بۇل تەحنولوگياداعى ەدەن مەن توبە پلي­­­تالارى ديففۋزور مىندەتىن ات­قارا­دى. ءبىز وكپەك جەلدى سوندا باعىت­تاي­­مىز. سونىڭ ارقاسىندا جەلدى پاي­­دا­لانۋ كوەففيتسيەنتى قازىر قول­دانىس­ت­ا جۇرگەن كونسترۋكتسيالارعا قارا­عاندا, 30-50 پايىزعا ارتادى. ياعني, جەل ەنەرگياسىن پايدالانۋ اسەرى 0,7-0,8-گە جەتەدى. مەن ۇسىنعان جوبا­نىڭ تاجىريبەلىك نۇسقاسىن ونەر­تاپ­قىش­تار قاپشاعايعا ورنا­لاستىرۋدى جوس­پارلاپ وتىر. قالا­دا مۇنداي ستان­سانى ءۇيدىڭ توبە­سىنە قويۋعا بولادى. 5-7 قاباتتى ءۇيدىڭ تۇر­عىن­دارىن ەلەكتر ەنەرگياسىمەن تولىق قامتاماسىز ەتۋ ءۇشىن, قوسىمشا ەكى قابات سالىنۋى كەرەك. جەل مودۋل­دەرى سوندا ورناتىلادى. ءسويتىپ, ادام­دار ەشقاشان ازايمايتىن ءارى قورشاعان ورتاعا زيانسىز جولمەن ەنەرگيا قۋاتىن الادى. تۇتىنۋ­شى­لار ورتالىقتاندىرىلعان ەلەكتر جۇيەسىنەن تاۋەلسىز بولادى ءارى قارجى ۇنەمدەيدى», دەيدى ول. بايقاۋ جەڭىمپازى مارات مۇحا­مەتقالي ۇلىنىڭ تەحنيكا عىلىم­دارىنىڭ كانديداتى, كومپيۋتەرلىك تەحنولوگيا جانە لوگيستيكا كافە­دراسىنىڭ پروفەسسورى, كازاتيسو «G-Global» جاستار شتابىنىڭ جەتەكشىسى ەكەنىن دە ايتا كەتكەن ءجون بولار. راۋان قايدار, «ەگەمەن قازاقستان»