ەندى قوستاناي وبلىستىق كوپ ءپروفيلدى جانە وبلىستىق بالالار اۋرۋحانالارى قىتايلىق ارىپتەستەرىمەن تىكەلەي بايلانىسقا شىعىپ, كەڭەستەر الا الادى. ۇرىمشىدەگى 6-شى قالالىق اۋرۋحانا ونلاين بايلانىستا بولدى.
قىتاي جاعىنان قالا مەرىنىڭ ورىنباسارى جانە دارىگەرلەر قاتىستى. ال قوستانايدان دارىگەرلەرمەن بىرگە وبلىستىق دەنساۋلىق ساقتاۋ باسقارماسىنىڭ وكىلدەرى وتىردى. قىتاي جانە قازاقستاندىق اۋرۋحانالار اراسىندا جاز ايىندا شانحاي ىنتىماقتاستىق ۇيىمى باعدارلاماسى شەڭبەرىندە كەلىسىمگە قول قويىلعان بولاتىن.
«الدىمەن تراۆماتولوگيا جانە ورتوپەديا سالاسى بويىنشا قىتايلارمەن جۇمىس ىستەيمىز, سوسىن مەديتسينانىڭ باسقا سالالارىنا كوشەمىز. بۇل كۇردەلى جاعدايلاردا بىزگە ناقتى دياگنوزدى انىقتاۋعا مۇمكىندىك بەرەدى. ونلاين بايلانىس ارقىلى قىتايلىق ارىپتەستەرگە تۇسىرىلگەن رەنتگەن ماتەريالدارىن, ناۋقاستى تەكسەرۋ قورىتىندىلارىن جانە پاتسيەنتتى كورسەتەمىز» دەيدى وبلىستىق بالالار اۋرۋحاناسىنىڭ باس دارىگەرى فازىل تەمىرحانوۆ.
ال وبلىستىق اۋرۋحانانىڭ باس دارىگەرى ۆلاديمير ستەلماح قىتايلىق ارىپتەستەرمەن كەڭەسۋ, الىستان دياگنوستيكانىڭ ناقتىلىعىن انىقتاۋ ناۋقاستاردىڭ ساپالى ەمدەلۋىنە جاعداي تۋعىزاتىنىن ايتتى.
ءنازيرا جارىمبەتوۆا
«ەگەمەن قازاقستان»
