قازاق كۇرەسى وركەن جايىپ كەلەدى

بيىلعى 29 شىلدە كۇنى گازەتىمىزدە قاراعاندى وبلىسىنداعى مەنشىكتى ءتىلشىمىز قايرات ءابىلدينوۆتىڭ ۇلتتىق كۇرەسىمىزدىڭ قازىرگى جاي-كۇيى مەن كەلەشەگى تۋرالى «قازاق كۇرەسى: وزگەرتە بەرگەننەن نە ۇتامىز؟» دەگەن ماقالاسى جارىق كورگەن ەدى. وسىعان وراي رەداكتسياعا ماقالاعا ءۇن قوسقان حاتتار كەلە باستادى. بۇگىن سولاردىڭ بىرىنە ورىن بەرىپ وتىرمىز. سوڭعى كەزدە ەلىمىزدىڭ باس باسىلىمى «ەگەمەن قازاقستاندا» قازاق كۇرەسىنىڭ جاي-كۇيىنە بايلانىستى كوپتەگەن ماتەريالدار جارىق كوردى. مۇندا سپورت ماماندارى مەن قازاق كۇرەسىنىڭ جاناشىرلارى اتالعان ماسەلەگە بايلانىس­تى وزدەرىن تولعاندىرىپ جۇرگەن جايتتاردى ورتاعا تاستادى. وسىعان وراي مەن دە ەكى-ءۇش اۋىز پىكىرىمدى ايتا كەتكەندى ءجون كورىپ وتىرمىن. ايتايىن دەگەنىم, كەيىنگى كەزدە ورال وڭىرىندە دە قازاق كۇرەسىنىڭ دامۋىنا جاڭا سەرپىن بەرىلدى. سپورتتىڭ وسى تۇرىنە دەگەن وڭ كوزقاراس قالىپتاسا باستادى. سونىڭ ناتيجەسىندە وبلىس­تا ۇلتتىق كۇرەستىڭ وركەن جايۋىنا قاجەتتى بارلىق جاعدايلار تۋعىزىلدى دەسەم ارتىق كەتپەيتىن شىعارمىن. بۇل ءۇشىن ءبىرىنشى كەزەكتە قويىلىپ وتىرعان تالاپتارعا ساي جاتتىعاتىن ورىندار بەلگىلەندى. سونىمەن بىرگە, قاجەتتى سپورتتىق قۇرال-جابدىقتار تولىق جاساقتالدى. بۇگىنگى كۇنى قايتا جاڭعىرىپ كەلە جاتقان ۇلتتىق سپورت تۇرلەرىنىڭ ىشىندە وسى قازاق كۇرەسىنە دەگەن حالىقتىڭ نازارى ەرەكشە بولىپ وتىر. مۇنىڭ ءوزى سپورتتىڭ وسى ءتۇرى بويىنشا ءار ءتۇرلى دەڭگەيدەگى سايىستار مەن جارىستاردى كوبىرەك ۇيىمداستىرۋ قاجەتتىگىن كورسەتەدى. مىسالى, ءبىز قىركۇيەك ايىنىڭ اياعىندا وبلىستىق دەنە شىنىقتىرۋ جانە سپورت باسقارماسىنىڭ قولداۋىمەن «جايىقتىڭ ارىستارى – قازاقتىڭ بارىستارى» اتتى رەسپۋبليكالىق تۋرنير وتكىزدىك. اتالعان باسەكە باتىسقازاقستاندىق قازاق كۇرەسىنىڭ وكىلدەرىمەن بىرگە وعان جاناشىرلىق ءبىلدىرىپ جۇرگەن جانكۇيەرلەردىڭ مەرەيىن دە ءبىر كوتەرىپ تاستادى. جالپى, قازاق كۇرەسىنىڭ كەڭ ءورىس الىپ, سەرپىندى تۇردە دامۋىنا «قازاقستان بارىسى» جوباسى يگى ىقپالىن تيگىزىپ كەلە جاتقانىن ايتا كەتكەن ءلازىم. بۇل ۇدەرىستى ءبىزدىڭ وڭىردەن دە بايقاۋعا بولادى. قازىرگى تاڭدا وبلىسىمىزدىڭ تۇپكىر-تۇپكىرىندە ءتول سپورتىمىزعا دەگەن قىزىعۋشىلىق كۇن ساناپ ارتىپ كەلەدى. الىستاعى اۋداندار مەن شالعايداعى اۋىلداردا بالالار مەن جاستاردىڭ قازاق كۇرەسى ۇيىرمەلەرىنە كوپتەپ كەلىپ جاتقانى دا وسى پىكىرىمىزدىڭ ءبىر دالەلى. بۇل جەردە, ارينە, باپكەر-مامانداردىڭ جەتىسپەۋشىلىگى دە بايقالىپ قالا­دى. دەگەنمەن, بولاشاقتا بۇل تىعى­رىقتان جول تاۋىپ شىعۋ جولدارىن ىزدەستىرۋ– باستى نازاردا بولماق.  يۆات ەرىشەۆ, باتىس قازاقستان وبلىسىنىڭ قازاق كۇرەسىنەن اعا جاتتىقتىرۋشىسى ورال