پاۆلودار بوكسى جاڭا بەلەسكە كوتەرىلدى

2016 جىل پاۆلودار بوكسىنىڭ جاڭا پاراعىن اشتى. ەرتىس بويىنداعى شاھار تۇڭعىش رەت ءبىر جىلدا ەكى بىردەي ءىرى دودانى – جاستار اراسىنداعى ازيا چەمپيوناتىن جانە ەرەسەكتەر اراسىنداعى قازاقستان بىرىنشىلىگىن قابىلدادى. كەرەكۋلىك بىلعارى قولعاپ شەبەرلەرى بۇعان دەيىن تابانى تيمەگەن بەلەستەردى دە باعىندىردى. سونداي-اق, پاۆلودار بوكس فەدەراتسياسى ەلىمىزدىڭ 2016 جىلعى ەڭ ۇزدىك ۇيىم دەپ تانىلدى. وسى ورايدا, بوكستان اسكەريلەر اراسىنداعى الەم چەمپيونى, پاۆلودار بوكس فەدەراتسياسىنىڭ اتقارۋشى ديرەكتورى ازامات ماقاجانوۆتى از-كەم اڭگىمەگە تارتقان ەدىك. – ازامات شۇعا ۇلى, قازاق­ستان چەمپيوناتى پاۆلودار ءۇشىن قالاي ءورىلدى؟ مەجەلەگەن جوسپار قانداي ەدى؟ – جوسپار مەيلىنشە كوپ جۇلدە الۋ ەدى. بوكسشىلار ونى ويداعىداي ورىندادى. سىنعا تۇسكەن 12 سپورتشىنىڭ التاۋى جۇلدەگە ىلىگىپ, بىزگە 1 التىن, 2 كۇمىس جانە 3 قولا مەدال بۇيىردى. سونىڭ ىشىندە اسا اۋىر سالماقتاعى ولجاس بوقاەۆ ءبىرىنشى رەت قازاقستان چەمپيونى اتاندى. بۇعان دەيىن ەل بىرىنشىلىگىنىڭ ءبىر رەت – كۇمىس, ەكى رەت قولا جۇلدەلەرىن ەنشىلەگەن بوكسشىمىز وسى جولى تۇعىردىڭ ەڭ بيىگىندە تۇردى. جالپى, ولجاس – تاۋەلسىزدىكتىڭ 25 جىلىندا قازاقستان چەمپيوناتىن ۇتقان ءتورتىنشى پاۆلودارلىق. العاش رەت 1993 جىلى ۆيكتور شتورم توپ جارعان-دى. 2002 جىلى مەن ەل چەمپيونى اتاندىم. ال 2007 جىلى دميتري گوتفريد التىن مەدالدى موينىنا ءىلدى. مىنە, سودان بەرى پاۆلوداردان چەمپيون شىقپاعان. سول ولقى تۇسىمىزدى ولجاس تولتىردى. – بيىلعى چەمپيونات پاۆ­لودار وبلىسىنىڭ بىرنەشە رەكوردىن جاڭارتتى... – ءيا, 6 بوكسشىمىز جۇلدەگە ءىلىندى دەدىم عوي. ولجاستان بولەك, سەرىك ءمۇسادىلوۆ (91 كيلو) پەن قۋان قۋاتوۆ (64 كيلو) كۇمىس مەدالمەن ماراپاتتالدى. شايمۇرات قۇسايىنوۆ (80 كيلو), يليا وچكين (69 كيلو) جانە سەرىك تەمىرجانوۆ (60 كيلو) قولا جۇلدەنى قاناعات تۇتتى. پاۆلودارلىق بىلعارى قولعاپ شەبەرلەرى تاۋەلسىزدىكتىڭ شيرەك عاسىرىندا مۇنداي جەتىس­تىككە العاش رەت قول جەتكىزدى. چەمپيوناتتىڭ قورىتىندىسى بويىنشا جالپىكوماندالىق ەسەپتە وڭتۇستىك قازاقستان وبلىسى ءبىرىنشى ورىندى جەڭىپ السا, ەكىنشى ورىنعا پاۆلودار