تيموششۋك: ۇزاق ءارى كۇردەلى ماۋسىمدى وتكىزدىم

«قايرات» فۋتبول كومانداسىنىڭ بۇرىنعى جارتىلاي قورعاۋشىسى اناتولي تيموششۋك مانسابىن قايدا جالعاستىراتىنىن مالىمدەدى. بۇل تۋرالى vesti.kz حابارلادى. ۋكراينالىق فۋتبولشىنىڭ جاقىندا الماتىلىق كوماندامەن اراداعى كەلىسىمشارت مەرزىمى اياقتالعان. بۇدان كەيىن ول كيەۆ قالاسىنا كەلىپ, جاتتىقتىرۋشىلىق كۋرسىن اياقتاپ جاتىر. «قانداي جاعداي بولماسىن, سپورتتا قالامىن دەگەن ويدامىن. قازىر فۋتبولشى رەتىندەگى مانسابىمدا قايدا جالعاستىراتىنىمدى ويلاستىرىپ جاتىرمىن. بالكىم, باپكەرلىك جولىمدى دا باستاپ كەتەرمىن», – دەدى ول. مۇنداي تاجىريبەلى ويىنشىعا سۇرانىس كوپ بولارى بەلگىلى. بۇل تۋرالى: «ارينە, ۇسىنىستار كوپ. بىراق كوبىسى جاتتىقتىرۋشى رەتىندە شاقىرادى. ۇزاق ءارى كۇردەلى ماۋسىمدى اياقتاعاندىقتان الدىمەن دەمالىستى ويلاعىم كەلەدى. ونىڭ ۇستىنە ەۋروپا چەمپيوناتى دا ءبىراز كۇشىمدى الدى. جازدا دەمالىپ ۇلگەرمەگەندىكتەن قازىر ازداعان ءۇزىلىس العىم كەلەدى. ال قالعانىن سودان كەيىن شەشەمىن», – دەدى «قايراتتىڭ» ەكس-حاۆبەگى. ايتا كەتەيىك, 37 جاستاعى تيموششۋك قازاقستاندىق كلۋبقا 2015 جىلدىڭ جازىندا اۋىسىپ كەلگەن. ەكى ماۋسىمدا ول قپل-دە 34 ماتچ ء(بىر گول, ەكى ناتيجەلى پاس), ەل كۋبوگىندا 5 ماتچ, سونداي-اق ەۋروپا ليگاسىندا 10 ماتچ وتكىزدى. «قايرات» ساپىندا قازاقستان كۋبوگىن ءبىر رەت جەڭىپ السا, ىشكى بىرىنشىلىكتە ەكى رەت كۇمىس مەدالدى ەنشىلەدى.