ىستامبۇلدا "ەۋرازيا" تۋننەلى اشىلدى. بۇل جوبا سۋاستى جولدارىمەن ىستامبۇلدىڭ ەۋروپا مەن ازيا بولىكتەرىن بايلانىستىرادى. ونىڭ اشىلۋ سالتاناتىنا تۇركيا پرەزيدەنتى رەجەپ تايىپ ەردوعان, پرەمەر-مينيستر بينالي يىلدىرىم مەن شەت ەلدەن كەلگەن قوناقتار قاتىستى, دەپ حابارلايدى Anadolu اگەنتتىگى.
اشىلۋ سالتاناتىندا ءسوز سويلەگەن تۇركيا پرەزيدەنتى "ەۋرازيا" تۋننەلى ىستامبۇلدىڭ ەۋروپا مەن ازياداعى بولىكتەرىن جالعايتىنىن ايتتى.
"اۆتوكولىك تۋننەلىنىڭ فۋندامەنتى ىستامبۇلدىڭ ازياداعى بولىگىندە قالانعان بولاتىن. ال اشىلۋ سالتاناتى ەۋروپا جەرىندە ءوتىپ جاتىر. بۇل تۋننەلدىڭ اشىلۋى وتە ماڭىزدى وقيعا", دەدى پرەزيدەنت.
رەجەپ ەردوعاننىڭ ايتۋىنشا, جىل سوڭىنا دەيىن تۋننەلدەگى جول اقىسى 15 تۇرىك ءليرىن قۇراماق. ەۋرازيالىق اۆتوكولىك تۋننەلىنىڭ ارقاسىندا كازلىچەشمە جانە گوزتەپە اۋداندارى مەن ىستامبۇل اراسىنداعى ۋاقىت 90 مينۋتتان 15 مينۋتقا قىسقارادى.
بۇل تەڭىزدىڭ استىندا وسىنداي تەرەڭدىكتە سالىنعان العاشقى تۋننەل. قۇرىلىس جۇمىستارى بوسفور تۇبىندە 106 مەتر تەرەڭدىكتە جۇرگىزىلگەن. ۇزىندىعى 14,6 كيلومەتر بولاتىن جولدىڭ 3,4 كيلومەترى تەڭىز تۇبىنەن وتەدى. جوبانىڭ جالپى قۇنى 1,25 ميلليارد دوللاردى قۇراعان.