وبلىسىنا ءتيدى. بۇل دا 25 جىلدا پاۆلودارلىقتارعا باعىنباي كەلگەن بەلەس ەدى. بيىل ەڭسەردىك. ءۇشىنشى ورىندى ماڭ­عىستاۋ تۇيىندەدى. چەمپيوناتتا جۇلدەگە ىلىنگەن 6 پاۆلودارلىق تا بوكستان قازاق­ستان ۇلتتىق قۇراماسىنا الىندى. مۇنداي تابىس ءوڭىر بوكسىنىڭ تاريحىندا ءبىرىنشى رەت ورىن الىپ وتىر. قازىردىڭ وزىندە ەلىمىزدىڭ باس كومانداسىنا الىنعان ولجاس بوقاەۆتىڭ «استانا ارلاندارى» ساپىندا ونەر كورسەتەتىنى بەلگىلى بولدى. – وبلىس نامىسىن قورعاعان جىگىتتەرگە كوڭىلىڭىز تولدى ما؟ كىمدەر سەنىمدى اقتامادى؟ – 52 كيلودا جۇدىرىقتاسقان ەرلان تامەموۆتەن جۇلدە كۇتىپ ەدىم. بىراق ول العاشقى جەكپە-جەگىندە-اق ۇتىلدى. مەنىڭشە, ەرلان تورەشىلەردىڭ «قۇربانى» بولعان سياقتى. ايتپەسە, ول – تاجىريبەلى بوكسشى. بىرنەشە رەت ۇلتتىق قۇراما ساپىنا دا الىنعان. 60 كيلودا ونەر كورسەتكەن سەرىك تەمىرجانوۆتى جۇلدەلەر «اۋىلىنا» جەتەدى دەپ ويلاماعان ەدىك. بۇل جارىسقا ونى ەرەسەكتەر اراسىندا تاجىريبە جيناپ, تولىسسىن دەپ قاتىستىرعانبىز. بىراق سەرىك ەرلەدى. مەن جاساعان جۇلدە الۋى ءتيىس بوكسشىلار تىزىمىندە قۋان قۋاتوۆ پەن يليا وچكين, سەرىك ءمۇسادىلوۆ پەن ولجاس بوقاەۆ, شايمۇرات قۇسايىنوۆ بولدى. اللاعا شۇكىر, ءبارى دە جۇلدە الدى. دەسە دە, شايمۇراتتىڭ ونەرىنە مۇلدەم كوڭىلىم تولعان جوق. ونىڭ مۇمكىندىگى جوعارى-تىن. دۇرىس پايدالانا المادى. ەل چەمپيونى اتانۋى ءتيىس بوكسشىنىڭ ءبىرى يليا وچكين ەدى. وكىنىشكە قاراي, ول «قولامەن» شەكتەلدى. – پاۆلودار وبلىسى ەل چەمپيوناتىن بيىلعى دوداعا دەيىن وتكىزىپ پە ەدى؟ – بىرەۋ بىلەر, بىرەۋ بىلمەس, قازاقستان تاۋەلسىزدىك العاننان كەيىنگى ەرەسەكتەر اراسىنداعى ەڭ العاشقى چەمپيونات 1993 جىلى ەكىباستۇز قالاسىندا جالاۋىن جەلبىرەتكەن. ونى وتكىزۋگە بوكستان پاۆلودار وبلىسىنىڭ قازىرگى باس جاتتىقتىرۋشىسى ۆلاديمير شۋلگا مۇرىندىق بولعان. ال پاۆلودار ەل بىرىنشىلىگىن العاش رەت 1974 جىلى وتكىزگەن ەكەن. بيىل وسىمەن بىزدە ءۇشىنشى مارتە ەل چەمپيوناتى ءوتىپ وتىر. بۇدان بولەك, وسى جىلدىڭ مامىر ايىندا بوكستان جاستار اراسىنداعى ازيا چەمپيوناتىن وتكىزدىك. وسىلايشا «سارى قۇرلىق» باسەكەسىن تۇڭعىش رەت قابىلدادىق. كىل مىقتىلار باق سىناعان دودادا پاۆلودارلىقتار سەرىك تەمىرجانوۆ پەن اياتوللا تاكەجانوۆ التىننان القا تاقتى. بۇل ايماق بوكسىنىڭ تاريحىنداعى ايشىقتى وقيعا بولدى. – شىنى كەرەك, سوڭعى 5-6 جىلدا ۇزاق ۋاقىت بويى تۇرالاپ قالعان پاۆلودار بوكسى بويىنا «قان جۇگىرە» باستادى. وڭىردەن مىقتى بوكسشىلار دا شىققان جوق. مۇنىڭ سەبەبىن قالاي تۇسىندىرەر ەدىڭىز؟ – بىرىنشىدەن, بۇعان وبلىستاعى ماتەريالدىق-تەحنيكالىق بازانىڭ جۇتاڭدىعى كەرى اسەر ەتتى. ايتپەسە, پاۆلودار توپىراعى دارىندى سپورتشىلارعا, بىلىكتى باپكەرلەرگە كەندە ەمەس. ەكىنشىدەن, سالانى قارجىلاندىرۋداعى كەمشىن تۇستار دا ايماق بوكسىنىڭ العا باسۋىنا كەدەرگى كەلتىرىپ كەلدى. كەيىن سەڭ قوزعالدى. قازاق­ستانداعى بوكستىڭ دەڭگەيى جوعارى. بىلعارى قولعاپ شەبەر­لەرىنە ازيا چەمپيوناتىندا توپ جارعاننان, ەل بىرىنشىلىگىنىڭ جارتىلاي فينالىنا جولداما الۋ الدەقايدا قيىن. سەبەبى, ءبىزدىڭ ەلدە باسەكەلەستىك كۇشتى. ال ما­تەريالدىق-تەحنيكالىق بازانىڭ جۇتاڭدىعىمەن, قارجىنىڭ از­دىعىمەن قازاقستان بوكسىنىڭ كوشىنە ىلەسۋ مۇمكىن ەمەس. اللاعا شۇكىر, قازىر پاۆلودار بوكسىنىڭ قادامى نىق. ماتەريالدىق با­زا دا جاڭاردى. جاس بوكسشىلاردى ىنتالاندىرۋعا كوڭىل بولىنۋدە. وسىنىڭ ناتيجەسىندە بولاشاعىنان زور ءۇمىت كۇتتىرەتىن جاستار بوي كورسەتە باستادى. بوكس­شىلارىمىزعا قويىلعان ەندىگى ماقسات – «كۇن استىنان» ورىن الۋ, ياعني ۇلتتىق قۇراماعا ءبىرجولا بەكىنۋ. – بوكسشىلاردى الدا قانداي جارىستار كۇتىپ تۇر؟ – ۇلتتىق قۇراماعا الىنعان جىگىتتەردىڭ الداعى ءتورت جىلى قازىردەن-اق جوسپارلانىپ تۇر. ولار 2017 جىلى ازيا چەمپيوناتى مەن الەم بىرىنشىلىگىنە قاتىسۋعا تىرىسادى. 2018 جىلى ازيا ويىندارى مەن الەم كۋبوگى كۇتىپ تۇر. 2019 جىلى وليمپيا ويىندارىنا ىرىكتەۋ دودالارى باستالادى. ال 2020 جىل – توكيو وليمپياداسى. دەمەك, كۇرزى جۇدىرىقتى جىگىتتەرگە الداعى ءتورت جىلدى قۇر جىبەرىپ الماۋ كەرەك. باستى مەجە – وليمپيا ويىندارىنا قاتىسۋ. تاۋەلسىزدىك العان 25 جىلدا پاۆلودار وبلىسىنان ءتورت جىلدىقتىڭ باستى دوداسىنا ءبىر عانا بوكسشى بارىپتى. ول – نيكولاي كۋلپين. ءبىزدىڭ ماقساتىمىز – وليمپيادادا ەل نامىسىن قورعار بوكسشى تاربيەلەۋ. – اڭگىمەڭىزگە راحمەت! جەڭىستى كۇندەر كوپ بولسىن! فارحات امىرەنوۆ پاۆلودار