«زەرەك» زەردەلى جاستارعا جول اشادى

قازىرگى تاڭدا عىلىمي ىزدەنىستەردىڭ ناتيجەلى بولىپ, وندىرىسكە ەنگىزىلىپ, ەكونوميكانىڭ دامۋىنا سەرپىن بەرۋى ماڭىزدى. بۇل باعىتتا جوعارى وقۋ ورىندارىنىڭ ماتەريالدىق-تەحنيكالىق بازاسىن نىعايتۋ قايتارىمدى بولماق. وسىنداي يگى قادامنىڭ ءبىرى ولاردىڭ  جانىنان تەحنوپاركتەردى كوپتەپ اشۋ بولىپ تابىلادى. جاقىندا ەل تاۋەلسىزدىگىنىڭ 25 جىلدىعىنا وراي س.بايىشەۆ اتىنداعى اقتوبە ۋنيۆەرسيتەتىنىڭ جانىنان «زەرەك» تەحنوپاركى اشىلدى. جاڭا نىساننىڭ سال­تاناتتى اشىلۋىنا  قاتىسقان وبلىس اكىمى بەردىبەك ساپارباەۆ قالادا اشىلىپ وتىرعان تۇڭعىش تەحنوپاركتىڭ  ءوڭىر ءۇشىن اسا ماڭىزدىلىعىن اتاپ ءوتتى. اۋماق باسشىسى ءاربىر مەملەكەتتىڭ دامۋى جاڭا تەحنولوگياعا, يننوۆاتسياعا, عىلىمعا بايلانىستى ەكەنىنە, ەگەمەن ەلىمىزدە وسى كەزەڭدە عىلىم مەن ءبىلىمنىڭ قالاي دامىعانىنا توقتالدى. ەلباسى نۇرسۇلتان نازارباەۆتىڭ الدىمىزعا  دامىعان 30 مەملەكەتتىڭ قاتارىنا ەنۋ ماقساتىن قويىپ وتىرعانىنا, ول ءۇشىن شەت ەلدەگى وزىق تەحنولوگيالار مەن يننوۆاتسيالاردى ءوزىمىزدىڭ وندىرىسىمىزگە, وقۋ پروتسەسىمىزگە ەنگىزۋىمىز كەرەكتىگىنە نازار اۋداردى. – اقتوبەدەگى  بەس جوعارى وقۋ ورنىنىڭ بۇگىنگە دەيىن  بىرەۋىندە دە تەحنوپارك بولعان جوق. ال  بۇگىنگى اشىلىپ وتىرعان جاڭا نىسان جاستاردى عىلىمعا باستايدى. بۇل تەحنوپارك عىلىم مەن ءوندىرىستى بايلانىستىرادى. بۇرىن وندىرىسكە ەنگىزىلمەگەن جاڭالىقتار اۋەلى وسى تەحنوپاركتە قولدانىلىپ, سارالانىپ, ودان كەيىن وندىرىسكە ەنگىزىلەدى. بۇعان دەيىن وسى ۋنيۆەرسيتەتتىڭ جانىنان تەستىلەۋ ورتالىعى دا سالىنعان بولاتىن. بۇگىن, مىنە, تەحنوپارك سالتاناتتى جاعدايدا اشىلىپ وتىر. بۇل وسى جوعارى وقۋ ورنىنىڭ تاۋەلسىزدىگىمىزدىڭ 25 جىلدىعىنا تارتۋى. ەگەر ءار مەكەمە مەرەكەگە وسىنداي تارتۋ جاساسا, مەملە­كەتىمىز, وركەندەي تۇسەدى, – دەدى ول. سالتاناتتى جيىندا ۋنيۆەرسيتەت پرەزيدەنتى, فيلوسوفيا عىلىمدارىنىڭ دوكتورى, پروفەسسور بەكەجان احان جاڭادان اشىلىپ وتىرعان تەحنوپاركتىڭ الداعى ۋاقىتتا ەل يگىلىگىنە قىزمەت ەتەتىنىن جەتكىزدى. تەحنوپارك ديرەكتورى, تەحنيكا عىلىمدارىنىڭ كانديداتى نۇرلان الدامجاروۆتىڭ ايتۋىنشا, بۇگىنگى كۇنى «زەرەك» تەحنوپاركىندەگى ءۇش زەرتحانادا پروفەسسورلار, ستۋدەنتتەر مەن جاس عالىمدار جۇمىس ىستەۋدە. ول «عىلىمدار قورى» اكتسيونەرلىك قوعامىنا ءتورت باعىت بويىنشا كونكۋرستىق قۇجاتتارىن جىبەرگەندەرىن ايتتى. ەگەر گرانت ۇتىپ السا, الداعى ۋاقىتتا عىلىمي جۇمىستارمەن اينالىسۋعا مول مۇمكىندىك بولاتىنىن اتاپ ءوتتى. جاڭا عيمارات ءتورت قاباتتان تۇرادى. وندا كىتاپحانا قورى مەن مۇراعات, عىلىمي كىتاپحانا, زەرتحانالار, اكت زالى جانە جۇمىس بولمەلەرى بار. ساتىبالدى ءساۋىرباي, «ەگەمەن قازاقستان»