نۇرسۇلتان نازارباەۆ: ۇرانىمىز «العا, قازاقستان!» بولسىن

پرەزيدەنت نۇرسۇلتان نازارباەۆ بوكستان وليمپيادا چەمپيونى دانيار ەلەۋسىنوۆتىڭ «قازاقستاننىڭ ۇرانى «العا, قازاقستان!» بولسا" دەگەن ۇسىنىسىن قولدادى. بۇل ۇسىنىستى دانيار ەلەۋسىنوۆ تاۋەلسىزدىك سارايىندا ءوتىپ جاتقان سالتاناتتى جيىندا سويلەگەندە ايتقان بولاتىن. «ەرتەڭگى قازاقستاننىڭ ازاماتتارى بۇگىنگىدەن دە ءبىلىمدى, دەنساۋلىقتارى مىقتى, پاراساتتى بولسىن. ءوز وتانىن, حالقىن عانا ەمەس, باسقا دا حالىقتاردى, بارشا ادامزاتتى سۇيەتىن عالامشار بالالارى بولىپ ءوسسىن. ءبىز مەكتەپتەردە, ۋنيۆەرسيتەتتەردە وسىنداي ادامداردى تاربيەلەيمىز. ءبىز وسىنداي قوعام قۇرۋعا ۇمتىلىپ جاتىرمىز. جاڭا وليمپيادا چەمپيونى دانيار ەلەۋسىنوۆ ايتقانداي ۇرانىمىز «العا, قازاقستان!» بولسىن! بارىمىزگە بولاشاقتا مەرەيلى تابىستار تىلەيمىن. كوك بايراعىمىز اشىق اسپانىمىزدا ماڭگى جەلبىرەي بەرسىن! تاۋەلسىزدىگىمىز تۇعىرلى, ەلدىگىمىز عۇمىرلى بولسىن! ۇلى بەلەستەردى باعىندىرۋعا - العا قازاقستان! ۇلى ماقساتتاردى ورىنداۋ جولىندا العا, حالقىم!», دەدى مەملەكەت باسشىسى.